יחזקאל 45 : 1 (ALEP)
א ובהפילכם את הארץ בנחלה תרימו תרומה ליהוה קדש מן הארץ--ארך חמשה ועשרים אלף ארך ורחב עשרה אלף קדש הוא בכל גבולה סביב
יחזקאל 45 : 2 (ALEP)
ב יהיה מזה אל הקדש חמש מאות בחמש מאות מרבע סביב וחמשים אמה מגרש לו סביב
יחזקאל 45 : 3 (ALEP)
ג ומן המדה הזאת תמוד ארך חמש (חמשה) ועשרים אלף ורחב עשרת אלפים ובו יהיה המקדש קדש קדשים
יחזקאל 45 : 4 (ALEP)
ד קדש מן הארץ הוא לכהנים משרתי המקדש יהיה הקרבים לשרת את יהוה והיה להם מקום לבתים ומקדש למקדש
יחזקאל 45 : 5 (ALEP)
ה וחמשה ועשרים אלף ארך ועשרת אלפים רחב יהיה (והיה) ללוים משרתי הבית להם לאחזה--עשרים לשכת
יחזקאל 45 : 6 (ALEP)
ו ואחזת העיר תתנו חמשת אלפים רחב וארך חמשה ועשרים אלף לעמת תרומת הקדש--לכל בית ישראל יהיה
יחזקאל 45 : 7 (ALEP)
ז ולנשיא מזה ומזה לתרומת הקדש ולאחזת העיר אל פני תרומת הקדש ואל פני אחזת העיר מפאת ים ימה ומפאת קדמה קדימה וארך לעמות אחד החלקים מגבול ים אל גבול קדימה
יחזקאל 45 : 8 (ALEP)
ח לארץ יהיה לו לאחזה בישראל ולא יונו עוד נשיאי את עמי והארץ יתנו לבית ישראל לשבטיהם פ
יחזקאל 45 : 9 (ALEP)
ט כה אמר אדני יהוה רב לכם נשיאי ישראל--חמס ושד הסירו ומשפט וצדקה עשו הרימו גרשתיכם מעל עמי נאם אדני יהוה
יחזקאל 45 : 10 (ALEP)
י מאזני צדק ואיפת צדק ובת צדק יהי לכם
יחזקאל 45 : 11 (ALEP)
יא האיפה והבת תכן אחד יהיה--לשאת מעשר החמר הבת ועשירת החמר האיפה אל החמר יהיה מתכנתו
יחזקאל 45 : 12 (ALEP)
יב והשקל עשרים גרה עשרים שקלים חמשה ועשרים שקלים עשרה וחמשה שקל--המנה יהיה לכם
יחזקאל 45 : 13 (ALEP)
יג זאת התרומה אשר תרימו ששית האיפה מחמר החטים וששיתם האיפה מחמר השערים
יחזקאל 45 : 14 (ALEP)
יד וחק השמן הבת השמן מעשר הבת מן הכר--עשרת הבתים חמר כי עשרת הבתים חמר
יחזקאל 45 : 15 (ALEP)
טו ושה אחת מן הצאן מן המאתים ממשקה ישראל למנחה ולעולה ולשלמים--לכפר עליהם נאם אדני יהוה פ
יחזקאל 45 : 16 (ALEP)
טז כל העם הארץ יהיו אל התרומה הזאת לנשיא בישראל
יחזקאל 45 : 17 (ALEP)
יז ועל הנשיא יהיה העולות והמנחה והנסך בחגים ובחדשים ובשבתות בכל מועדי בית ישראל הוא יעשה את החטאת ואת המנחה ואת העולה ואת השלמים לכפר בעד בית ישראל ס
יחזקאל 45 : 18 (ALEP)
יח כה אמר אדני יהוה בראשון באחד לחדש תקח פר בן בקר תמים וחטאת את המקדש
יחזקאל 45 : 19 (ALEP)
יט ולקח הכהן מדם החטאת ונתן אל מזוזת הבית ואל ארבע פנות העזרה למזבח ועל מזוזת--שער החצר הפנימית
יחזקאל 45 : 20 (ALEP)
כ וכן תעשה בשבעה בחדש מאיש שגה ומפתי וכפרתם את הבית
יחזקאל 45 : 21 (ALEP)
כא בראשון בארבעה עשר יום לחדש יהיה לכם הפסח חג--שבעות ימים מצות יאכל
יחזקאל 45 : 22 (ALEP)
כב ועשה הנשיא ביום ההוא בעדו ובעד כל עם הארץ--פר חטאת
יחזקאל 45 : 23 (ALEP)
כג ושבעת ימי החג יעשה עולה ליהוה שבעת פרים ושבעת אילים תמימם ליום שבעת הימים וחטאת שעיר עזים ליום
יחזקאל 45 : 24 (ALEP)
כד ומנחה איפה לפר ואיפה לאיל--יעשה ושמן הין לאיפה
יחזקאל 45 : 25 (ALEP)
כה בשביעי בחמשה עשר יום לחדש בחג יעשה כאלה שבעת הימים כחטאת כעלה וכמנחה וכשמן ס
❮
❯