שמות 36 : 1 (ALEP)
א ועשה בצלאל ואהליאב וכל איש חכם לב אשר נתן יהוה חכמה ותבונה בהמה לדעת לעשת את כל מלאכת עבדת הקדש--לכל אשר צוה יהוה
שמות 36 : 2 (ALEP)
ב ויקרא משה אל בצלאל ואל אהליאב ואל כל איש חכם לב אשר נתן יהוה חכמה בלבו--כל אשר נשאו לבו לקרבה אל המלאכה לעשת אתה
שמות 36 : 3 (ALEP)
ג ויקחו מלפני משה את כל התרומה אשר הביאו בני ישראל למלאכת עבדת הקדש--לעשת אתה והם הביאו אליו עוד נדבה--בבקר בבקר
שמות 36 : 4 (ALEP)
ד ויבאו כל החכמים העשים את כל מלאכת הקדש--איש איש ממלאכתו אשר המה עשים
שמות 36 : 5 (ALEP)
ה ויאמרו אל משה לאמר מרבים העם להביא מדי העבדה למלאכה אשר צוה יהוה לעשת אתה
שמות 36 : 6 (ALEP)
ו ויצו משה ויעבירו קול במחנה לאמר איש ואשה אל יעשו עוד מלאכה לתרומת הקדש ויכלא העם מהביא
שמות 36 : 7 (ALEP)
ז והמלאכה היתה דים לכל המלאכה--לעשות אתה והותר ס
שמות 36 : 8 (ALEP)
ח ויעשו כל חכם לב בעשי המלאכה את המשכן--עשר יריעת שש משזר ותכלת וארגמן ותולעת שני--כרבים מעשה חשב עשה אתם
שמות 36 : 9 (ALEP)
ט ארך היריעה האחת שמנה ועשרים באמה ורחב ארבע באמה היריעה האחת מדה אחת לכל היריעת
שמות 36 : 10 (ALEP)
י ויחבר את חמש היריעת אחת אל אחת וחמש יריעת חבר אחת אל אחת
שמות 36 : 11 (ALEP)
יא ויעש ללאת תכלת על שפת היריעה האחת מקצה במחברת כן עשה בשפת היריעה הקיצונה במחברת השנית
שמות 36 : 12 (ALEP)
יב חמשים ללאת עשה ביריעה האחת וחמשים ללאת עשה בקצה היריעה אשר במחברת השנית מקבילת הללאת--אחת אל אחת
שמות 36 : 13 (ALEP)
יג ויעש חמשים קרסי זהב ויחבר את היריעת אחת אל אחת בקרסים ויהי המשכן אחד פ
שמות 36 : 14 (ALEP)
יד ויעש יריעת עזים לאהל על המשכן עשתי עשרה יריעת עשה אתם
שמות 36 : 15 (ALEP)
טו ארך היריעה האחת שלשים באמה וארבע אמות רחב היריעה האחת מדה אחת לעשתי עשרה יריעת
שמות 36 : 16 (ALEP)
טז ויחבר את חמש היריעת לבד ואת שש היריעת לבד
שמות 36 : 17 (ALEP)
יז ויעש ללאת חמשים על שפת היריעה הקיצנה במחברת וחמשים ללאת עשה על שפת היריעה החברת השנית
שמות 36 : 18 (ALEP)
יח ויעש קרסי נחשת חמשים לחבר את האהל להית אחד
שמות 36 : 19 (ALEP)
יט ויעש מכסה לאהל ערת אילם מאדמים ומכסה ערת תחשים מלמעלה ס
שמות 36 : 20 (ALEP)
כ ויעש את הקרשים למשכן עצי שטים עמדים
שמות 36 : 21 (ALEP)
כא עשר אמת ארך הקרש ואמה וחצי האמה רחב הקרש האחד
שמות 36 : 22 (ALEP)
כב שתי ידת לקרש האחד משלבת אחת אל אחת כן עשה לכל קרשי המשכן
שמות 36 : 23 (ALEP)
כג ויעש את הקרשים למשכן עשרים קרשים לפאת נגב תימנה
שמות 36 : 24 (ALEP)
כד וארבעים אדני כסף--עשה תחת עשרים הקרשים שני אדנים תחת הקרש האחד לשתי ידתיו ושני אדנים תחת הקרש האחד לשתי ידתיו
שמות 36 : 25 (ALEP)
כה ולצלע המשכן השנית לפאת צפון עשה עשרים קרשים
שמות 36 : 26 (ALEP)
כו וארבעים אדניהם כסף--שני אדנים תחת הקרש האחד ושני אדנים תחת הקרש האחד
שמות 36 : 27 (ALEP)
כז ולירכתי המשכן ימה עשה ששה קרשים
שמות 36 : 28 (ALEP)
כח ושני קרשים עשה למקצעת המשכן--בירכתים
שמות 36 : 29 (ALEP)
כט והיו תואמם מלמטה ויחדו יהיו תמים אל ראשו אל הטבעת האחת כן עשה לשניהם לשני המקצעת
שמות 36 : 30 (ALEP)
ל והיו שמנה קרשים ואדניהם כסף ששה עשר אדנים--שני אדנים שני אדנים תחת הקרש האחד
שמות 36 : 31 (ALEP)
לא ויעש בריחי עצי שטים--חמשה לקרשי צלע המשכן האחת
שמות 36 : 32 (ALEP)
לב וחמשה בריחם לקרשי צלע המשכן השנית וחמשה בריחם לקרשי המשכן לירכתים ימה
שמות 36 : 33 (ALEP)
לג ויעש את הבריח התיכן לברח בתוך הקרשים מן הקצה אל הקצה
שמות 36 : 34 (ALEP)
לד ואת הקרשים צפה זהב ואת טבעתם עשה זהב--בתים לבריחם ויצף את הבריחם זהב
שמות 36 : 35 (ALEP)
לה ויעש את הפרכת תכלת וארגמן ותולעת שני ושש משזר מעשה חשב עשה אתה כרבים
שמות 36 : 36 (ALEP)
לו ויעש לה ארבעה עמודי שטים ויצפם זהב וויהם זהב ויצק להם ארבעה אדני כסף
שמות 36 : 37 (ALEP)
לז ויעש מסך לפתח האהל תכלת וארגמן ותולעת שני ושש משזר מעשה רקם
שמות 36 : 38 (ALEP)
לח ואת עמודיו חמשה ואת וויהם וצפה ראשיהם וחשקיהם זהב ואדניהם חמשה נחשת פ
❮
❯