דברים 7 : 1 (ALEP)
א כי יביאך יהוה אלהיך אל הארץ אשר אתה בא שמה לרשתה ונשל גוים רבים מפניך החתי והגרגשי והאמרי והכנעני והפרזי והחוי והיבוסי--שבעה גוים רבים ועצומים ממך
דברים 7 : 2 (ALEP)
ב ונתנם יהוה אלהיך לפניך--והכיתם החרם תחרים אתם לא תכרת להם ברית ולא תחנם
דברים 7 : 3 (ALEP)
ג ולא תתחתן בם בתך לא תתן לבנו ובתו לא תקח לבנך
דברים 7 : 4 (ALEP)
ד כי יסיר את בנך מאחרי ועבדו אלהים אחרים וחרה אף יהוה בכם והשמידך מהר
דברים 7 : 5 (ALEP)
ה כי אם כה תעשו להם--מזבחתיהם תתצו ומצבתם תשברו ואשירהם תגדעון ופסיליהם תשרפון באש
דברים 7 : 6 (ALEP)
ו כי עם קדוש אתה ליהוה אלהיך בך בחר יהוה אלהיך להיות לו לעם סגלה מכל העמים אשר על פני האדמה
דברים 7 : 7 (ALEP)
ז לא מרבכם מכל העמים חשק יהוה בכם--ויבחר בכם כי אתם המעט מכל העמים
דברים 7 : 8 (ALEP)
ח כי מאהבת יהוה אתכם ומשמרו את השבעה אשר נשבע לאבתיכם הוציא יהוה אתכם ביד חזקה ויפדך מבית עבדים מיד פרעה מלך מצרים
דברים 7 : 9 (ALEP)
ט וידעת כי יהוה אלהיך הוא האלהים האל הנאמן--שמר הברית והחסד לאהביו ולשמרי מצותו לאלף דור
דברים 7 : 10 (ALEP)
י ומשלם לשנאיו אל פניו להאבידו לא יאחר לשנאו אל פניו ישלם לו
דברים 7 : 11 (ALEP)
יא ושמרת את המצוה ואת החקים ואת המשפטים אשר אנכי מצוך היום--לעשותם {פ}
דברים 7 : 12 (ALEP)
יב והיה עקב תשמעון את המשפטים האלה ושמרתם ועשיתם אתם--ושמר יהוה אלהיך לך את הברית ואת החסד אשר נשבע לאבתיך
דברים 7 : 13 (ALEP)
יג ואהבך וברכך והרבך וברך פרי בטנך ופרי אדמתך דגנך ותירשך ויצהרך שגר אלפיך ועשתרת צאנך על האדמה אשר נשבע לאבתיך לתת לך
דברים 7 : 14 (ALEP)
יד ברוך תהיה מכל העמים לא יהיה בך עקר ועקרה ובבהמתך
דברים 7 : 15 (ALEP)
טו והסיר יהוה ממך כל חלי וכל מדוי מצרים הרעים אשר ידעת לא ישימם בך ונתנם בכל שנאיך
דברים 7 : 16 (ALEP)
טז ואכלת את כל העמים אשר יהוה אלהיך נתן לך--לא תחוס עינך עליהם ולא תעבד את אלהיהם כי מוקש הוא לך {ס}
דברים 7 : 17 (ALEP)
יז כי תאמר בלבבך רבים הגוים האלה ממני איכה אוכל להורישם
דברים 7 : 18 (ALEP)
יח לא תירא מהם זכר תזכר את אשר עשה יהוה אלהיך לפרעה ולכל מצרים
דברים 7 : 19 (ALEP)
יט המסת הגדלת אשר ראו עיניך והאתת והמפתים והיד החזקה והזרע הנטויה אשר הוצאך יהוה אלהיך כן יעשה יהוה אלהיך לכל העמים אשר אתה ירא מפניהם
דברים 7 : 20 (ALEP)
כ וגם את הצרעה ישלח יהוה אלהיך בם עד אבד הנשארים והנסתרים--מפניך
דברים 7 : 21 (ALEP)
כא לא תערץ מפניהם כי יהוה אלהיך בקרבך אל גדול ונורא
דברים 7 : 22 (ALEP)
כב ונשל יהוה אלהיך את הגוים האל מפניך--מעט מעט לא תוכל כלתם מהר פן תרבה עליך חית השדה
דברים 7 : 23 (ALEP)
כג ונתנם יהוה אלהיך לפניך והמם מהומה גדלה עד השמדם
דברים 7 : 24 (ALEP)
כד ונתן מלכיהם בידך והאבדת את שמם מתחת השמים לא יתיצב איש בפניך עד השמדך אתם
דברים 7 : 25 (ALEP)
כה פסילי אלהיהם תשרפון באש לא תחמד כסף וזהב עליהם ולקחת לך--פן תוקש בו כי תועבת יהוה אלהיך הוא
דברים 7 : 26 (ALEP)
כו ולא תביא תועבה אל ביתך והיית חרם כמהו שקץ תשקצנו ותעב תתעבנו כי חרם הוא {פ}
❮
❯