שמות 29 : 1 (ALEP)
א וזה הדבר אשר תעשה להם לקדש אתם--לכהן לי לקח פר אחד בן בקר ואילם שנים--תמימם
שמות 29 : 2 (ALEP)
ב ולחם מצות וחלת מצת בלולת בשמן ורקיקי מצות משחים בשמן סלת חטים תעשה אתם
שמות 29 : 3 (ALEP)
ג ונתת אותם על סל אחד והקרבת אתם בסל ואת הפר--ואת שני האילם
שמות 29 : 4 (ALEP)
ד ואת אהרן ואת בניו תקריב אל פתח אהל מועד ורחצת אתם במים
שמות 29 : 5 (ALEP)
ה ולקחת את הבגדים והלבשת את אהרן את הכתנת ואת מעיל האפד ואת האפד ואת החשן ואפדת לו בחשב האפד
שמות 29 : 6 (ALEP)
ו ושמת המצנפת על ראשו ונתת את נזר הקדש על המצנפת
שמות 29 : 7 (ALEP)
ז ולקחת את שמן המשחה ויצקת על ראשו ומשחת אתו
שמות 29 : 8 (ALEP)
ח ואת בניו תקריב והלבשתם כתנת
שמות 29 : 9 (ALEP)
ט וחגרת אתם אבנט אהרן ובניו וחבשת להם מגבעת והיתה להם כהנה לחקת עולם ומלאת יד אהרן ויד בניו
שמות 29 : 10 (ALEP)
י והקרבת את הפר לפני אהל מועד וסמך אהרן ובניו את ידיהם על ראש הפר
שמות 29 : 11 (ALEP)
יא ושחטת את הפר לפני יהוה פתח אהל מועד
שמות 29 : 12 (ALEP)
יב ולקחת מדם הפר ונתתה על קרנת המזבח באצבעך ואת כל הדם תשפך אל יסוד המזבח
שמות 29 : 13 (ALEP)
יג ולקחת את כל החלב המכסה את הקרב ואת היתרת על הכבד ואת שתי הכלית ואת החלב אשר עליהן והקטרת המזבחה
שמות 29 : 14 (ALEP)
יד ואת בשר הפר ואת ערו ואת פרשו תשרף באש מחוץ למחנה חטאת הוא
שמות 29 : 15 (ALEP)
טו ואת האיל האחד תקח וסמכו אהרן ובניו את ידיהם--על ראש האיל
שמות 29 : 16 (ALEP)
טז ושחטת את האיל ולקחת את דמו וזרקת על המזבח סביב
שמות 29 : 17 (ALEP)
יז ואת האיל--תנתח לנתחיו ורחצת קרבו וכרעיו ונתת על נתחיו ועל ראשו
שמות 29 : 18 (ALEP)
יח והקטרת את כל האיל המזבחה עלה הוא ליהוה ריח ניחוח אשה ליהוה הוא
שמות 29 : 19 (ALEP)
יט ולקחת את האיל השני וסמך אהרן ובניו את ידיהם על ראש האיל
שמות 29 : 20 (ALEP)
כ ושחטת את האיל ולקחת מדמו ונתתה על תנוך אזן אהרן ועל תנוך אזן בניו הימנית ועל בהן ידם הימנית ועל בהן רגלם הימנית וזרקת את הדם על המזבח סביב
שמות 29 : 21 (ALEP)
כא ולקחת מן הדם אשר על המזבח ומשמן המשחה והזית על אהרן ועל בגדיו ועל בניו ועל בגדי בניו אתו וקדש הוא ובגדיו ובניו ובגדי בניו אתו
שמות 29 : 22 (ALEP)
כב ולקחת מן האיל החלב והאליה ואת החלב המכסה את הקרב ואת יתרת הכבד ואת שתי הכלית ואת החלב אשר עליהן ואת שוק הימין כי איל מלאים הוא
שמות 29 : 23 (ALEP)
