שמות 39 : 1 (ALEP)
א ומן התכלת והארגמן ותולעת השני עשו בגדי שרד לשרת בקדש ויעשו את בגדי הקדש אשר לאהרן כאשר צוה יהוה את משה פ
שמות 39 : 2 (ALEP)
ב ויעש את האפד זהב תכלת וארגמן ותולעת שני--ושש משזר
שמות 39 : 3 (ALEP)
ג וירקעו את פחי הזהב וקצץ פתילם לעשות בתוך התכלת ובתוך הארגמן ובתוך תולעת השני ובתוך השש--מעשה חשב
שמות 39 : 4 (ALEP)
ד כתפת עשו לו חברת--על שני קצוותו (קצותיו) חבר
שמות 39 : 5 (ALEP)
ה וחשב אפדתו אשר עליו ממנו הוא כמעשהו זהב תכלת וארגמן ותולעת שני ושש משזר--כאשר צוה יהוה את משה ס
שמות 39 : 6 (ALEP)
ו ויעשו את אבני השהם מסבת משבצת זהב מפתחת פתוחי חותם על שמות בני ישראל
שמות 39 : 7 (ALEP)
ז וישם אתם על כתפת האפד--אבני זכרון לבני ישראל כאשר צוה יהוה את משה פ
שמות 39 : 8 (ALEP)
ח ויעש את החשן מעשה חשב כמעשה אפד זהב תכלת וארגמן ותולעת שני--ושש משזר
שמות 39 : 9 (ALEP)
ט רבוע היה כפול עשו את החשן--זרת ארכו וזרת רחבו כפול
שמות 39 : 10 (ALEP)
י וימלאו בו--ארבעה טורי אבן טור אדם פטדה וברקת--הטור האחד
שמות 39 : 11 (ALEP)
יא והטור השני--נפך ספיר ויהלם
שמות 39 : 12 (ALEP)
יב והטור השלישי--לשם שבו ואחלמה
שמות 39 : 13 (ALEP)
יג והטור הרביעי--תרשיש שהם וישפה מוסבת משבצת זהב במלאתם
שמות 39 : 14 (ALEP)
יד והאבנים על שמת בני ישראל הנה שתים עשרה--על שמתם פתוחי חתם איש על שמו לשנים עשר שבט
שמות 39 : 15 (ALEP)
טו ויעשו על החשן שרשרת גבלת מעשה עבת זהב טהור
שמות 39 : 16 (ALEP)
טז ויעשו שתי משבצת זהב ושתי טבעת זהב ויתנו את שתי הטבעת על שני קצות החשן
שמות 39 : 17 (ALEP)
יז ויתנו שתי העבתת הזהב על שתי הטבעת--על קצות החשן
שמות 39 : 18 (ALEP)
יח ואת שתי קצות שתי העבתת נתנו על שתי המשבצת ויתנם על כתפת האפד אל מול פניו
שמות 39 : 19 (ALEP)
יט ויעשו שתי טבעת זהב וישימו על שני קצות החשן על שפתו--אשר אל עבר האפד ביתה
שמות 39 : 20 (ALEP)
כ ויעשו שתי טבעת זהב ויתנם על שתי כתפת האפד מלמטה ממול פניו לעמת מחברתו--ממעל לחשב האפד
שמות 39 : 21 (ALEP)
כא וירכסו את החשן מטבעתיו אל טבעת האפד בפתיל תכלת להית על חשב האפד ולא יזח החשן מעל האפד--כאשר צוה יהוה את משה פ
שמות 39 : 22 (ALEP)
כב ויעש את מעיל האפד מעשה ארג כליל תכלת
שמות 39 : 23 (ALEP)
כג ופי המעיל בתוכו כפי תחרא שפה לפיו סביב לא יקרע
שמות 39 : 24 (ALEP)
כד ויעשו על שולי המעיל רמוני תכלת וארגמן ותולעת שני--משזר
שמות 39 : 25 (ALEP)
כה ויעשו פעמני זהב טהור ויתנו את הפעמנים בתוך הרמנים על שולי המעיל סביב--בתוך הרמנים
שמות 39 : 26 (ALEP)
כו פעמן ורמן פעמן ורמן על שולי המעיל סביב לשרת כאשר צוה יהוה את משה ס
שמות 39 : 27 (ALEP)
כז ויעשו את הכתנת שש מעשה ארג לאהרן ולבניו
שמות 39 : 28 (ALEP)
כח ואת המצנפת שש ואת פארי המגבעת שש ואת מכנסי הבד שש משזר
שמות 39 : 29 (ALEP)
כט ואת האבנט שש משזר ותכלת וארגמן ותולעת שני--מעשה רקם כאשר צוה יהוה את משה ס
שמות 39 : 30 (ALEP)
ל ויעשו את ציץ נזר הקדש זהב טהור ויכתבו עליו מכתב פתוחי חותם--קדש ליהוה
שמות 39 : 31 (ALEP)
לא ויתנו עליו פתיל תכלת לתת על המצנפת מלמעלה כאשר צוה יהוה את משה ס
שמות 39 : 32 (ALEP)
לב ותכל--כל עבדת משכן אהל מועד ויעשו בני ישראל--ככל אשר צוה יהוה את משה כן עשו פ
שמות 39 : 33 (ALEP)
לג ויביאו את המשכן אל משה את האהל ואת כל כליו קרסיו קרשיו בריחו ועמדיו ואדניו
שמות 39 : 34 (ALEP)
לד ואת מכסה עורת האילם המאדמים ואת מכסה ערת התחשים ואת פרכת המסך
שמות 39 : 35 (ALEP)
לה את ארון העדת ואת בדיו ואת הכפרת
שמות 39 : 36 (ALEP)
לו את השלחן את כל כליו ואת לחם הפנים
שמות 39 : 37 (ALEP)
לז את המנרה הטהרה את נרתיה נרת המערכה--ואת כל כליה ואת שמן המאור
שמות 39 : 38 (ALEP)
לח ואת מזבח הזהב ואת שמן המשחה ואת קטרת הסמים ואת מסך פתח האהל
שמות 39 : 39 (ALEP)
לט את מזבח הנחשת ואת מכבר הנחשת אשר לו את בדיו ואת כל כליו את הכיר ואת כנו
שמות 39 : 40 (ALEP)
מ את קלעי החצר את עמדיה ואת אדניה ואת המסך לשער החצר את מיתריו ויתדתיה ואת כל כלי עבדת המשכן--לאהל מועד
שמות 39 : 41 (ALEP)
מא את בגדי השרד לשרת בקדש את בגדי הקדש לאהרן הכהן ואת בגדי בניו לכהן
שמות 39 : 42 (ALEP)
מב ככל אשר צוה יהוה את משה כן עשו בני ישראל את כל העבדה
שמות 39 : 43 (ALEP)
מג וירא משה את כל המלאכה והנה עשו אתה--כאשר צוה יהוה כן עשו ויברך אתם משה פ
❮
❯