יחזקאל 47 : 1 (ALEP)
א וישבני אל פתח הבית והנה מים יצאים מתחת מפתן הבית קדימה כי פני הבית קדים והמים ירדים מתחת מכתף הבית הימנית מנגב למזבח
יחזקאל 47 : 2 (ALEP)
ב ויוצאני דרך שער צפונה ויסבני דרך חוץ אל שער החוץ דרך הפונה קדים והנה מים מפכים מן הכתף הימנית
יחזקאל 47 : 3 (ALEP)
ג בצאת האיש קדים וקו בידו וימד אלף באמה ויעברני במים מי אפסים
יחזקאל 47 : 4 (ALEP)
ד וימד אלף ויעברני במים מים ברכים וימד אלף ויעברני מי מתנים
יחזקאל 47 : 5 (ALEP)
ה וימד אלף--נחל אשר לא אוכל לעבר כי גאו המים מי שחו נחל אשר לא יעבר
יחזקאל 47 : 6 (ALEP)
ו ויאמר אלי הראית בן אדם ויולכני וישבני שפת הנחל
יחזקאל 47 : 7 (ALEP)
ז בשובני--והנה אל שפת הנחל עץ רב מאד מזה ומזה
יחזקאל 47 : 8 (ALEP)
ח ויאמר אלי המים האלה יוצאים אל הגלילה הקדמונה וירדו על הערבה ובאו הימה אל הימה המוצאים ונרפאו המים
יחזקאל 47 : 9 (ALEP)
ט והיה כל נפש חיה אשר ישרץ אל כל אשר יבוא שם נחלים יחיה והיה הדגה רבה מאד כי באו שמה המים האלה וירפאו וחי--כל אשר יבוא שמה הנחל
יחזקאל 47 : 10 (ALEP)
י והיה יעמדו (עמדו) עליו דוגים מעין גדי ועד עין עגלים--משטוח לחרמים יהיו למינה תהיה דגתם כדגת הים הגדול רבה מאד
יחזקאל 47 : 11 (ALEP)
יא בצאתו וגבאיו ולא ירפאו למלח נתנו
יחזקאל 47 : 12 (ALEP)
יב ועל הנחל יעלה על שפתו מזה ומזה כל עץ מאכל לא יבול עלהו ולא יתם פריו לחדשיו יבכר--כי מימיו מן המקדש המה יוצאים והיו (והיה) פריו למאכל ועלהו לתרופה פ
יחזקאל 47 : 13 (ALEP)
יג כה אמר אדני יהוה גה גבול אשר תתנחלו את הארץ לשני עשר שבטי ישראל--יוסף חבלים
יחזקאל 47 : 14 (ALEP)
יד ונחלתם אותה איש כאחיו אשר נשאתי את ידי לתתה לאבתיכם ונפלה הארץ הזאת לכם--בנחלה
יחזקאל 47 : 15 (ALEP)
טו וזה גבול הארץ לפאת צפונה מן הים הגדול הדרך חתלן--לבוא צדדה
יחזקאל 47 : 16 (ALEP)
טז חמת ברותה סברים אשר בין גבול דמשק ובין גבול חמת חצר התיכון אשר אל גבול חורן
יחזקאל 47 : 17 (ALEP)
יז והיה גבול מן הים חצר עינון גבול דמשק וצפון צפונה וגבול חמת ואת פאת צפון
יחזקאל 47 : 18 (ALEP)
יח ופאת קדים מבין חורן ומבין דמשק ומבין הגלעד ומבין ארץ ישראל הירדן--מגבול על הים הקדמוני תמדו ואת פאת קדימה
יחזקאל 47 : 19 (ALEP)
יט ופאת נגב תימנה מתמר עד מי מריבות קדש נחלה אל הים הגדול ואת פאת תימנה נגבה
יחזקאל 47 : 20 (ALEP)
כ ופאת ים הים הגדול מגבול עד נכח לבוא חמת זאת פאת ים
יחזקאל 47 : 21 (ALEP)
כא וחלקתם את הארץ הזאת לכם--לשבטי ישראל
יחזקאל 47 : 22 (ALEP)
כב והיה תפלו אותה בנחלה לכם ולהגרים הגרים בתוככם אשר הולדו בנים בתוככם והיו לכם כאזרח בבני ישראל--אתכם יפלו בנחלה בתוך שבטי ישראל
יחזקאל 47 : 23 (ALEP)
כג והיה בשבט אשר גר הגר אתו--שם תתנו נחלתו נאם אדני יהוה פ
❮
❯