שמות 4 : 1 (ALEP)
א ויען משה ויאמר והן לא יאמינו לי ולא ישמעו בקלי כי יאמרו לא נראה אליך יהוה
שמות 4 : 2 (ALEP)
ב ויאמר אליו יהוה מזה (מה זה) בידך ויאמר מטה
שמות 4 : 3 (ALEP)
ג ויאמר השליכהו ארצה וישלכהו ארצה ויהי לנחש וינס משה מפניו
שמות 4 : 4 (ALEP)
ד ויאמר יהוה אל משה שלח ידך ואחז בזנבו וישלח ידו ויחזק בו ויהי למטה בכפו
שמות 4 : 5 (ALEP)
ה למען יאמינו כי נראה אליך יהוה אלהי אבתם אלהי אברהם אלהי יצחק ואלהי יעקב
שמות 4 : 6 (ALEP)
ו ויאמר יהוה לו עוד הבא נא ידך בחיקך ויבא ידו בחיקו ויוצאה והנה ידו מצרעת כשלג
שמות 4 : 7 (ALEP)
ז ויאמר השב ידך אל חיקך וישב ידו אל חיקו ויוצאה מחיקו והנה שבה כבשרו
שמות 4 : 8 (ALEP)
ח והיה אם לא יאמינו לך ולא ישמעו לקל האת הראשון--והאמינו לקל האת האחרון
שמות 4 : 9 (ALEP)
ט והיה אם לא יאמינו גם לשני האתות האלה ולא ישמעון לקלך--ולקחת ממימי היאר ושפכת היבשה והיו המים אשר תקח מן היאר והיו לדם ביבשת
שמות 4 : 10 (ALEP)
י ויאמר משה אל יהוה בי אדני לא איש דברים אנכי גם מתמול גם משלשם גם מאז דברך אל עבדך כי כבד פה וכבד לשון אנכי
שמות 4 : 11 (ALEP)
יא ויאמר יהוה אליו מי שם פה לאדם או מי ישום אלם או חרש או פקח או עור--הלא אנכי יהוה
שמות 4 : 12 (ALEP)
יב ועתה לך ואנכי אהיה עם פיך והוריתיך אשר תדבר
שמות 4 : 13 (ALEP)
יג ויאמר בי אדני שלח נא ביד תשלח
שמות 4 : 14 (ALEP)
יד ויחר אף יהוה במשה ויאמר הלא אהרן אחיך הלוי--ידעתי כי דבר ידבר הוא וגם הנה הוא יצא לקראתך וראך ושמח בלבו
שמות 4 : 15 (ALEP)
טו ודברת אליו ושמת את הדברים בפיו ואנכי אהיה עם פיך ועם פיהו והוריתי אתכם את אשר תעשון
שמות 4 : 16 (ALEP)
טז ודבר הוא לך אל העם והיה הוא יהיה לך לפה ואתה תהיה לו לאלהים
שמות 4 : 17 (ALEP)
יז ואת המטה הזה תקח בידך אשר תעשה בו את האתת פ
שמות 4 : 18 (ALEP)
יח וילך משה וישב אל יתר חתנו ויאמר לו אלכה נא ואשובה אל אחי אשר במצרים ואראה העודם חיים ויאמר יתרו למשה לך לשלום
שמות 4 : 19 (ALEP)
יט ויאמר יהוה אל משה במדין לך שב מצרים כי מתו כל האנשים המבקשים את נפשך
שמות 4 : 20 (ALEP)
כ ויקח משה את אשתו ואת בניו וירכבם על החמר וישב ארצה מצרים ויקח משה את מטה האלהים בידו
שמות 4 : 21 (ALEP)
כא ויאמר יהוה אל משה בלכתך לשוב מצרימה ראה כל המפתים אשר שמתי בידך ועשיתם לפני פרעה ואני אחזק את לבו ולא ישלח את העם
שמות 4 : 22 (ALEP)
כב ואמרת אל פרעה כה אמר יהוה בני בכרי ישראל
שמות 4 : 23 (ALEP)
כג ואמר אליך שלח את בני ויעבדני ותמאן לשלחו--הנה אנכי הרג את בנך בכרך
שמות 4 : 24 (ALEP)
כד ויהי בדרך במלון ויפגשהו יהוה ויבקש המיתו
שמות 4 : 25 (ALEP)
כה ותקח צפרה צר ותכרת את ערלת בנה ותגע לרגליו ותאמר כי חתן דמים אתה לי
שמות 4 : 26 (ALEP)
כו וירף ממנו אז אמרה חתן דמים למולת פ
שמות 4 : 27 (ALEP)
כז ויאמר יהוה אל אהרן לך לקראת משה המדברה וילך ויפגשהו בהר האלהים--וישק לו
שמות 4 : 28 (ALEP)
כח ויגד משה לאהרן את כל דברי יהוה אשר שלחו ואת כל האתת אשר צוהו
שמות 4 : 29 (ALEP)
כט וילך משה ואהרן ויאספו את כל זקני בני ישראל
שמות 4 : 30 (ALEP)
ל וידבר אהרן--את כל הדברים אשר דבר יהוה אל משה ויעש האתת לעיני העם
שמות 4 : 31 (ALEP)
לא ויאמן העם וישמעו כי פקד יהוה את בני ישראל וכי ראה את ענים ויקדו וישתחוו
❮
❯