יחזקאל 16 : 1 (ALEP)
א ויהי דבר יהוה אלי לאמר
יחזקאל 16 : 2 (ALEP)
ב בן אדם הודע את ירושלם את תועבתיה
יחזקאל 16 : 3 (ALEP)
ג ואמרת כה אמר אדני יהוה לירושלם מכרתיך ומלדתיך מארץ הכנעני אביך האמרי ואמך חתית
יחזקאל 16 : 4 (ALEP)
ד ומולדותיך ביום הולדת אותך לא כרת שרך ובמים לא רחצת למשעי והמלח לא המלחת והחתל לא חתלת
יחזקאל 16 : 5 (ALEP)
ה לא חסה עליך עין לעשות לך אחת מאלה--לחמלה עליך ותשלכי אל פני השדה בגעל נפשך ביום הלדת אתך
יחזקאל 16 : 6 (ALEP)
ו ואעבר עליך ואראך מתבוססת בדמיך ואמר לך בדמיך חיי ואמר לך בדמיך חיי
יחזקאל 16 : 7 (ALEP)
ז רבבה כצמח השדה נתתיך ותרבי ותגדלי ותבאי בעדי עדיים שדים נכנו ושערך צמח ואת ערם ועריה
יחזקאל 16 : 8 (ALEP)
ח ואעבר עליך ואראך והנה עתך עת דדים ואפרש כנפי עליך ואכסה ערותך ואשבע לך ואבוא בברית אתך נאם אדני יהוה--ותהיי לי
יחזקאל 16 : 9 (ALEP)
ט וארחצך במים ואשטף דמיך מעליך ואסכך בשמן
יחזקאל 16 : 10 (ALEP)
י ואלבישך רקמה ואנעלך תחש ואחבשך בשש ואכסך משי
יחזקאל 16 : 11 (ALEP)
יא ואעדך עדי ואתנה צמידים על ידיך ורביד על גרונך
יחזקאל 16 : 12 (ALEP)
יב ואתן נזם על אפך ועגילים על אזניך ועטרת תפארת בראשך
יחזקאל 16 : 13 (ALEP)
יג ותעדי זהב וכסף ומלבושך ששי (שש) ומשי ורקמה סלת ודבש ושמן אכלתי (אכלת) ותיפי במאד מאד ותצלחי למלוכה
יחזקאל 16 : 14 (ALEP)
יד ויצא לך שם בגוים ביפיך כי כליל הוא בהדרי אשר שמתי עליך--נאם אדני יהוה
יחזקאל 16 : 15 (ALEP)
טו ותבטחי ביפיך ותזני על שמך ותשפכי את תזנותיך על כל עובר לו יהי
יחזקאל 16 : 16 (ALEP)
טז ותקחי מבגדיך ותעשי לך במות טלאות ותזני עליהם לא באות ולא יהיה
יחזקאל 16 : 17 (ALEP)
יז ותקחי כלי תפארתך מזהבי ומכספי אשר נתתי לך ותעשי לך צלמי זכר ותזני בם
יחזקאל 16 : 18 (ALEP)
יח ותקחי את בגדי רקמתך ותכסים ושמני וקטרתי נתתי (נתת) לפניהם
יחזקאל 16 : 19 (ALEP)
יט ולחמי אשר נתתי לך סלת ושמן ודבש האכלתיך ונתתיהו לפניהם לריח ניחח ויהי נאם אדני יהוה
יחזקאל 16 : 20 (ALEP)
כ ותקחי את בניך ואת בנותיך אשר ילדת לי ותזבחים להם לאכול--המעט מתזנותך (מתזנותיך)
יחזקאל 16 : 21 (ALEP)
כא ותשחטי את בני ותתנים בהעביר אותם להם
יחזקאל 16 : 22 (ALEP)
כב ואת כל תועבתיך ותזנתיך לא זכרתי (זכרת) את ימי נעוריך--בהיותך עירם ועריה מתבוססת בדמך היית
