יחזקאל 2 : 1 (ALEP)
א ויאמר אלי בן אדם עמד על רגליך ואדבר אתך
יחזקאל 2 : 2 (ALEP)
ב ותבא בי רוח כאשר דבר אלי ותעמדני על רגלי ואשמע את מדבר אלי פ
יחזקאל 2 : 3 (ALEP)
ג ויאמר אלי בן אדם שולח אני אותך אל בני ישראל--אל גוים המורדים אשר מרדו בי המה ואבותם פשעו בי עד עצם היום הזה
יחזקאל 2 : 4 (ALEP)
ד והבנים קשי פנים וחזקי לב--אני שולח אותך אליהם ואמרת אליהם כה אמר אדני יהוה
יחזקאל 2 : 5 (ALEP)
ה והמה אם ישמעו ואם יחדלו כי בית מרי המה--וידעו כי נביא היה בתוכם פ
יחזקאל 2 : 6 (ALEP)
ו ואתה בן אדם אל תירא מהם ומדבריהם אל תירא כי סרבים וסלונים אותך ואל עקרבים אתה יושב מדבריהם אל תירא ומפניהם אל תחת כי בית מרי המה
יחזקאל 2 : 7 (ALEP)
ז ודברת את דברי אליהם אם ישמעו ואם יחדלו כי מרי המה פ
יחזקאל 2 : 8 (ALEP)
ח ואתה בן אדם שמע את אשר אני מדבר אליך--אל תהי מרי כבית המרי פצה פיך--ואכל את אשר אני נתן אליך
יחזקאל 2 : 9 (ALEP)
ט ואראה והנה יד שלוחה אלי והנה בו מגלת ספר
יחזקאל 2 : 10 (ALEP)
י ויפרש אותה לפני והיא כתובה פנים ואחור וכתוב אליה קנים והגה והי ס
❮
❯