שמות 2 : 1 (ALEP)
א וילך איש מבית לוי ויקח את בת לוי
שמות 2 : 2 (ALEP)
ב ותהר האשה ותלד בן ותרא אתו כי טוב הוא ותצפנהו שלשה ירחים
שמות 2 : 3 (ALEP)
ג ולא יכלה עוד הצפינו ותקח לו תבת גמא ותחמרה בחמר ובזפת ותשם בה את הילד ותשם בסוף על שפת היאר
שמות 2 : 4 (ALEP)
ד ותתצב אחתו מרחק לדעה מה יעשה לו
שמות 2 : 5 (ALEP)
ה ותרד בת פרעה לרחץ על היאר ונערתיה הלכת על יד היאר ותרא את התבה בתוך הסוף ותשלח את אמתה ותקחה
שמות 2 : 6 (ALEP)
ו ותפתח ותראהו את הילד והנה נער בכה ותחמל עליו--ותאמר מילדי העברים זה
שמות 2 : 7 (ALEP)
ז ותאמר אחתו אל בת פרעה האלך וקראתי לך אשה מינקת מן העברית ותינק לך את הילד
שמות 2 : 8 (ALEP)
ח ותאמר לה בת פרעה לכי ותלך העלמה ותקרא את אם הילד
שמות 2 : 9 (ALEP)
ט ותאמר לה בת פרעה היליכי את הילד הזה והינקהו לי ואני אתן את שכרך ותקח האשה הילד ותניקהו
שמות 2 : 10 (ALEP)
י ויגדל הילד ותבאהו לבת פרעה ויהי לה לבן ותקרא שמו משה ותאמר כי מן המים משיתהו
שמות 2 : 11 (ALEP)
יא ויהי בימים ההם ויגדל משה ויצא אל אחיו וירא בסבלתם וירא איש מצרי מכה איש עברי מאחיו
שמות 2 : 12 (ALEP)
יב ויפן כה וכה וירא כי אין איש ויך את המצרי ויטמנהו בחול
שמות 2 : 13 (ALEP)
יג ויצא ביום השני והנה שני אנשים עברים נצים ויאמר לרשע למה תכה רעך
שמות 2 : 14 (ALEP)
יד ויאמר מי שמך לאיש שר ושפט עלינו--הלהרגני אתה אמר כאשר הרגת את המצרי ויירא משה ויאמר אכן נודע הדבר
שמות 2 : 15 (ALEP)
טו וישמע פרעה את הדבר הזה ויבקש להרג את משה ויברח משה מפני פרעה וישב בארץ מדין וישב על הבאר
שמות 2 : 16 (ALEP)
טז ולכהן מדין שבע בנות ותבאנה ותדלנה ותמלאנה את הרהטים להשקות צאן אביהן
שמות 2 : 17 (ALEP)
יז ויבאו הרעים ויגרשום ויקם משה ויושען וישק את צאנם
שמות 2 : 18 (ALEP)
יח ותבאנה אל רעואל אביהן ויאמר מדוע מהרתן בא היום
שמות 2 : 19 (ALEP)
יט ותאמרן--איש מצרי הצילנו מיד הרעים וגם דלה דלה לנו וישק את הצאן
שמות 2 : 20 (ALEP)
כ ויאמר אל בנתיו ואיו למה זה עזבתן את האיש קראן לו ויאכל לחם
שמות 2 : 21 (ALEP)
כא ויואל משה לשבת את האיש ויתן את צפרה בתו למשה
שמות 2 : 22 (ALEP)
כב ותלד בן ויקרא את שמו גרשם כי אמר--גר הייתי בארץ נכריה {פ}
שמות 2 : 23 (ALEP)
כג ויהי בימים הרבים ההם וימת מלך מצרים ויאנחו בני ישראל מן העבדה ויזעקו ותעל שועתם אל האלהים מן העבדה
שמות 2 : 24 (ALEP)
כד וישמע אלהים את נאקתם ויזכר אלהים את בריתו את אברהם את יצחק ואת יעקב
שמות 2 : 25 (ALEP)
כה וירא אלהים את בני ישראל וידע אלהים {ס}
❮
❯