כג וככר לחם אחת וחלת לחם שמן אחת--ורקיק אחד מסל המצות אשר לפני יהוה
שמות 29 : 24 (ALEP)
כד ושמת הכל--על כפי אהרן ועל כפי בניו והנפת אתם תנופה לפני יהוה
שמות 29 : 25 (ALEP)
כה ולקחת אתם מידם והקטרת המזבחה על העלה לריח ניחוח לפני יהוה אשה הוא ליהוה
שמות 29 : 26 (ALEP)
כו ולקחת את החזה מאיל המלאים אשר לאהרן והנפת אתו תנופה לפני יהוה והיה לך למנה
שמות 29 : 27 (ALEP)
כז וקדשת את חזה התנופה ואת שוק התרומה אשר הונף ואשר הורם מאיל המלאים--מאשר לאהרן ומאשר לבניו
שמות 29 : 28 (ALEP)
כח והיה לאהרן ולבניו לחק עולם מאת בני ישראל כי תרומה הוא ותרומה יהיה מאת בני ישראל מזבחי שלמיהם--תרומתם ליהוה
שמות 29 : 29 (ALEP)
כט ובגדי הקדש אשר לאהרן יהיו לבניו אחריו למשחה בהם ולמלא בם את ידם
שמות 29 : 30 (ALEP)
ל שבעת ימים ילבשם הכהן תחתיו--מבניו אשר יבא אל אהל מועד לשרת בקדש
שמות 29 : 31 (ALEP)
לא ואת איל המלאים תקח ובשלת את בשרו במקם קדש
שמות 29 : 32 (ALEP)
לב ואכל אהרן ובניו את בשר האיל ואת הלחם אשר בסל פתח אהל מועד
שמות 29 : 33 (ALEP)
לג ואכלו אתם אשר כפר בהם למלא את ידם לקדש אתם וזר לא יאכל כי קדש הם
שמות 29 : 34 (ALEP)
לד ואם יותר מבשר המלאים ומן הלחם--עד הבקר ושרפת את הנותר באש לא יאכל כי קדש הוא
שמות 29 : 35 (ALEP)
לה ועשית לאהרן ולבניו ככה ככל אשר צויתי אתכה שבעת ימים תמלא ידם
שמות 29 : 36 (ALEP)
לו ופר חטאת תעשה ליום על הכפרים וחטאת על המזבח בכפרך עליו ומשחת אתו לקדשו
שמות 29 : 37 (ALEP)
לז שבעת ימים תכפר על המזבח וקדשת אתו והיה המזבח קדש קדשים כל הנגע במזבח יקדש ס
שמות 29 : 38 (ALEP)
לח וזה אשר תעשה על המזבח כבשים בני שנה שנים ליום תמיד
שמות 29 : 39 (ALEP)
לט את הכבש האחד תעשה בבקר ואת הכבש השני תעשה בין הערבים
שמות 29 : 40 (ALEP)
מ ועשרן סלת בלול בשמן כתית רבע ההין ונסך רביעת ההין יין--לכבש האחד
שמות 29 : 41 (ALEP)
מא ואת הכבש השני תעשה בין הערבים כמנחת הבקר וכנסכה תעשה לה לריח ניחח אשה ליהוה
שמות 29 : 42 (ALEP)
מב עלת תמיד לדרתיכם פתח אהל מועד לפני יהוה אשר אועד לכם שמה לדבר אליך שם
שמות 29 : 43 (ALEP)
מג ונעדתי שמה לבני ישראל ונקדש בכבדי
שמות 29 : 44 (ALEP)
מד וקדשתי את אהל מועד ואת המזבח ואת אהרן ואת בניו אקדש לכהן לי
שמות 29 : 45 (ALEP)
מה ושכנתי בתוך בני ישראל והייתי להם לאלהים
שמות 29 : 46 (ALEP)
מו וידעו כי אני יהוה אלהיהם אשר הוצאתי אתם מארץ מצרים לשכני בתוכם אני יהוה אלהיהם פ
❮
❯