שמות 10 : 1 (ALEP)
א ויאמר יהוה אל משה בא אל פרעה כי אני הכבדתי את לבו ואת לב עבדיו למען שתי אתתי אלה בקרבו
שמות 10 : 2 (ALEP)
ב ולמען תספר באזני בנך ובן בנך את אשר התעללתי במצרים ואת אתתי אשר שמתי בם וידעתם כי אני יהוה
שמות 10 : 3 (ALEP)
ג ויבא משה ואהרן אל פרעה ויאמרו אליו כה אמר יהוה אלהי העברים עד מתי מאנת לענת מפני שלח עמי ויעבדני
שמות 10 : 4 (ALEP)
ד כי אם מאן אתה לשלח את עמי--הנני מביא מחר ארבה בגבלך
שמות 10 : 5 (ALEP)
ה וכסה את עין הארץ ולא יוכל לראת את הארץ ואכל את יתר הפלטה הנשארת לכם מן הברד ואכל את כל העץ הצמח לכם מן השדה
שמות 10 : 6 (ALEP)
ו ומלאו בתיך ובתי כל עבדיך ובתי כל מצרים אשר לא ראו אבתיך ואבות אבתיך מיום היותם על האדמה עד היום הזה ויפן ויצא מעם פרעה
שמות 10 : 7 (ALEP)
ז ויאמרו עבדי פרעה אליו עד מתי יהיה זה לנו למוקש--שלח את האנשים ויעבדו את יהוה אלהיהם הטרם תדע כי אבדה מצרים
שמות 10 : 8 (ALEP)
ח ויושב את משה ואת אהרן אל פרעה ויאמר אלהם לכו עבדו את יהוה אלהיכם מי ומי ההלכים
שמות 10 : 9 (ALEP)
ט ויאמר משה בנערינו ובזקנינו נלך בבנינו ובבנותנו בצאננו ובבקרנו נלך--כי חג יהוה לנו
שמות 10 : 10 (ALEP)
י ויאמר אלהם יהי כן יהוה עמכם כאשר אשלח אתכם ואת טפכם ראו כי רעה נגד פניכם
שמות 10 : 11 (ALEP)
יא לא כן לכו נא הגברים ועבדו את יהוה--כי אתה אתם מבקשים ויגרש אתם מאת פני פרעה ס
שמות 10 : 12 (ALEP)
יב ויאמר יהוה אל משה נטה ידך על ארץ מצרים בארבה ויעל על ארץ מצרים ויאכל את כל עשב הארץ את כל אשר השאיר הברד
שמות 10 : 13 (ALEP)
יג ויט משה את מטהו על ארץ מצרים ויהוה נהג רוח קדים בארץ כל היום ההוא וכל הלילה הבקר היה--ורוח הקדים נשא את הארבה
שמות 10 : 14 (ALEP)
יד ויעל הארבה על כל ארץ מצרים וינח בכל גבול מצרים כבד מאד--לפניו לא היה כן ארבה כמהו ואחריו לא יהיה כן
שמות 10 : 15 (ALEP)
טו ויכס את עין כל הארץ ותחשך הארץ ויאכל את כל עשב הארץ ואת כל פרי העץ אשר הותיר הברד ולא נותר כל ירק בעץ ובעשב השדה בכל ארץ מצרים
שמות 10 : 16 (ALEP)
טז וימהר פרעה לקרא למשה ולאהרן ויאמר חטאתי ליהוה אלהיכם--ולכם
שמות 10 : 17 (ALEP)
יז ועתה שא נא חטאתי אך הפעם והעתירו ליהוה אלהיכם ויסר מעלי רק את המות הזה
שמות 10 : 18 (ALEP)
יח ויצא מעם פרעה ויעתר אל יהוה
שמות 10 : 19 (ALEP)
יט ויהפך יהוה רוח ים חזק מאד וישא את הארבה ויתקעהו ימה סוף לא נשאר ארבה אחד בכל גבול מצרים
שמות 10 : 20 (ALEP)
כ ויחזק יהוה את לב פרעה ולא שלח את בני ישראל פ
שמות 10 : 21 (ALEP)
כא ויאמר יהוה אל משה נטה ידך על השמים ויהי חשך על ארץ מצרים וימש חשך
שמות 10 : 22 (ALEP)
כב ויט משה את ידו על השמים ויהי חשך אפלה בכל ארץ מצרים שלשת ימים
שמות 10 : 23 (ALEP)
כג לא ראו איש את אחיו ולא קמו איש מתחתיו--שלשת ימים ולכל בני ישראל היה אור במושבתם
שמות 10 : 24 (ALEP)
כד ויקרא פרעה אל משה ויאמר לכו עבדו את יהוה--רק צאנכם ובקרכם יצג גם טפכם ילך עמכם
שמות 10 : 25 (ALEP)
כה ויאמר משה גם אתה תתן בידנו זבחים ועלת ועשינו ליהוה אלהינו
שמות 10 : 26 (ALEP)
כו וגם מקננו ילך עמנו לא תשאר פרסה--כי ממנו נקח לעבד את יהוה אלהינו ואנחנו לא נדע מה נעבד את יהוה עד באנו שמה
שמות 10 : 27 (ALEP)
כז ויחזק יהוה את לב פרעה ולא אבה לשלחם
שמות 10 : 28 (ALEP)
כח ויאמר לו פרעה לך מעלי השמר לך אל תסף ראות פני--כי ביום ראתך פני תמות
שמות 10 : 29 (ALEP)
כט ויאמר משה כן דברת לא אסף עוד ראות פניך פ
❮
❯