יחזקאל 3 : 1 (ALEP)
א ויאמר אלי--בן אדם את אשר תמצא אכול אכול את המגלה הזאת ולך דבר אל בית ישראל
יחזקאל 3 : 2 (ALEP)
ב ואפתח את פי ויאכילני את המגלה הזאת
יחזקאל 3 : 3 (ALEP)
ג ויאמר אלי בן אדם בטנך תאכל ומעיך תמלא את המגלה הזאת אשר אני נתן אליך ואכלה ותהי בפי כדבש למתוק פ
יחזקאל 3 : 4 (ALEP)
ד ויאמר אלי בן אדם לך בא אל בית ישראל ודברת בדברי אליהם
יחזקאל 3 : 5 (ALEP)
ה כי לא אל עם עמקי שפה וכבדי לשון--אתה שלוח אל בית ישראל
יחזקאל 3 : 6 (ALEP)
ו לא אל עמים רבים עמקי שפה וכבדי לשון אשר לא תשמע דבריהם אם לא אליהם שלחתיך המה ישמעו אליך
יחזקאל 3 : 7 (ALEP)
ז ובית ישראל לא יאבו לשמע אליך--כי אינם אבים לשמע אלי כי כל בית ישראל חזקי מצח וקשי לב המה
יחזקאל 3 : 8 (ALEP)
ח הנה נתתי את פניך חזקים לעמת פניהם ואת מצחך חזק לעמת מצחם
יחזקאל 3 : 9 (ALEP)
ט כשמיר חזק מצר נתתי מצחך לא תירא אותם ולא תחת מפניהם כי בית מרי המה פ
יחזקאל 3 : 10 (ALEP)
י ויאמר אלי בן אדם--את כל דברי אשר אדבר אליך קח בלבבך ובאזניך שמע
יחזקאל 3 : 11 (ALEP)
יא ולך בא אל הגולה אל בני עמך ודברת אליהם ואמרת אליהם כה אמר אדני יהוה אם ישמעו ואם יחדלו
יחזקאל 3 : 12 (ALEP)
יב ותשאני רוח--ואשמע אחרי קול רעש גדול ברוך כבוד יהוה ממקומו
יחזקאל 3 : 13 (ALEP)
יג וקול כנפי החיות משיקות אשה אל אחותה וקול האופנים לעמתם וקול רעש גדול
יחזקאל 3 : 14 (ALEP)
יד ורוח נשאתני ותקחני ואלך מר בחמת רוחי ויד יהוה עלי חזקה
יחזקאל 3 : 15 (ALEP)
טו ואבוא אל הגולה תל אביב הישבים אל נהר כבר ואשר (ואשב)--המה יושבים שם ואשב שם שבעת ימים משמים בתוכם
יחזקאל 3 : 16 (ALEP)
טז ויהי מקצה שבעת ימים פ ויהי דבר יהוה אלי לאמר
יחזקאל 3 : 17 (ALEP)
יז בן אדם צפה נתתיך לבית ישראל ושמעת מפי דבר והזהרת אותם ממני
יחזקאל 3 : 18 (ALEP)
יח באמרי לרשע מות תמות ולא הזהרתו ולא דברת להזהיר רשע מדרכו הרשעה לחיתו--הוא רשע בעונו ימות ודמו מידך אבקש
יחזקאל 3 : 19 (ALEP)
יט ואתה כי הזהרת רשע ולא שב מרשעו ומדרכו הרשעה--הוא בעונו ימות ואתה את נפשך הצלת
יחזקאל 3 : 20 (ALEP)
כ ובשוב צדיק מצדקו ועשה עול ונתתי מכשול לפניו הוא ימות כי לא הזהרתו בחטאתו ימות ולא תזכרן צדקתו אשר עשה ודמו מידך אבקש
יחזקאל 3 : 21 (ALEP)
כא ואתה כי הזהרתו צדיק לבלתי חטא צדיק--והוא לא חטא חיו יחיה כי נזהר ואתה את נפשך הצלת פ
יחזקאל 3 : 22 (ALEP)
כב ותהי עלי שם יד יהוה ויאמר אלי קום צא אל הבקעה ושם אדבר אותך
יחזקאל 3 : 23 (ALEP)
כג ואקום ואצא אל הבקעה והנה שם כבוד יהוה עמד ככבוד אשר ראיתי על נהר כבר ואפל על פני
יחזקאל 3 : 24 (ALEP)
כד ותבא בי רוח ותעמדני על רגלי וידבר אתי ויאמר אלי בא הסגר בתוך ביתך
יחזקאל 3 : 25 (ALEP)
כה ואתה בן אדם הנה נתנו עליך עבותים ואסרוך בהם ולא תצא בתוכם
יחזקאל 3 : 26 (ALEP)
כו ולשונך אדביק אל חכך ונאלמת ולא תהיה להם לאיש מוכיח כי בית מרי המה
יחזקאל 3 : 27 (ALEP)
כז ובדברי אותך אפתח את פיך ואמרת אליהם כה אמר אדני יהוה השמע ישמע והחדל יחדל כי בית מרי המה פ
❮
❯