דברים 9 : 1 (ALEP)
א שמע ישראל אתה עבר היום את הירדן לבא לרשת גוים גדלים ועצמים ממך--ערים גדלת ובצרת בשמים
דברים 9 : 2 (ALEP)
ב עם גדול ורם בני ענקים אשר אתה ידעת ואתה שמעת--מי יתיצב לפני בני ענק
דברים 9 : 3 (ALEP)
ג וידעת היום כי יהוה אלהיך הוא העבר לפניך אש אכלה--הוא ישמידם והוא יכניעם לפניך והורשתם והאבדתם מהר כאשר דבר יהוה לך
דברים 9 : 4 (ALEP)
ד אל תאמר בלבבך בהדף יהוה אלהיך אתם מלפניך לאמר בצדקתי הביאני יהוה לרשת את הארץ הזאת וברשעת הגוים האלה יהוה מורישם מפניך
דברים 9 : 5 (ALEP)
ה לא בצדקתך ובישר לבבך אתה בא לרשת את ארצם כי ברשעת הגוים האלה יהוה אלהיך מורישם מפניך ולמען הקים את הדבר אשר נשבע יהוה לאבתיך לאברהם ליצחק וליעקב
דברים 9 : 6 (ALEP)
ו וידעת כי לא בצדקתך יהוה אלהיך נתן לך את הארץ הטובה הזאת--לרשתה כי עם קשה ערף אתה
דברים 9 : 7 (ALEP)
ז זכר אל תשכח את אשר הקצפת את יהוה אלהיך במדבר למן היום אשר יצאת מארץ מצרים עד באכם עד המקום הזה ממרים הייתם עם יהוה
דברים 9 : 8 (ALEP)
ח ובחרב הקצפתם את יהוה ויתאנף יהוה בכם להשמיד אתכם
דברים 9 : 9 (ALEP)
ט בעלתי ההרה לקחת לוחת האבנים לוחת הברית אשר כרת יהוה עמכם ואשב בהר ארבעים יום וארבעים לילה--לחם לא אכלתי ומים לא שתיתי
דברים 9 : 10 (ALEP)
י ויתן יהוה אלי את שני לוחת האבנים--כתבים באצבע אלהים ועליהם ככל הדברים אשר דבר יהוה עמכם בהר מתוך האש--ביום הקהל
דברים 9 : 11 (ALEP)
יא ויהי מקץ ארבעים יום וארבעים לילה נתן יהוה אלי את שני לחת האבנים--לחות הברית
דברים 9 : 12 (ALEP)
יב ויאמר יהוה אלי קום רד מהר מזה--כי שחת עמך אשר הוצאת ממצרים סרו מהר מן הדרך אשר צויתם--עשו להם מסכה
דברים 9 : 13 (ALEP)
יג ויאמר יהוה אלי לאמר ראיתי את העם הזה והנה עם קשה ערף הוא
דברים 9 : 14 (ALEP)
יד הרף ממני ואשמידם ואמחה את שמם מתחת השמים ואעשה אותך לגוי עצום ורב ממנו
דברים 9 : 15 (ALEP)
טו ואפן וארד מן ההר וההר בער באש ושני לוחת הברית על שתי ידי
דברים 9 : 16 (ALEP)
טז וארא והנה חטאתם ליהוה אלהיכם--עשיתם לכם עגל מסכה סרתם מהר--מן הדרך אשר צוה יהוה אתכם
דברים 9 : 17 (ALEP)
יז ואתפש בשני הלחת ואשלכם מעל שתי ידי ואשברם לעיניכם
דברים 9 : 18 (ALEP)
יח ואתנפל לפני יהוה כראשנה ארבעים יום וארבעים לילה--לחם לא אכלתי ומים לא שתיתי על כל חטאתכם אשר חטאתם לעשות הרע בעיני יהוה להכעיסו
דברים 9 : 19 (ALEP)
יט כי יגרתי מפני האף והחמה אשר קצף יהוה עליכם להשמיד אתכם וישמע יהוה אלי גם בפעם ההוא
דברים 9 : 20 (ALEP)
כ ובאהרן התאנף יהוה מאד--להשמידו ואתפלל גם בעד אהרן בעת ההוא
דברים 9 : 21 (ALEP)
כא ואת חטאתכם אשר עשיתם את העגל לקחתי ואשרף אתו באש ואכת אתו טחון היטב עד אשר דק לעפר ואשלך את עפרו אל הנחל הירד מן ההר
דברים 9 : 22 (ALEP)
כב ובתבערה ובמסה ובקברת התאוה--מקצפים הייתם את יהוה
דברים 9 : 23 (ALEP)
כג ובשלח יהוה אתכם מקדש ברנע לאמר עלו ורשו את הארץ אשר נתתי לכם ותמרו את פי יהוה אלהיכם ולא האמנתם לו ולא שמעתם בקלו
דברים 9 : 24 (ALEP)
כד ממרים הייתם עם יהוה מיום דעתי אתכם
דברים 9 : 25 (ALEP)
כה ואתנפל לפני יהוה את ארבעים היום ואת ארבעים הלילה--אשר התנפלתי כי אמר יהוה להשמיד אתכם
דברים 9 : 26 (ALEP)
כו ואתפלל אל יהוה ואמר אדני יהוה אל תשחת עמך ונחלתך אשר פדית בגדלך--אשר הוצאת ממצרים ביד חזקה
דברים 9 : 27 (ALEP)
כז זכר לעבדיך--לאברהם ליצחק וליעקב אל תפן אל קשי העם הזה ואל רשעו ואל חטאתו
דברים 9 : 28 (ALEP)
כח פן יאמרו הארץ אשר הוצאתנו משם מבלי יכלת יהוה להביאם אל הארץ אשר דבר להם ומשנאתו אותם הוציאם להמתם במדבר
דברים 9 : 29 (ALEP)
כט והם עמך ונחלתך אשר הוצאת בכחך הגדל ובזרעך הנטויה {פ}
❮
❯