שמות 16 : 1 (ALEP)
א ויסעו מאילם ויבאו כל עדת בני ישראל אל מדבר סין אשר בין אילם ובין סיני--בחמשה עשר יום לחדש השני לצאתם מארץ מצרים
שמות 16 : 2 (ALEP)
ב וילינו (וילונו) כל עדת בני ישראל על משה ועל אהרן--במדבר
שמות 16 : 3 (ALEP)
ג ויאמרו אלהם בני ישראל מי יתן מותנו ביד יהוה בארץ מצרים בשבתנו על סיר הבשר באכלנו לחם לשבע כי הוצאתם אתנו אל המדבר הזה להמית את כל הקהל הזה ברעב {ס}
שמות 16 : 4 (ALEP)
ד ויאמר יהוה אל משה הנני ממטיר לכם לחם מן השמים ויצא העם ולקטו דבר יום ביומו למען אנסנו הילך בתורתי אם לא
שמות 16 : 5 (ALEP)
ה והיה ביום הששי והכינו את אשר יביאו והיה משנה על אשר ילקטו יום יום
שמות 16 : 6 (ALEP)
ו ויאמר משה ואהרן אל כל בני ישראל ערב--וידעתם כי יהוה הוציא אתכם מארץ מצרים
שמות 16 : 7 (ALEP)
ז ובקר וראיתם את כבוד יהוה בשמעו את תלנתיכם על יהוה ונחנו מה כי תלונו (תלינו) עלינו
שמות 16 : 8 (ALEP)
ח ויאמר משה בתת יהוה לכם בערב בשר לאכל ולחם בבקר לשבע בשמע יהוה את תלנתיכם אשר אתם מלינם עליו ונחנו מה לא עלינו תלנתיכם כי על יהוה
שמות 16 : 9 (ALEP)
ט ויאמר משה אל אהרן אמר אל כל עדת בני ישראל קרבו לפני יהוה כי שמע את תלנתיכם
שמות 16 : 10 (ALEP)
י ויהי כדבר אהרן אל כל עדת בני ישראל ויפנו אל המדבר והנה כבוד יהוה נראה בענן {פ}
שמות 16 : 11 (ALEP)
יא וידבר יהוה אל משה לאמר
שמות 16 : 12 (ALEP)
יב שמעתי את תלונת בני ישראל--דבר אלהם לאמר בין הערבים תאכלו בשר ובבקר תשבעו לחם וידעתם כי אני יהוה אלהיכם
שמות 16 : 13 (ALEP)
יג ויהי בערב--ותעל השלו ותכס את המחנה ובבקר היתה שכבת הטל סביב למחנה
שמות 16 : 14 (ALEP)
יד ותעל שכבת הטל והנה על פני המדבר דק מחספס--דק ככפר על הארץ
שמות 16 : 15 (ALEP)
טו ויראו בני ישראל ויאמרו איש אל אחיו מן הוא--כי לא ידעו מה הוא ויאמר משה אלהם הוא הלחם אשר נתן יהוה לכם לאכלה
שמות 16 : 16 (ALEP)
טז זה הדבר אשר צוה יהוה לקטו ממנו איש לפי אכלו עמר לגלגלת מספר נפשתיכם--איש לאשר באהלו תקחו
שמות 16 : 17 (ALEP)
יז ויעשו כן בני ישראל וילקטו המרבה והממעיט
שמות 16 : 18 (ALEP)
יח וימדו בעמר--ולא העדיף המרבה והממעיט לא החסיר איש לפי אכלו לקטו
שמות 16 : 19 (ALEP)
יט ויאמר משה אלהם איש אל יותר ממנו עד בקר
שמות 16 : 20 (ALEP)
כ ולא שמעו אל משה ויותרו אנשים ממנו עד בקר וירם תולעים ויבאש ויקצף עלהם משה
שמות 16 : 21 (ALEP)
כא וילקטו אתו בבקר בבקר איש כפי אכלו וחם השמש ונמס
שמות 16 : 22 (ALEP)
כב ויהי ביום הששי לקטו לחם משנה--שני העמר לאחד ויבאו כל נשיאי העדה ויגידו למשה
שמות 16 : 23 (ALEP)
כג ויאמר אלהם הוא אשר דבר יהוה--שבתון שבת קדש ליהוה מחר את אשר תאפו אפו ואת אשר תבשלו בשלו ואת כל העדף הניחו לכם למשמרת עד הבקר
שמות 16 : 24 (ALEP)
כד ויניחו אתו עד הבקר כאשר צוה משה ולא הבאיש ורמה לא היתה בו
שמות 16 : 25 (ALEP)
כה ויאמר משה אכלהו היום כי שבת היום ליהוה היום לא תמצאהו בשדה
שמות 16 : 26 (ALEP)
כו ששת ימים תלקטהו וביום השביעי שבת לא יהיה בו
שמות 16 : 27 (ALEP)
כז ויהי ביום השביעי יצאו מן העם ללקט ולא מצאו {ס}
שמות 16 : 28 (ALEP)
כח ויאמר יהוה אל משה עד אנה מאנתם לשמר מצותי ותורתי
שמות 16 : 29 (ALEP)
כט ראו כי יהוה נתן לכם השבת--על כן הוא נתן לכם ביום הששי לחם יומים שבו איש תחתיו אל יצא איש ממקמו--ביום השביעי
שמות 16 : 30 (ALEP)
ל וישבתו העם ביום השבעי
שמות 16 : 31 (ALEP)
לא ויקראו בית ישראל את שמו מן והוא כזרע גד לבן וטעמו כצפיחת בדבש
שמות 16 : 32 (ALEP)
לב ויאמר משה זה הדבר אשר צוה יהוה--מלא העמר ממנו למשמרת לדרתיכם למען יראו את הלחם אשר האכלתי אתכם במדבר בהוציאי אתכם מארץ מצרים
שמות 16 : 33 (ALEP)
לג ויאמר משה אל אהרן קח צנצנת אחת ותן שמה מלא העמר מן והנח אתו לפני יהוה למשמרת לדרתיכם
שמות 16 : 34 (ALEP)
לד כאשר צוה יהוה אל משה ויניחהו אהרן לפני העדת למשמרת
שמות 16 : 35 (ALEP)
לה ובני ישראל אכלו את המן ארבעים שנה--עד באם אל ארץ נושבת את המן אכלו--עד באם אל קצה ארץ כנען
שמות 16 : 36 (ALEP)
לו והעמר עשרית האיפה הוא {פ}
❮
❯