יחזקאל 48 : 1 (ALEP)
א ואלה שמות השבטים מקצה צפונה אל יד דרך חתלן לבוא חמת חצר עינן גבול דמשק צפונה אל יד חמת והיו לו פאת קדים הים דן אחד
יחזקאל 48 : 2 (ALEP)
ב ועל גבול דן מפאת קדים עד פאת ימה--אשר אחד
יחזקאל 48 : 3 (ALEP)
ג ועל גבול אשר מפאת קדימה ועד פאת ימה--נפתלי אחד
יחזקאל 48 : 4 (ALEP)
ד ועל גבול נפתלי מפאת קדמה עד פאת ימה--מנשה אחד
יחזקאל 48 : 5 (ALEP)
ה ועל גבול מנשה מפאת קדמה עד פאת ימה--אפרים אחד
יחזקאל 48 : 6 (ALEP)
ו ועל גבול אפרים מפאת קדים ועד פאת ימה--ראובן אחד
יחזקאל 48 : 7 (ALEP)
ז ועל גבול ראובן מפאת קדים עד פאת ימה--יהודה אחד
יחזקאל 48 : 8 (ALEP)
ח ועל גבול יהודה מפאת קדים עד פאת ימה--תהיה התרומה אשר תרימו חמשה ועשרים אלף רחב וארך כאחד החלקים מפאת קדימה עד פאת ימה והיה המקדש בתוכו
יחזקאל 48 : 9 (ALEP)
ט התרומה אשר תרימו ליהוה--ארך חמשה ועשרים אלף ורחב עשרת אלפים
יחזקאל 48 : 10 (ALEP)
י ולאלה תהיה תרומת הקדש לכהנים--צפונה חמשה ועשרים אלף וימה רחב עשרת אלפים וקדימה רחב עשרת אלפים ונגבה ארך חמשה ועשרים אלף והיה מקדש יהוה בתוכו
יחזקאל 48 : 11 (ALEP)
יא לכהנים המקדש מבני צדוק אשר שמרו משמרתי--אשר לא תעו בתעות בני ישראל כאשר תעו הלוים
יחזקאל 48 : 12 (ALEP)
יב והיתה להם תרומיה מתרומת הארץ קדש קדשים--אל גבול הלוים
יחזקאל 48 : 13 (ALEP)
יג והלוים לעמת גבול הכהנים חמשה ועשרים אלף ארך ורחב עשרת אלפים כל ארך חמשה ועשרים אלף ורחב עשרת אלפים
יחזקאל 48 : 14 (ALEP)
יד ולא ימכרו ממנו ולא ימר ולא יעבור (יעביר)--ראשית הארץ כי קדש ליהוה
יחזקאל 48 : 15 (ALEP)
טו וחמשת אלפים הנותר ברחב על פני חמשה ועשרים אלף--חל הוא לעיר למושב ולמגרש והיתה העיר בתוכה
יחזקאל 48 : 16 (ALEP)
טז ואלה מדותיה--פאת צפון חמש מאות וארבעת אלפים ופאת נגב חמש חמש ( ) מאות וארבעת אלפים ומפאת קדים חמש מאות וארבעת אלפים ופאת ימה חמש מאות וארבעת אלפים
יחזקאל 48 : 17 (ALEP)
יז והיה מגרש לעיר--צפונה חמשים ומאתים ונגבה חמשים ומאתים וקדימה חמשים ומאתים וימה חמשים ומאתים
יחזקאל 48 : 18 (ALEP)
יח והנותר בארך לעמת תרומת הקדש עשרת אלפים קדימה ועשרת אלפים ימה והיה לעמת תרומת הקדש והיתה תבואתה ללחם לעבדי העיר
יחזקאל 48 : 19 (ALEP)
יט והעבד העיר--יעבדוהו מכל שבטי ישראל
יחזקאל 48 : 20 (ALEP)
כ כל התרומה חמשה ועשרים אלף בחמשה ועשרים אלף רביעית תרימו את תרומת הקדש אל אחזת העיר
יחזקאל 48 : 21 (ALEP)
כא והנותר לנשיא מזה ומזה לתרומת הקדש ולאחזת העיר אל פני חמשה ועשרים אלף תרומה עד גבול קדימה וימה על פני חמשה ועשרים אלף על גבול ימה לעמת חלקים לנשיא והיתה תרומת הקדש ומקדש הבית בתוכה
יחזקאל 48 : 22 (ALEP)
כב ומאחזת הלוים ומאחזת העיר בתוך אשר לנשיא יהיה בין גבול יהודה ובין גבול בנימן--לנשיא יהיה
יחזקאל 48 : 23 (ALEP)
כג ויתר השבטים מפאת קדימה עד פאת ימה בנימן אחד
יחזקאל 48 : 24 (ALEP)
כד ועל גבול בנימן מפאת קדימה עד פאת ימה--שמעון אחד
יחזקאל 48 : 25 (ALEP)
כה ועל גבול שמעון מפאת קדימה עד פאת ימה--יששכר אחד
יחזקאל 48 : 26 (ALEP)
כו ועל גבול יששכר מפאת קדימה עד פאת ימה--זבולן אחד
יחזקאל 48 : 27 (ALEP)
כז ועל גבול זבולן מפאת קדמה עד פאת ימה--גד אחד
יחזקאל 48 : 28 (ALEP)
כח ועל גבול גד אל פאת נגב תימנה והיה גבול מתמר מי מריבת קדש נחלה על הים הגדול
יחזקאל 48 : 29 (ALEP)
כט זאת הארץ אשר תפילו מנחלה לשבטי ישראל ואלה מחלקותם--נאם אדני יהוה ס
יחזקאל 48 : 30 (ALEP)
ל ואלה תוצאת העיר מפאת צפון חמש מאות וארבעת אלפים מדה
יחזקאל 48 : 31 (ALEP)
לא ושערי העיר על שמות שבטי ישראל שערים שלושה צפונה--שער ראובן אחד שער יהודה אחד שער לוי אחד
יחזקאל 48 : 32 (ALEP)
לב ואל פאת קדימה חמש מאות וארבעת אלפים ושערים שלשה--ושער יוסף אחד שער בנימן אחד שער דן אחד
יחזקאל 48 : 33 (ALEP)
לג ופאת נגבה חמש מאות וארבעת אלפים מדה ושערים שלשה--שער שמעון אחד שער יששכר אחד שער זבולן אחד
יחזקאל 48 : 34 (ALEP)
לד פאת ימה חמש מאות וארבעת אלפים שעריהם שלשה--שער גד אחד שער אשר אחד שער נפתלי אחד
יחזקאל 48 : 35 (ALEP)
לה סביב שמנה עשר אלף ושם העיר מיום יהוה שמה ש
❮
❯