יחזקאל 34 : 1 (ALEP)
א ויהי דבר יהוה אלי לאמר
יחזקאל 34 : 2 (ALEP)
ב בן אדם הנבא על רועי ישראל הנבא ואמרת אליהם לרעים כה אמר אדני יהוה הוי רעי ישראל אשר היו רעים אותם--הלוא הצאן ירעו הרעים
יחזקאל 34 : 3 (ALEP)
ג את החלב תאכלו ואת הצמר תלבשו הבריאה תזבחו הצאן לא תרעו
יחזקאל 34 : 4 (ALEP)
ד את הנחלות לא חזקתם ואת החולה לא רפאתם ולנשברת לא חבשתם ואת הנדחת לא השבתם ואת האבדת לא בקשתם ובחזקה רדיתם אתם ובפרך
יחזקאל 34 : 5 (ALEP)
ה ותפוצינה מבלי רעה ותהיינה לאכלה לכל חית השדה ותפוצינה
יחזקאל 34 : 6 (ALEP)
ו ישגו צאני בכל ההרים ועל כל גבעה רמה ועל כל פני הארץ נפצו צאני ואין דורש ואין מבקש
יחזקאל 34 : 7 (ALEP)
ז לכן רעים שמעו את דבר יהוה
יחזקאל 34 : 8 (ALEP)
ח חי אני נאם אדני יהוה אם לא יען היות צאני לבז ותהיינה צאני לאכלה לכל חית השדה מאין רעה ולא דרשו רעי את צאני וירעו הרעים אותם ואת צאני לא רעו
יחזקאל 34 : 9 (ALEP)
ט לכן הרעים--שמעו דבר יהוה
יחזקאל 34 : 10 (ALEP)
י כה אמר אדני יהוה הנני אל הרעים ודרשתי את צאני מידם והשבתים מרעות צאן ולא ירעו עוד הרעים אותם והצלתי צאני מפיהם ולא תהיין להם לאכלה {ס}
יחזקאל 34 : 11 (ALEP)
יא כי כה אמר אדני יהוה הנני אני ודרשתי את צאני ובקרתים
יחזקאל 34 : 12 (ALEP)
יב כבקרת רעה עדרו ביום היותו בתוך צאנו נפרשות--כן אבקר את צאני והצלתי אתהם מכל המקומת אשר נפצו שם ביום ענן וערפל
יחזקאל 34 : 13 (ALEP)
יג והוצאתים מן העמים וקבצתים מן הארצות והביאותים אל אדמתם ורעיתים אל הרי ישראל באפיקים ובכל מושבי הארץ
יחזקאל 34 : 14 (ALEP)
יד במרעה טוב ארעה אתם ובהרי מרום ישראל יהיה נוהם שם תרבצנה בנוה טוב ומרעה שמן תרעינה אל הרי ישראל
יחזקאל 34 : 15 (ALEP)
טו אני ארעה צאני ואני ארביצם נאם אדני יהוה
יחזקאל 34 : 16 (ALEP)
טז את האבדת אבקש ואת הנדחת אשיב ולנשברת אחבש ואת החולה אחזק ואת השמנה ואת החזקה אשמיד ארענה במשפט
יחזקאל 34 : 17 (ALEP)
יז ואתנה צאני כה אמר אדני יהוה הנני שפט בין שה לשה לאילים ולעתודים
יחזקאל 34 : 18 (ALEP)
יח המעט מכם המרעה הטוב תרעו ויתר מרעיכם תרמסו ברגליכם ומשקע מים תשתו--ואת הנותרים ברגליכם תרפשון
יחזקאל 34 : 19 (ALEP)
יט וצאני--מרמס רגליכם תרעינה ומרפש רגליכם תשתינה {פ}
יחזקאל 34 : 20 (ALEP)
כ לכן כה אמר אדני יהוה--אליהם הנני אני--ושפטתי בין שה בריה ובין שה רזה
יחזקאל 34 : 21 (ALEP)
כא יען בצד ובכתף תהדפו ובקרניכם תנגחו כל הנחלות--עד אשר הפיצותם אותנה אל החוצה
יחזקאל 34 : 22 (ALEP)
כב והושעתי לצאני ולא תהיינה עוד לבז ושפטתי בין שה לשה
יחזקאל 34 : 23 (ALEP)
כג והקמתי עליהם רעה אחד ורעה אתהן--את עבדי דויד הוא ירעה אתם והוא יהיה להן לרעה
יחזקאל 34 : 24 (ALEP)
כד ואני יהוה אהיה להם לאלהים ועבדי דוד נשיא בתוכם אני יהוה דברתי
יחזקאל 34 : 25 (ALEP)
כה וכרתי להם ברית שלום והשבתי חיה רעה מן הארץ וישבו במדבר לבטח וישנו ביערים
יחזקאל 34 : 26 (ALEP)
כו ונתתי אותם וסביבות גבעתי ברכה והורדתי הגשם בעתו גשמי ברכה יהיו
יחזקאל 34 : 27 (ALEP)
כז ונתן עץ השדה את פריו והארץ תתן יבולה והיו על אדמתם לבטח וידעו כי אני יהוה בשברי את מטות עלם והצלתים מיד העבדים בהם
יחזקאל 34 : 28 (ALEP)
כח ולא יהיו עוד בז לגוים וחית הארץ לא תאכלם וישבו לבטח ואין מחריד
יחזקאל 34 : 29 (ALEP)
כט והקמתי להם מטע לשם ולא יהיו עוד אספי רעב בארץ ולא ישאו עוד כלמת הגוים
יחזקאל 34 : 30 (ALEP)
ל וידעו כי אני יהוה אלהיהם--אתם והמה עמי בית ישראל--נאם אדני יהוה
יחזקאל 34 : 31 (ALEP)
לא ואתן צאני צאן מרעיתי אדם אתם אני אלהיכם--נאם אדני יהוה {פ}
❮
❯