יחזקאל 29 : 1 (ALEP)
א בשנה העשרית בעשרי בשנים עשר לחדש--היה דבר יהוה אלי לאמר
יחזקאל 29 : 2 (ALEP)
ב בן אדם--שים פניך על פרעה מלך מצרים והנבא עליו ועל מצרים כלה
יחזקאל 29 : 3 (ALEP)
ג דבר ואמרת כה אמר אדני יהוה הנני עליך פרעה מלך מצרים התנים הגדול הרבץ בתוך יאריו  אשר אמר לי יארי ואני עשיתני
יחזקאל 29 : 4 (ALEP)
ד ונתתי חחיים (חחים) בלחייך והדבקתי דגת יאריך בקשקשתיך והעליתיך מתוך יאריך ואת כל דגת יאריך בקשקשתיך תדבק
יחזקאל 29 : 5 (ALEP)
ה ונטשתיך המדברה אותך ואת כל דגת יאריך על פני השדה תפול לא תאסף ולא תקבץ--לחית הארץ ולעוף השמים נתתיך לאכלה
יחזקאל 29 : 6 (ALEP)
ו וידעו כל ישבי מצרים כי אני יהוה יען היותם משענת קנה לבית ישראל
יחזקאל 29 : 7 (ALEP)
ז בתפשם בך בכפך (בכף) תרוץ ובקעת להם כל כתף ובהשענם עליך תשבר והעמדת להם כל מתנים  ס
יחזקאל 29 : 8 (ALEP)
ח לכן כה אמר אדני יהוה הנני מביא עליך חרב והכרתי ממך אדם ובהמה
יחזקאל 29 : 9 (ALEP)
ט והיתה ארץ מצרים לשממה וחרבה וידעו כי אני יהוה  יען אמר יאר לי ואני עשיתי
יחזקאל 29 : 10 (ALEP)
י לכן הנני אליך ואל יאריך ונתתי את ארץ מצרים לחרבות חרב שממה ממגדל סונה ועד גבול כוש
יחזקאל 29 : 11 (ALEP)
יא לא תעבר בה רגל אדם ורגל בהמה לא תעבר בה ולא תשב ארבעים שנה
יחזקאל 29 : 12 (ALEP)
יב ונתתי את ארץ מצרים שממה בתוך ארצות נשמות ועריה בתוך ערים מחרבות תהיין שממה ארבעים שנה והפצתי את מצרים בגוים וזריתים בארצות  ס
יחזקאל 29 : 13 (ALEP)
יג כי כה אמר אדני יהוה  מקץ ארבעים שנה אקבץ את מצרים מן העמים אשר נפצו שמה
יחזקאל 29 : 14 (ALEP)
יד ושבתי את שבות מצרים והשבתי אתם ארץ פתרוס על ארץ מכורתם והיו שם ממלכה שפלה
יחזקאל 29 : 15 (ALEP)
טו מן הממלכות תהיה שפלה ולא תתנשא עוד על הגוים והמעטתים--לבלתי רדות בגוים
יחזקאל 29 : 16 (ALEP)
טז ולא יהיה עוד לבית ישראל למבטח מזכיר עון בפנותם אחריהם וידעו כי אני אדני יהוה  פ
יחזקאל 29 : 17 (ALEP)
יז ויהי בעשרים ושבע שנה בראשון באחד לחדש היה דבר יהוה אלי לאמר
יחזקאל 29 : 18 (ALEP)
יח בן אדם נבוכדראצר מלך בבל העביד את חילו עבדה גדולה אל צר--כל ראש מקרח וכל כתף מרוטה ושכר לא היה לו ולחילו מצר על העבדה אשר עבד עליה  ס
יחזקאל 29 : 19 (ALEP)
יט לכן כה אמר אדני יהוה הנני נתן לנבוכדראצר מלך בבל את ארץ מצרים ונשא המנה ושלל שללה ובזז בזה והיתה שכר לחילו
יחזקאל 29 : 20 (ALEP)
כ פעלתו אשר עבד בה נתתי לו את ארץ מצרים אשר עשו לי נאם אדני יהוה
יחזקאל 29 : 21 (ALEP)
כא ביום ההוא אצמיח קרן לבית ישראל ולך אתן פתחון פה בתוכם וידעו כי אני יהוה  פ

1 2 3 4 5 6 7 8 9 10 11 12 13 14 15 16 17 18 19 20 21