יחזקאל 43 : 1 (ALEP)
א ויולכני אל השער--שער אשר פנה דרך הקדים
יחזקאל 43 : 2 (ALEP)
ב והנה כבוד אלהי ישראל בא מדרך הקדים וקולו כקול מים רבים והארץ האירה מכבדו
יחזקאל 43 : 3 (ALEP)
ג וכמראה המראה אשר ראיתי כמראה אשר ראיתי בבאי לשחת את העיר ומראות כמראה אשר ראיתי אל נהר כבר ואפל אל פני
יחזקאל 43 : 4 (ALEP)
ד וכבוד יהוה בא אל הבית דרך שער אשר פניו דרך הקדים
יחזקאל 43 : 5 (ALEP)
ה ותשאני רוח--ותבאני אל החצר הפנימי והנה מלא כבוד יהוה הבית
יחזקאל 43 : 6 (ALEP)
ו ואשמע מדבר אלי מהבית ואיש היה עמד אצלי
יחזקאל 43 : 7 (ALEP)
ז ויאמר אלי בן אדם את מקום כסאי ואת מקום כפות רגלי אשר אשכן שם בתוך בני ישראל לעולם ולא יטמאו עוד בית ישראל שם קדשי המה ומלכיהם בזנותם ובפגרי מלכיהם במותם
יחזקאל 43 : 8 (ALEP)
ח בתתם ספם את ספי ומזוזתם אצל מזוזתי והקיר ביני וביניהם וטמאו את שם קדשי בתועבותם אשר עשו ואכל אתם באפי
יחזקאל 43 : 9 (ALEP)
ט עתה ירחקו את זנותם ופגרי מלכיהם--ממני ושכנתי בתוכם לעולם ס
יחזקאל 43 : 10 (ALEP)
י אתה בן אדם הגד את בית ישראל את הבית ויכלמו מעונותיהם ומדדו את תכנית
יחזקאל 43 : 11 (ALEP)
יא ואם נכלמו מכל אשר עשו צורת הבית ותכונתו ומוצאיו ומובאיו וכל צורתו ואת כל חקתיו וכל צורתו וכל תורתו הודע אותם וכתב לעיניהם וישמרו את כל צורתו ואת כל חקתיו--ועשו אותם
יחזקאל 43 : 12 (ALEP)
יב זאת תורת הבית על ראש ההר כל גבלו סביב סביב קדש קדשים--הנה זאת תורת הבית
יחזקאל 43 : 13 (ALEP)
יג ואלה מדות המזבח באמות אמה אמה וטפח וחיק האמה ואמה רחב וגבולה אל שפתה סביב זרת האחד וזה גב המזבח
יחזקאל 43 : 14 (ALEP)
יד ומחיק הארץ עד העזרה התחתונה שתים אמות ורחב אמה אחת ומהעזרה הקטנה עד העזרה הגדולה ארבע אמות ורחב האמה
יחזקאל 43 : 15 (ALEP)
טו וההראל ארבע אמות ומהאראיל ולמעלה הקרנות ארבע
יחזקאל 43 : 16 (ALEP)
טז והאראיל שתים עשרה ארך בשתים עשרה רחב רבוע אל ארבעת רבעיו
יחזקאל 43 : 17 (ALEP)
יז והעזרה ארבע עשרה ארך בארבע עשרה רחב אל ארבעת רבעיה והגבול סביב אותה חצי האמה והחיק לה אמה סביב ומעלתהו פנות קדים
יחזקאל 43 : 18 (ALEP)
יח ויאמר אלי בן אדם כה אמר אדני יהוה אלה חקות המזבח ביום העשותו--להעלות עליו עולה ולזרק עליו דם
יחזקאל 43 : 19 (ALEP)
יט ונתתה אל הכהנים הלוים אשר הם מזרע צדוק הקרבים אלי נאם אדני יהוה--לשרתני פר בן בקר לחטאת
יחזקאל 43 : 20 (ALEP)
כ ולקחת מדמו ונתתה על ארבע קרנתיו ואל ארבע פנות העזרה ואל הגבול סביב וחטאת אותו וכפרתהו
יחזקאל 43 : 21 (ALEP)
כא ולקחת את הפר החטאת ושרפו במפקד הבית מחוץ למקדש
יחזקאל 43 : 22 (ALEP)
כב וביום השני תקריב שעיר עזים תמים לחטאת וחטאו את המזבח כאשר חטאו בפר
יחזקאל 43 : 23 (ALEP)
כג בכלותך מחטא--תקריב פר בן בקר תמים ואיל מן הצאן תמים
יחזקאל 43 : 24 (ALEP)
כד והקרבתם לפני יהוה והשליכו הכהנים עליהם מלח והעלו אותם עלה ליהוה
יחזקאל 43 : 25 (ALEP)
כה שבעת ימים תעשה שעיר חטאת ליום ופר בן בקר ואיל מן הצאן תמימים יעשו
יחזקאל 43 : 26 (ALEP)
כו שבעת ימים יכפרו את המזבח וטהרו אתו ומלאו ידו
יחזקאל 43 : 27 (ALEP)
כז ויכלו את הימים ס והיה ביום השמיני והלאה יעשו הכהנים על המזבח את עולותיכם ואת שלמיכם ורצאתי אתכם נאם אדני יהוה ס
❮
❯