שמות 32 : 1 (ALEP)
א וירא העם כי בשש משה לרדת מן ההר ויקהל העם על אהרן ויאמרו אליו קום עשה לנו אלהים אשר ילכו לפנינו--כי זה משה האיש אשר העלנו מארץ מצרים לא ידענו מה היה לו
שמות 32 : 2 (ALEP)
ב ויאמר אלהם אהרן פרקו נזמי הזהב אשר באזני נשיכם בניכם ובנתיכם והביאו אלי
שמות 32 : 3 (ALEP)
ג ויתפרקו כל העם את נזמי הזהב אשר באזניהם ויביאו אל אהרן
שמות 32 : 4 (ALEP)
ד ויקח מידם ויצר אתו בחרט ויעשהו עגל מסכה ויאמרו--אלה אלהיך ישראל אשר העלוך מארץ מצרים
שמות 32 : 5 (ALEP)
ה וירא אהרן ויבן מזבח לפניו ויקרא אהרן ויאמר חג ליהוה מחר
שמות 32 : 6 (ALEP)
ו וישכימו ממחרת ויעלו עלת ויגשו שלמים וישב העם לאכל ושתו ויקמו לצחק {פ}
שמות 32 : 7 (ALEP)
ז וידבר יהוה אל משה לך רד--כי שחת עמך אשר העלית מארץ מצרים
שמות 32 : 8 (ALEP)
ח סרו מהר מן הדרך אשר צויתם--עשו להם עגל מסכה וישתחוו לו ויזבחו לו ויאמרו אלה אלהיך ישראל אשר העלוך מארץ מצרים
שמות 32 : 9 (ALEP)
ט ויאמר יהוה אל משה ראיתי את העם הזה והנה עם קשה ערף הוא
שמות 32 : 10 (ALEP)
י ועתה הניחה לי ויחר אפי בהם ואכלם ואעשה אותך לגוי גדול
שמות 32 : 11 (ALEP)
יא ויחל משה את פני יהוה אלהיו ויאמר למה יהוה יחרה אפך בעמך אשר הוצאת מארץ מצרים בכח גדול וביד חזקה
שמות 32 : 12 (ALEP)
יב למה יאמרו מצרים לאמר ברעה הוציאם להרג אתם בהרים ולכלתם מעל פני האדמה שוב מחרון אפך והנחם על הרעה לעמך
שמות 32 : 13 (ALEP)
יג זכר לאברהם ליצחק ולישראל עבדיך אשר נשבעת להם בך ותדבר אלהם ארבה את זרעכם ככוכבי השמים וכל הארץ הזאת אשר אמרתי אתן לזרעכם ונחלו לעלם
שמות 32 : 14 (ALEP)
יד וינחם יהוה על הרעה אשר דבר לעשות לעמו {פ}
שמות 32 : 15 (ALEP)
טו ויפן וירד משה מן ההר ושני לחת העדת בידו לחת כתבים משני עבריהם--מזה ומזה הם כתבים
שמות 32 : 16 (ALEP)
טז והלחת--מעשה אלהים המה והמכתב מכתב אלהים הוא--חרות על הלחת
שמות 32 : 17 (ALEP)
יז וישמע יהושע את קול העם ברעה ויאמר אל משה קול מלחמה במחנה
שמות 32 : 18 (ALEP)
יח ויאמר אין קול ענות גבורה ואין קול ענות חלושה קול ענות אנכי שמע
שמות 32 : 19 (ALEP)
יט ויהי כאשר קרב אל המחנה וירא את העגל ומחלת ויחר אף משה וישלך מידו את הלחת וישבר אתם תחת ההר
שמות 32 : 20 (ALEP)
כ ויקח את העגל אשר עשו וישרף באש ויטחן עד אשר דק ויזר על פני המים וישק את בני ישראל
שמות 32 : 21 (ALEP)
כא ויאמר משה אל אהרן מה עשה לך העם הזה כי הבאת עליו חטאה גדלה
שמות 32 : 22 (ALEP)
כב ויאמר אהרן אל יחר אף אדני אתה ידעת את העם כי ברע הוא
שמות 32 : 23 (ALEP)
כג ויאמרו לי--עשה לנו אלהים אשר ילכו לפנינו כי זה משה האיש אשר העלנו מארץ מצרים--לא ידענו מה היה לו
שמות 32 : 24 (ALEP)
כד ואמר להם למי זהב התפרקו ויתנו לי ואשלכהו באש ויצא העגל הזה
שמות 32 : 25 (ALEP)
כה וירא משה את העם כי פרע הוא כי פרעה אהרן לשמצה בקמיהם
שמות 32 : 26 (ALEP)
כו ויעמד משה בשער המחנה ויאמר מי ליהוה אלי ויאספו אליו כל בני לוי
שמות 32 : 27 (ALEP)
כז ויאמר להם כה אמר יהוה אלהי ישראל שימו איש חרבו על ירכו עברו ושובו משער לשער במחנה והרגו איש את אחיו ואיש את רעהו ואיש את קרבו
שמות 32 : 28 (ALEP)
כח ויעשו בני לוי כדבר משה ויפל מן העם ביום ההוא כשלשת אלפי איש
שמות 32 : 29 (ALEP)
כט ויאמר משה מלאו ידכם היום ליהוה כי איש בבנו ובאחיו--ולתת עליכם היום ברכה
שמות 32 : 30 (ALEP)
ל ויהי ממחרת ויאמר משה אל העם אתם חטאתם חטאה גדלה ועתה אעלה אל יהוה אולי אכפרה בעד חטאתכם
שמות 32 : 31 (ALEP)
לא וישב משה אל יהוה ויאמר אנא חטא העם הזה חטאה גדלה ויעשו להם אלהי זהב
שמות 32 : 32 (ALEP)
לב ועתה אם תשא חטאתם ואם אין--מחני נא מספרך אשר כתבת
שמות 32 : 33 (ALEP)
לג ויאמר יהוה אל משה מי אשר חטא לי אמחנו מספרי
שמות 32 : 34 (ALEP)
לד ועתה לך נחה את העם אל אשר דברתי לך--הנה מלאכי ילך לפניך וביום פקדי ופקדתי עלהם חטאתם
שמות 32 : 35 (ALEP)
לה ויגף יהוה את העם על אשר עשו את העגל אשר עשה אהרן {ס}
❮
❯