יחזקאל 12 : 1 (ALEP)
א ויהי דבר יהוה אלי לאמר
יחזקאל 12 : 2 (ALEP)
ב בן אדם בתוך בית המרי אתה ישב אשר עינים להם לראות ולא ראו אזנים להם לשמע ולא שמעו--כי בית מרי הם
יחזקאל 12 : 3 (ALEP)
ג ואתה בן אדם עשה לך כלי גולה וגלה יומם לעיניהם וגלית ממקומך אל מקום אחר לעיניהם--אולי יראו כי בית מרי המה
יחזקאל 12 : 4 (ALEP)
ד והוצאת כליך ככלי גולה יומם--לעיניהם ואתה תצא בערב לעיניהם כמוצאי גולה
יחזקאל 12 : 5 (ALEP)
ה לעיניהם חתר לך בקיר והוצאת בו
יחזקאל 12 : 6 (ALEP)
ו לעיניהם על כתף תשא בעלטה תוציא--פניך תכסה ולא תראה את הארץ כי מופת נתתיך לבית ישראל
יחזקאל 12 : 7 (ALEP)
ז ואעש כן כאשר צויתי כלי הוצאתי ככלי גולה יומם ובערב חתרתי לי בקיר ביד בעלטה הוצאתי על כתף נשאתי לעיניהם {פ}
יחזקאל 12 : 8 (ALEP)
ח ויהי דבר יהוה אלי בבקר לאמר
יחזקאל 12 : 9 (ALEP)
ט בן אדם הלא אמרו אליך בית ישראל בית המרי מה אתה עשה
יחזקאל 12 : 10 (ALEP)
י אמר אליהם כה אמר אדני יהוה הנשיא המשא הזה בירושלם וכל בית ישראל אשר המה בתוכם
יחזקאל 12 : 11 (ALEP)
יא אמר אני מופתכם כאשר עשיתי כן יעשה להם--בגולה בשבי ילכו
יחזקאל 12 : 12 (ALEP)
יב והנשיא אשר בתוכם אל כתף ישא בעלטה ויצא--בקיר יחתרו להוציא בו פניו יכסה--יען אשר לא יראה לעין הוא את הארץ
יחזקאל 12 : 13 (ALEP)
יג ופרשתי את רשתי עליו ונתפש במצודתי והבאתי אתו בבלה ארץ כשדים ואותה לא יראה ושם ימות
יחזקאל 12 : 14 (ALEP)
יד וכל אשר סביבתיו עזרה וכל אגפיו אזרה לכל רוח וחרב אריק אחריהם
יחזקאל 12 : 15 (ALEP)
טו וידעו כי אני יהוה בהפיצי אותם בגוים וזריתי אותם בארצות
יחזקאל 12 : 16 (ALEP)
טז והותרתי מהם אנשי מספר מחרב מרעב ומדבר--למען יספרו את כל תועבותיהם בגוים אשר באו שם וידעו כי אני יהוה {פ}
יחזקאל 12 : 17 (ALEP)
יז ויהי דבר יהוה אלי לאמר
יחזקאל 12 : 18 (ALEP)
יח בן אדם לחמך ברעש תאכל ומימיך ברגזה ובדאגה תשתה
יחזקאל 12 : 19 (ALEP)
יט ואמרת אל עם הארץ כה אמר אדני יהוה ליושבי ירושלם אל אדמת ישראל לחמם בדאגה יאכלו ומימיהם בשממון ישתו--למען תשם ארצה ממלאה מחמס כל הישבים בה
יחזקאל 12 : 20 (ALEP)
כ והערים הנושבות תחרבנה והארץ שממה תהיה וידעתם כי אני יהוה {פ}
יחזקאל 12 : 21 (ALEP)
כא ויהי דבר יהוה אלי לאמר
יחזקאל 12 : 22 (ALEP)
כב בן אדם מה המשל הזה לכם על אדמת ישראל לאמר יארכו הימים ואבד כל חזון
יחזקאל 12 : 23 (ALEP)
כג לכן אמר אליהם כה אמר אדני יהוה השבתי את המשל הזה ולא ימשלו אתו עוד בישראל כי אם דבר אליהם קרבו הימים ודבר כל חזון
יחזקאל 12 : 24 (ALEP)
כד כי לא יהיה עוד כל חזון שוא--ומקסם חלק בתוך בית ישראל
יחזקאל 12 : 25 (ALEP)
כה כי אני יהוה אדבר את אשר אדבר דבר ויעשה--לא תמשך עוד כי בימיכם בית המרי אדבר דבר ועשיתיו נאם אדני יהוה {פ}
יחזקאל 12 : 26 (ALEP)
כו ויהי דבר יהוה אלי לאמר
יחזקאל 12 : 27 (ALEP)
כז בן אדם הנה בית ישראל אמרים החזון אשר הוא חזה לימים רבים ולעתים רחוקות הוא נבא
יחזקאל 12 : 28 (ALEP)
כח לכן אמר אליהם כה אמר אדני יהוה לא תמשך עוד כל דברי--אשר אדבר דבר ויעשה נאם אדני יהוה {פ}
❮
❯