דברים 5 : 1 (ALEP)
א ויקרא משה אל כל ישראל ויאמר אלהם שמע ישראל את החקים ואת המשפטים אשר אנכי דבר באזניכם היום ולמדתם אתם ושמרתם לעשתם
דברים 5 : 2 (ALEP)
ב יהוה אלהינו כרת עמנו ברית--בחרב
דברים 5 : 3 (ALEP)
ג לא את אבתינו כרת יהוה את הברית הזאת כי אתנו אנחנו אלה פה היום כלנו חיים
דברים 5 : 4 (ALEP)
ד פנים בפנים דבר יהוה עמכם בהר--מתוך האש
דברים 5 : 5 (ALEP)
ה אנכי עמד בין יהוה וביניכם בעת ההוא להגיד לכם את דבר יהוה כי יראתם מפני האש ולא עליתם בהר לאמר ס
דברים 5 : 6 (ALEP)
ו אנכי יהוה אלהיך אשר הוצאתיך מארץ מצרים מבית עבדים לא יהיה לך אלהים אחרים על פני
דברים 5 : 7 (ALEP)
ז לא תעשה לך פסל כל תמונה אשר בשמים ממעל ואשר בארץ מתחת--ואשר במים מתחת לארץ
דברים 5 : 8 (ALEP)
ח לא תשתחוה להם ולא תעבדם כי אנכי יהוה אלהיך אל קנא--פקד עון אבות על בנים ועל שלשים ועל רבעים לשנאי
דברים 5 : 9 (ALEP)
ט ועשה חסד לאלפים--לאהבי ולשמרי מצותו (מצותי) ס
דברים 5 : 10 (ALEP)
י לא תשא את שם יהוה אלהיך לשוא כי לא ינקה יהוה את אשר ישא את שמו לשוא ס
דברים 5 : 11 (ALEP)
יא שמור את יום השבת לקדשו כאשר צוך יהוה אלהיך
דברים 5 : 12 (ALEP)
יב ששת ימים תעבד ועשית כל מלאכתך
דברים 5 : 13 (ALEP)
יג ויום השביעי--שבת ליהוה אלהיך לא תעשה כל מלאכה אתה ובנך ובתך ועבדך ואמתך ושורך וחמרך וכל בהמתך וגרך אשר בשעריך--למען ינוח עבדך ואמתך כמוך
דברים 5 : 14 (ALEP)
יד וזכרת כי עבד היית בארץ מצרים ויצאך יהוה אלהיך משם ביד חזקה ובזרע נטויה על כן צוך יהוה אלהיך לעשות את יום השבת ס
דברים 5 : 15 (ALEP)
טו כבד את אביך ואת אמך כאשר צוך יהוה אלהיך--למען יאריכן ימיך ולמען ייטב לך על האדמה אשר יהוה אלהיך נתן לך ס
דברים 5 : 16 (ALEP)
טז לא תרצח ס ולא תנאף ס ולא תגנב ס ולא תענה ברעך עד שוא ס
דברים 5 : 17 (ALEP)
יז ולא תחמד אשת רעך ס ולא תתאוה בית רעך שדהו ועבדו ואמתו שורו וחמרו וכל אשר לרעך ס
דברים 5 : 18 (ALEP)
יח את הדברים האלה דבר יהוה אל כל קהלכם בהר מתוך האש הענן והערפל--קול גדול ולא יסף ויכתבם על שני לחת אבנים ויתנם אלי
דברים 5 : 19 (ALEP)
יט ויהי כשמעכם את הקול מתוך החשך וההר בער באש ותקרבון אלי כל ראשי שבטיכם וזקניכם
דברים 5 : 20 (ALEP)
כ ותאמרו הן הראנו יהוה אלהינו את כבדו ואת גדלו ואת קלו שמענו מתוך האש היום הזה ראינו כי ידבר אלהים את האדם וחי
דברים 5 : 21 (ALEP)
כא ועתה למה נמות כי תאכלנו האש הגדלה הזאת אם יספים אנחנו לשמע את קול יהוה אלהינו עוד--ומתנו
דברים 5 : 22 (ALEP)
כב כי מי כל בשר אשר שמע קול אלהים חיים מדבר מתוך האש כמנו--ויחי
דברים 5 : 23 (ALEP)
כג קרב אתה ושמע את כל אשר יאמר יהוה אלהינו ואת תדבר אלינו את כל אשר ידבר יהוה אלהינו אליך--ושמענו ועשינו
דברים 5 : 24 (ALEP)
כד וישמע יהוה את קול דבריכם בדברכם אלי ויאמר יהוה אלי שמעתי את קול דברי העם הזה אשר דברו אליך--היטיבו כל אשר דברו
דברים 5 : 25 (ALEP)
כה מי יתן והיה לבבם זה להם ליראה אתי ולשמר את כל מצותי--כל הימים למען ייטב להם ולבניהם לעלם
דברים 5 : 26 (ALEP)
כו לך אמר להם שובו לכם לאהליכם
דברים 5 : 27 (ALEP)
כז ואתה פה עמד עמדי ואדברה אליך את כל המצוה והחקים והמשפטים אשר תלמדם ועשו בארץ אשר אנכי נתן להם לרשתה
דברים 5 : 28 (ALEP)
כח ושמרתם לעשות כאשר צוה יהוה אלהיכם אתכם לא תסרו ימין ושמאל
דברים 5 : 29 (ALEP)
כט בכל הדרך אשר צוה יהוה אלהיכם אתכם--תלכו למען תחיון וטוב לכם והארכתם ימים בארץ אשר תירשון
❮
❯