יחזקאל 24 : 1 (ALEP)
א ויהי דבר יהוה אלי בשנה התשיעית בחדש העשירי בעשור לחדש לאמר
יחזקאל 24 : 2 (ALEP)
ב בן אדם כתוב (כתב) לך את שם היום--את עצם היום הזה סמך מלך בבל אל ירושלם בעצם היום הזה
יחזקאל 24 : 3 (ALEP)
ג ומשל אל בית המרי משל ואמרת אליהם כה אמר אדני יהוה שפת הסיר שפת וגם יצק בו מים
יחזקאל 24 : 4 (ALEP)
ד אסף נתחיה אליה כל נתח טוב ירך וכתף מבחר עצמים מלא
יחזקאל 24 : 5 (ALEP)
ה מבחר הצאן לקוח וגם דור העצמים תחתיה רתח רתחיה גם בשלו עצמיה בתוכה ס
יחזקאל 24 : 6 (ALEP)
ו לכן כה אמר אדני יהוה אוי עיר הדמים--סיר אשר חלאתה בה וחלאתה לא יצאה ממנה לנתחיה לנתחיה הוציאה לא נפל עליה גורל
יחזקאל 24 : 7 (ALEP)
ז כי דמה בתוכה היה על צחיח סלע שמתהו לא שפכתהו על הארץ לכסות עליו עפר
יחזקאל 24 : 8 (ALEP)
ח להעלות חמה לנקם נקם נתתי את דמה על צחיח סלע--לבלתי הכסות פ
יחזקאל 24 : 9 (ALEP)
ט לכן כה אמר אדני יהוה אוי עיר הדמים גם אני אגדיל המדורה
יחזקאל 24 : 10 (ALEP)
י הרבה העצים הדלק האש התם הבשר והרקח המרקחה והעצמות יחרו
יחזקאל 24 : 11 (ALEP)
יא והעמידה על גחליה רקה למען תחם וחרה נחשתה ונתכה בתוכה טמאתה--תתם חלאתה
יחזקאל 24 : 12 (ALEP)
יב תאנים הלאת ולא תצא ממנה רבת חלאתה באש חלאתה
יחזקאל 24 : 13 (ALEP)
יג בטמאתך זמה יען טהרתיך ולא טהרת--מטמאתך לא תטהרי עוד עד הניחי את חמתי בך
יחזקאל 24 : 14 (ALEP)
יד אני יהוה דברתי באה ועשיתי לא אפרע ולא אחוס ולא אנחם כדרכיך וכעלילותיך שפטוך נאם אדני יהוה פ
יחזקאל 24 : 15 (ALEP)
טו ויהי דבר יהוה אלי לאמר
יחזקאל 24 : 16 (ALEP)
טז בן אדם הנני לקח ממך את מחמד עיניך במגפה ולא תספד ולא תבכה ולוא תבוא דמעתך
יחזקאל 24 : 17 (ALEP)
יז האנק דם מתים אבל לא תעשה--פארך חבוש עליך ונעליך תשים ברגליך ולא תעטה על שפם ולחם אנשים לא תאכל
יחזקאל 24 : 18 (ALEP)
יח ואדבר אל העם בבקר ותמת אשתי בערב ואעש בבקר כאשר צויתי
יחזקאל 24 : 19 (ALEP)
יט ויאמרו אלי העם הלא תגיד לנו מה אלה לנו כי אתה עשה
יחזקאל 24 : 20 (ALEP)
כ ואמר אליהם דבר יהוה--היה אלי לאמר
יחזקאל 24 : 21 (ALEP)
כא אמר לבית ישראל כה אמר אדני יהוה הנני מחלל את מקדשי גאון עזכם מחמד עיניכם ומחמל נפשכם ובניכם ובנותיכם אשר עזבתם בחרב יפלו
יחזקאל 24 : 22 (ALEP)
כב ועשיתם כאשר עשיתי על שפם לא תעטו ולחם אנשים לא תאכלו
יחזקאל 24 : 23 (ALEP)
כג ופארכם על ראשיכם ונעליכם ברגליכם--לא תספדו ולא תבכו ונמקתם בעונתיכם ונהמתם איש אל אחיו
יחזקאל 24 : 24 (ALEP)
כד והיה יחזקאל לכם למופת ככל אשר עשה תעשו בבואה--וידעתם כי אני אדני יהוה ס
יחזקאל 24 : 25 (ALEP)
כה ואתה בן אדם--הלוא ביום קחתי מהם את מעוזם משוש תפארתם את מחמד עיניהם ואת משא נפשם בניהם ובנותיהם
יחזקאל 24 : 26 (ALEP)
כו ביום ההוא יבוא הפליט אליך להשמעות אזנים
יחזקאל 24 : 27 (ALEP)
כז ביום ההוא יפתח פיך את הפליט ותדבר ולא תאלם עוד והיית להם למופת וידעו כי אני יהוה פ
❮
❯