שמות 6 : 1 (ALEP)
א ויאמר יהוה אל משה עתה תראה אשר אעשה לפרעה כי ביד חזקה ישלחם וביד חזקה יגרשם מארצו {ס}
שמות 6 : 2 (ALEP)
ב וידבר אלהים אל משה ויאמר אליו אני יהוה
שמות 6 : 3 (ALEP)
ג וארא אל אברהם אל יצחק ואל יעקב--באל שדי ושמי יהוה לא נודעתי להם
שמות 6 : 4 (ALEP)
ד וגם הקמתי את בריתי אתם לתת להם את ארץ כנען--את ארץ מגריהם אשר גרו בה
שמות 6 : 5 (ALEP)
ה וגם אני שמעתי את נאקת בני ישראל אשר מצרים מעבדים אתם ואזכר את בריתי
שמות 6 : 6 (ALEP)
ו לכן אמר לבני ישראל אני יהוה והוצאתי אתכם מתחת סבלת מצרים והצלתי אתכם מעבדתם וגאלתי אתכם בזרוע נטויה ובשפטים גדלים
שמות 6 : 7 (ALEP)
ז ולקחתי אתכם לי לעם והייתי לכם לאלהים וידעתם כי אני יהוה אלהיכם המוציא אתכם מתחת סבלות מצרים
שמות 6 : 8 (ALEP)
ח והבאתי אתכם אל הארץ אשר נשאתי את ידי לתת אתה לאברהם ליצחק וליעקב ונתתי אתה לכם מורשה אני יהוה
שמות 6 : 9 (ALEP)
ט וידבר משה כן אל בני ישראל ולא שמעו אל משה מקצר רוח ומעבדה קשה {פ}
שמות 6 : 10 (ALEP)
י וידבר יהוה אל משה לאמר
שמות 6 : 11 (ALEP)
יא בא דבר אל פרעה מלך מצרים וישלח את בני ישראל מארצו
שמות 6 : 12 (ALEP)
יב וידבר משה לפני יהוה לאמר הן בני ישראל לא שמעו אלי ואיך ישמעני פרעה ואני ערל שפתים {פ}
שמות 6 : 13 (ALEP)
יג וידבר יהוה אל משה ואל אהרן ויצום אל בני ישראל ואל פרעה מלך מצרים--להוציא את בני ישראל מארץ מצרים {ס}
שמות 6 : 14 (ALEP)
יד אלה ראשי בית אבתם בני ראובן בכר ישראל חנוך ופלוא חצרן וכרמי--אלה משפחת ראובן
שמות 6 : 15 (ALEP)
טו ובני שמעון ימואל וימין ואהד ויכין וצחר ושאול בן הכנענית אלה משפחת שמעון
שמות 6 : 16 (ALEP)
טז ואלה שמות בני לוי לתלדתם--גרשון וקהת ומררי ושני חיי לוי שבע ושלשים ומאת שנה
שמות 6 : 17 (ALEP)
יז בני גרשון לבני ושמעי למשפחתם
שמות 6 : 18 (ALEP)
יח ובני קהת--עמרם ויצהר וחברון ועזיאל ושני חיי קהת שלש ושלשים ומאת שנה
שמות 6 : 19 (ALEP)
יט ובני מררי מחלי ומושי אלה משפחת הלוי לתלדתם
שמות 6 : 20 (ALEP)
כ ויקח עמרם את יוכבד דדתו לו לאשה ותלד לו את אהרן ואת משה ושני חיי עמרם שבע ושלשים ומאת שנה
שמות 6 : 21 (ALEP)
כא ובני יצהר--קרח ונפג וזכרי
שמות 6 : 22 (ALEP)
כב ובני עזיאל--מישאל ואלצפן וסתרי
שמות 6 : 23 (ALEP)
כג ויקח אהרן את אלישבע בת עמינדב אחות נחשון--לו לאשה ותלד לו את נדב ואת אביהוא את אלעזר ואת איתמר
שמות 6 : 24 (ALEP)
כד ובני קרח אסיר ואלקנה ואביאסף אלה משפחת הקרחי
שמות 6 : 25 (ALEP)
כה ואלעזר בן אהרן לקח לו מבנות פוטיאל לו לאשה ותלד לו את פינחס אלה ראשי אבות הלוים--למשפחתם
שמות 6 : 26 (ALEP)
כו הוא אהרן ומשה--אשר אמר יהוה להם הוציאו את בני ישראל מארץ מצרים על צבאתם
שמות 6 : 27 (ALEP)
כז הם המדברים אל פרעה מלך מצרים להוציא את בני ישראל ממצרים הוא משה ואהרן
שמות 6 : 28 (ALEP)
כח ויהי ביום דבר יהוה אל משה--בארץ מצרים {ס}
שמות 6 : 29 (ALEP)
כט וידבר יהוה אל משה לאמר אני יהוה דבר אל פרעה מלך מצרים את כל אשר אני דבר אליך
שמות 6 : 30 (ALEP)
ל ויאמר משה לפני יהוה הן אני ערל שפתים ואיך ישמע אלי פרעה {פ}
❮
❯