יחזקאל 16 : 23 (ALEP)
כג ויהי אחרי כל רעתך אוי אוי לך נאם אדני יהוה
יחזקאל 16 : 24 (ALEP)
כד ותבני לך גב ותעשי לך רמה בכל רחוב
יחזקאל 16 : 25 (ALEP)
כה אל כל ראש דרך בנית רמתך ותתעבי את יפיך ותפשקי את רגליך לכל עובר ותרבי את תזנותך (תזנותיך)
יחזקאל 16 : 26 (ALEP)
כו ותזני אל בני מצרים שכניך גדלי בשר ותרבי את תזנתך להכעיסני
יחזקאל 16 : 27 (ALEP)
כז והנה נטיתי ידי עליך ואגרע חקך ואתנך בנפש שנאותיך בנות פלשתים--הנכלמות מדרכך זמה
יחזקאל 16 : 28 (ALEP)
כח ותזני אל בני אשור מבלתי שבעתך ותזנים וגם לא שבעת
יחזקאל 16 : 29 (ALEP)
כט ותרבי את תזנותך אל ארץ כנען כשדימה וגם בזאת לא שבעת
יחזקאל 16 : 30 (ALEP)
ל מה אמלה לבתך נאם אדני יהוה--בעשותך את כל אלה מעשה אשה זונה שלטת
יחזקאל 16 : 31 (ALEP)
לא בבנותיך גבך בראש כל דרך ורמתך עשיתי (עשית) בכל רחוב ולא הייתי (היית) כזונה לקלס אתנן
יחזקאל 16 : 32 (ALEP)
לב האשה המנאפת--תחת אישה תקח את זרים
יחזקאל 16 : 33 (ALEP)
לג לכל זנות יתנו נדה ואת נתת את נדניך לכל מאהביך ותשחדי אותם לבוא אליך מסביב בתזנותיך
יחזקאל 16 : 34 (ALEP)
לד ויהי בך הפך מן הנשים בתזנותיך ואחריך לא זונה ובתתך אתנן ואתנן לא נתן לך--ותהי להפך
יחזקאל 16 : 35 (ALEP)
לה לכן זונה שמעי דבר יהוה פ
יחזקאל 16 : 36 (ALEP)
לו כה אמר אדני יהוה יען השפך נחשתך ותגלה ערותך בתזנותיך על מאהביך ועל כל גלולי תועבותיך וכדמי בניך אשר נתת להם
יחזקאל 16 : 37 (ALEP)
לז לכן הנני מקבץ את כל מאהביך אשר ערבת עליהם ואת כל אשר אהבת על כל אשר שנאת וקבצתי אתם עליך מסביב וגליתי ערותך אלהם וראו את כל ערותך
יחזקאל 16 : 38 (ALEP)
לח ושפטתיך משפטי נאפות ושפכת דם ונתתיך דם חמה וקנאה
יחזקאל 16 : 39 (ALEP)
לט ונתתי אתך בידם והרסו גבך ונתצו רמתיך והפשיטו אותך בגדיך ולקחו כלי תפארתך והניחוך עירם ועריה
יחזקאל 16 : 40 (ALEP)
מ והעלו עליך קהל ורגמו אותך באבן ובתקוך בחרבותם
יחזקאל 16 : 41 (ALEP)
מא ושרפו בתיך באש ועשו בך שפטים לעיני נשים רבות והשבתיך מזונה וגם אתנן לא תתני עוד
יחזקאל 16 : 42 (ALEP)
מב והנחתי חמתי בך וסרה קנאתי ממך ושקטתי ולא אכעס עוד
יחזקאל 16 : 43 (ALEP)
מג יען אשר לא זכרתי (זכרת) את ימי נעוריך ותרגזי לי בכל אלה וגם אני הא דרכך בראש נתתי נאם אדני יהוה ולא עשיתי (עשית) את הזמה על כל תועבתיך
