שמות 3 : 1 (ALEP)
א ומשה היה רעה את צאן יתרו חתנו--כהן מדין וינהג את הצאן אחר המדבר ויבא אל הר האלהים חרבה
שמות 3 : 2 (ALEP)
ב וירא מלאך יהוה אליו בלבת אש--מתוך הסנה וירא והנה הסנה בער באש והסנה איננו אכל
שמות 3 : 3 (ALEP)
ג ויאמר משה--אסרה נא ואראה את המראה הגדל הזה מדוע לא יבער הסנה
שמות 3 : 4 (ALEP)
ד וירא יהוה כי סר לראות ויקרא אליו אלהים מתוך הסנה ויאמר משה משה--ויאמר הנני
שמות 3 : 5 (ALEP)
ה ויאמר אל תקרב הלם של נעליך מעל רגליך--כי המקום אשר אתה עומד עליו אדמת קדש הוא
שמות 3 : 6 (ALEP)
ו ויאמר אנכי אלהי אביך אלהי אברהם אלהי יצחק ואלהי יעקב ויסתר משה פניו כי ירא מהביט אל האלהים
שמות 3 : 7 (ALEP)
ז ויאמר יהוה ראה ראיתי את עני עמי אשר במצרים ואת צעקתם שמעתי מפני נגשיו כי ידעתי את מכאביו
שמות 3 : 8 (ALEP)
ח וארד להצילו מיד מצרים ולהעלתו מן הארץ ההוא אל ארץ טובה ורחבה אל ארץ זבת חלב ודבש--אל מקום הכנעני והחתי והאמרי והפרזי והחוי והיבוסי
שמות 3 : 9 (ALEP)
ט ועתה הנה צעקת בני ישראל באה אלי וגם ראיתי את הלחץ אשר מצרים לחצים אתם
שמות 3 : 10 (ALEP)
י ועתה לכה ואשלחך אל פרעה והוצא את עמי בני ישראל ממצרים
שמות 3 : 11 (ALEP)
יא ויאמר משה אל האלהים מי אנכי כי אלך אל פרעה וכי אוציא את בני ישראל ממצרים
שמות 3 : 12 (ALEP)
יב ויאמר כי אהיה עמך וזה לך האות כי אנכי שלחתיך בהוציאך את העם ממצרים תעבדון את האלהים על ההר הזה
שמות 3 : 13 (ALEP)
יג ויאמר משה אל האלהים הנה אנכי בא אל בני ישראל ואמרתי להם אלהי אבותיכם שלחני אליכם ואמרו לי מה שמו מה אמר אלהם
שמות 3 : 14 (ALEP)
יד ויאמר אלהים אל משה אהיה אשר אהיה ויאמר כה תאמר לבני ישראל אהיה שלחני אליכם
שמות 3 : 15 (ALEP)
טו ויאמר עוד אלהים אל משה כה תאמר אל בני ישראל יהוה אלהי אבתיכם אלהי אברהם אלהי יצחק ואלהי יעקב שלחני אליכם זה שמי לעלם וזה זכרי לדר דר
שמות 3 : 16 (ALEP)
טז לך ואספת את זקני ישראל ואמרת אלהם יהוה אלהי אבתיכם נראה אלי אלהי אברהם יצחק ויעקב לאמר פקד פקדתי אתכם ואת העשוי לכם במצרים
שמות 3 : 17 (ALEP)
יז ואמר אעלה אתכם מעני מצרים אל ארץ הכנעני והחתי והאמרי והפרזי והחוי והיבוסי--אל ארץ זבת חלב ודבש
שמות 3 : 18 (ALEP)
יח ושמעו לקלך ובאת אתה וזקני ישראל אל מלך מצרים ואמרתם אליו יהוה אלהי העבריים נקרה עלינו ועתה נלכה נא דרך שלשת ימים במדבר ונזבחה ליהוה אלהינו
שמות 3 : 19 (ALEP)
יט ואני ידעתי--כי לא יתן אתכם מלך מצרים להלך ולא ביד חזקה
שמות 3 : 20 (ALEP)
כ ושלחתי את ידי והכיתי את מצרים בכל נפלאתי אשר אעשה בקרבו ואחרי כן ישלח אתכם
שמות 3 : 21 (ALEP)
כא ונתתי את חן העם הזה בעיני מצרים והיה כי תלכון לא תלכו ריקם
שמות 3 : 22 (ALEP)
כב ושאלה אשה משכנתה ומגרת ביתה כלי כסף וכלי זהב ושמלת ושמתם על בניכם ועל בנתיכם ונצלתם את מצרים
❮
❯