שמות 8 : 1 (ALEP)
א ויאמר יהוה אל משה אמר אל אהרן נטה את ידך במטך על הנהרת על היארים ועל האגמים והעל את הצפרדעים על ארץ מצרים
שמות 8 : 2 (ALEP)
ב ויט אהרן את ידו על מימי מצרים ותעל הצפרדע ותכס את ארץ מצרים
שמות 8 : 3 (ALEP)
ג ויעשו כן החרטמים בלטיהם ויעלו את הצפרדעים על ארץ מצרים
שמות 8 : 4 (ALEP)
ד ויקרא פרעה למשה ולאהרן ויאמר העתירו אל יהוה ויסר הצפרדעים ממני ומעמי ואשלחה את העם ויזבחו ליהוה
שמות 8 : 5 (ALEP)
ה ויאמר משה לפרעה התפאר עלי למתי אעתיר לך ולעבדיך ולעמך להכרית הצפרדעים ממך ומבתיך רק ביאר תשארנה
שמות 8 : 6 (ALEP)
ו ויאמר למחר ויאמר כדברך--למען תדע כי אין כיהוה אלהינו
שמות 8 : 7 (ALEP)
ז וסרו הצפרדעים ממך ומבתיך ומעבדיך ומעמך רק ביאר תשארנה
שמות 8 : 8 (ALEP)
ח ויצא משה ואהרן מעם פרעה ויצעק משה אל יהוה על דבר הצפרדעים אשר שם לפרעה
שמות 8 : 9 (ALEP)
ט ויעש יהוה כדבר משה וימתו הצפרדעים מן הבתים מן החצרת ומן השדת
שמות 8 : 10 (ALEP)
י ויצברו אתם חמרם חמרם ותבאש הארץ
שמות 8 : 11 (ALEP)
יא וירא פרעה כי היתה הרוחה והכבד את לבו ולא שמע אלהם כאשר דבר יהוה ס
שמות 8 : 12 (ALEP)
יב ויאמר יהוה אל משה אמר אל אהרן נטה את מטך והך את עפר הארץ והיה לכנם בכל ארץ מצרים
שמות 8 : 13 (ALEP)
יג ויעשו כן ויט אהרן את ידו במטהו ויך את עפר הארץ ותהי הכנם באדם ובבהמה כל עפר הארץ היה כנים בכל ארץ מצרים
שמות 8 : 14 (ALEP)
יד ויעשו כן החרטמים בלטיהם להוציא את הכנים ולא יכלו ותהי הכנם באדם ובבהמה
שמות 8 : 15 (ALEP)
טו ויאמרו החרטמם אל פרעה אצבע אלהים הוא ויחזק לב פרעה ולא שמע אלהם כאשר דבר יהוה ס
שמות 8 : 16 (ALEP)
טז ויאמר יהוה אל משה השכם בבקר והתיצב לפני פרעה--הנה יוצא המימה ואמרת אליו כה אמר יהוה שלח עמי ויעבדני
שמות 8 : 17 (ALEP)
יז כי אם אינך משלח את עמי--הנני משליח בך ובעבדיך ובעמך ובבתיך את הערב ומלאו בתי מצרים את הערב וגם האדמה אשר הם עליה
שמות 8 : 18 (ALEP)
יח והפליתי ביום ההוא את ארץ גשן אשר עמי עמד עליה לבלתי היות שם ערב--למען תדע כי אני יהוה בקרב הארץ
שמות 8 : 19 (ALEP)
יט ושמתי פדת בין עמי ובין עמך למחר יהיה האת הזה
שמות 8 : 20 (ALEP)
כ ויעש יהוה כן ויבא ערב כבד ביתה פרעה ובית עבדיו ובכל ארץ מצרים תשחת הארץ מפני הערב
שמות 8 : 21 (ALEP)
כא ויקרא פרעה אל משה ולאהרן ויאמר לכו זבחו לאלהיכם--בארץ
שמות 8 : 22 (ALEP)
כב ויאמר משה לא נכון לעשות כן כי תועבת מצרים נזבח ליהוה אלהינו הן נזבח את תועבת מצרים לעיניהם--ולא יסקלנו
שמות 8 : 23 (ALEP)
כג דרך שלשת ימים נלך במדבר וזבחנו ליהוה אלהינו כאשר יאמר אלינו
שמות 8 : 24 (ALEP)
כד ויאמר פרעה אנכי אשלח אתכם וזבחתם ליהוה אלהיכם במדבר--רק הרחק לא תרחיקו ללכת העתירו בעדי
שמות 8 : 25 (ALEP)
כה ויאמר משה הנה אנכי יוצא מעמך והעתרתי אל יהוה וסר הערב מפרעה מעבדיו ומעמו מחר רק אל יסף פרעה התל לבלתי שלח את העם לזבח ליהוה
שמות 8 : 26 (ALEP)
כו ויצא משה מעם פרעה ויעתר אל יהוה
שמות 8 : 27 (ALEP)
כז ויעש יהוה כדבר משה ויסר הערב מפרעה מעבדיו ומעמו לא נשאר אחד
שמות 8 : 28 (ALEP)
כח ויכבד פרעה את לבו גם בפעם הזאת ולא שלח את העם פ
❮
❯