יחזקאל 16 : 44 (ALEP)
מד הנה כל המשל עליך ימשל לאמר כאמה בתה
יחזקאל 16 : 45 (ALEP)
מה בת אמך את געלת אישה ובניה ואחות אחותך את אשר געלו אנשיהן ובניהן--אמכן חתית ואביכן אמרי
יחזקאל 16 : 46 (ALEP)
מו ואחותך הגדולה שמרון היא ובנותיה היושבת על שמאולך ואחותך הקטנה ממך היושבת מימינך--סדם ובנותיה
יחזקאל 16 : 47 (ALEP)
מז ולא בדרכיהן הלכת וכתועבותיהן עשיתי (עשית) כמעט קט ותשחתי מהן בכל דרכיך
יחזקאל 16 : 48 (ALEP)
מח חי אני נאם אדני יהוה אם עשתה סדם אחותך היא ובנותיה--כאשר עשית את ובנותיך
יחזקאל 16 : 49 (ALEP)
מט הנה זה היה עון סדם אחותך גאון שבעת לחם ושלות השקט היה לה ולבנותיה ויד עני ואביון לא החזיקה
יחזקאל 16 : 50 (ALEP)
נ ותגבהינה ותעשינה תועבה לפני ואסיר אתהן כאשר ראיתי ס
יחזקאל 16 : 51 (ALEP)
נא ושמרון כחצי חטאתיך לא חטאה ותרבי את תועבותיך מהנה ותצדקי את אחותך (אחותיך) בכל תועבתיך אשר עשיתי (עשית)
יחזקאל 16 : 52 (ALEP)
נב גם את שאי כלמתך אשר פללת לאחותך בחטאתיך אשר התעבת מהן תצדקנה ממך וגם את בושי ושאי כלמתך בצדקתך אחיותך
יחזקאל 16 : 53 (ALEP)
נג ושבתי את שביתהן--את שבית (שבות) סדם ובנותיה ואת שבית (שבות) שמרון ובנותיה ושבית (ושבות) שביתיך בתוכהנה
יחזקאל 16 : 54 (ALEP)
נד למען תשאי כלמתך ונכלמת מכל אשר עשית--בנחמך אתן
יחזקאל 16 : 55 (ALEP)
נה ואחותיך סדם ובנותיה תשבן לקדמתן ושמרון ובנותיה תשבן לקדמתן ואת ובנותיך תשבינה לקדמתכן
יחזקאל 16 : 56 (ALEP)
נו ולוא היתה סדם אחותך לשמועה בפיך ביום גאוניך
יחזקאל 16 : 57 (ALEP)
נז בטרם תגלה רעתך כמו עת חרפת בנות ארם וכל סביבותיה בנות פלשתים השאטות אותך מסביב
יחזקאל 16 : 58 (ALEP)
נח את זמתך ואת תועבותיך את נשאתים--נאם יהוה ס
יחזקאל 16 : 59 (ALEP)
נט כי כה אמר אדני יהוה ועשית (ועשיתי) אותך כאשר עשית--אשר בזית אלה להפר ברית
יחזקאל 16 : 60 (ALEP)
ס וזכרתי אני את בריתי אותך בימי נעוריך והקימותי לך ברית עולם
יחזקאל 16 : 61 (ALEP)
סא וזכרת את דרכיך ונכלמת בקחתך את אחותיך הגדלות ממך אל הקטנות ממך ונתתי אתהן לך לבנות ולא מבריתך
יחזקאל 16 : 62 (ALEP)
סב והקימתי אני את בריתי אתך וידעת כי אני יהוה
יחזקאל 16 : 63 (ALEP)
סג למען תזכרי ובשת ולא יהיה לך עוד פתחון פה מפני כלמתך--בכפרי לך לכל אשר עשית נאם אדני יהוה פ
❮
❯