דברים 32 : 1 (ALEP)
א האזינו השמים ואדברה {ס} ותשמע הארץ אמרי פי {ר}
דברים 32 : 2 (ALEP)
ב יערף כמטר לקחי {ס} תזל כטל אמרתי {ר} כשעירם עלי דשא {ס} וכרביבים עלי עשב {ר}
דברים 32 : 3 (ALEP)
ג כי שם יהוה אקרא {ס} הבו גדל לאלהינו {ר}
דברים 32 : 4 (ALEP)
ד הצור תמים פעלו {ס} כי כל דרכיו משפט {ר} אל אמונה ואין עול {ס} צדיק וישר הוא {ר}
דברים 32 : 5 (ALEP)
ה שחת לו לא בניו מומם {ס} דור עקש ופתלתל {ר}
דברים 32 : 6 (ALEP)
ו ה ליהוה תגמלו זאת-- {ס} עם נבל ולא חכם {ר} הלוא הוא אביך קנך {ס} הוא עשך ויכננך {ר}
דברים 32 : 7 (ALEP)
ז זכר ימות עולם בינו שנות דר ודר {ס} שאל אביך ויגדך זקניך ויאמרו לך {ר}
דברים 32 : 8 (ALEP)
ח בהנחל עליון גוים {ס} בהפרידו בני אדם {ר} יצב גבלת עמים {ס} למספר בני ישראל {ר}
דברים 32 : 9 (ALEP)
ט כי חלק יהוה עמו {ס} יעקב חבל נחלתו {ר}
דברים 32 : 10 (ALEP)
י ימצאהו בארץ מדבר {ס} ובתהו ילל ישמן {ר} יסבבנהו יבוננהו-- {ס} יצרנהו כאישון עינו {ר}
דברים 32 : 11 (ALEP)
יא כנשר יעיר קנו על גוזליו ירחף {ס} יפרש כנפיו יקחהו ישאהו על אברתו {ר}
דברים 32 : 12 (ALEP)
יב יהוה בדד ינחנו {ס} ואין עמו אל נכר {ר}
דברים 32 : 13 (ALEP)
יג ירכבהו על במותי (במתי) ארץ {ס} ויאכל תנובת שדי {ר} וינקהו דבש מסלע {ס} ושמן מחלמיש צור {ר}
דברים 32 : 14 (ALEP)
יד חמאת בקר וחלב צאן {ס} עם חלב כרים ואילים {ר} בני בשן ועתודים {ס} עם חלב כליות חטה {ר} ודם ענב תשתה חמר {ס}
דברים 32 : 15 (ALEP)
טו וישמן ישרון ויבעט {ר} שמנת עבית כשית {ס} ויטש אלוה עשהו {ר} וינבל צור ישעתו {ס}
דברים 32 : 16 (ALEP)
טז יקנאהו בזרים {ר} בתועבת יכעיסהו {ס}
דברים 32 : 17 (ALEP)
יז יזבחו לשדים לא אלה-- {ר} אלהים לא ידעום {ס} חדשים מקרב באו {ר} לא שערום אבתיכם {ס}
דברים 32 : 18 (ALEP)
יח צור ילדך תשי {ר} ותשכח אל מחללך {ס}
דברים 32 : 19 (ALEP)
יט וירא יהוה וינאץ {ר} מכעס בניו ובנתיו {ס}
דברים 32 : 20 (ALEP)
כ ויאמר אסתירה פני מהם-- {ר} אראה מה אחריתם {ס} כי דור תהפכת המה {ר} בנים לא אמן בם {ס}
דברים 32 : 21 (ALEP)
כא הם קנאוני בלא אל {ר} כעסוני בהבליהם {ס} ואני אקניאם בלא עם {ר} בגוי נבל אכעיסם {ס}
דברים 32 : 22 (ALEP)
כב כי אש קדחה באפי {ר} ותיקד עד שאול תחתית {ס} ותאכל ארץ ויבלה {ר} ותלהט מוסדי הרים {ס}
דברים 32 : 23 (ALEP)
כג אספה עלימו רעות {ר} חצי אכלה בם {ס}
דברים 32 : 24 (ALEP)
כד מזי רעב ולחמי רשף {ר} וקטב מרירי {ס} ושן בהמת אשלח בם {ר} עם חמת זחלי עפר {ס}
דברים 32 : 25 (ALEP)
כה מחוץ תשכל חרב ומחדרים אימה גם בחור {ר} גם בתולה--יונק עם איש שיבה {ס}
דברים 32 : 26 (ALEP)
כו אמרתי אפאיהם {ר} אשביתה מאנוש זכרם {ס}
דברים 32 : 27 (ALEP)
כז לולי כעס אויב אגור-- {ר} פן ינכרו צרימו {ס} פן יאמרו ידנו רמה {ר} ולא יהוה פעל כל זאת {ס}
דברים 32 : 28 (ALEP)
כח כי גוי אבד עצות המה {ר} ואין בהם תבונה {ס}
דברים 32 : 29 (ALEP)
כט לו חכמו ישכילו זאת {ר} יבינו לאחריתם {ס}
דברים 32 : 30 (ALEP)
ל איכה ירדף אחד אלף {ר} ושנים יניסו רבבה {ס} אם לא כי צורם מכרם {ר} ויהוה הסגירם {ס}
דברים 32 : 31 (ALEP)
לא כי לא כצורנו צורם {ר} ואיבינו פלילים {ס}
דברים 32 : 32 (ALEP)
לב כי מגפן סדם גפנם {ר} ומשדמת עמרה {ס} ענבמו ענבי רוש-- {ר} אשכלת מררת למו {ס}
דברים 32 : 33 (ALEP)
לג חמת תנינם יינם {ר} וראש פתנים אכזר {ס}
דברים 32 : 34 (ALEP)
לד הלא הוא כמס עמדי {ר} חתום באוצרתי {ס}
דברים 32 : 35 (ALEP)
לה לי נקם ושלם {ר} לעת תמוט רגלם {ס} כי קרוב יום אידם {ר} וחש עתדת למו {ס}
דברים 32 : 36 (ALEP)
לו כי ידין יהוה עמו {ר} ועל עבדיו יתנחם {ס} כי יראה כי אזלת יד {ר} ואפס עצור ועזוב {ס}
דברים 32 : 37 (ALEP)
לז ואמר אי אלהימו-- {ר} צור חסיו בו {ס}
דברים 32 : 38 (ALEP)
לח אשר חלב זבחימו יאכלו {ר} ישתו יין נסיכם {ס} יקומו ויעזרכם-- {ר} יהי עליכם סתרה {ס}
דברים 32 : 39 (ALEP)
לט ראו עתה כי אני אני הוא {ר} ואין אלהים עמדי {ס} אני אמית ואחיה {ר} מחצתי ואני ארפא {ס} ואין מידי מציל {ר}
דברים 32 : 40 (ALEP)
מ כי אשא אל שמים ידי {ס} ואמרתי חי אנכי לעלם {ר}
דברים 32 : 41 (ALEP)
מא אם שנותי ברק חרבי {ס} ותאחז במשפט ידי {ר} אשיב נקם לצרי {ס} ולמשנאי אשלם {ר}
דברים 32 : 42 (ALEP)
מב אשכיר חצי מדם {ס} וחרבי תאכל בשר {ר} מדם חלל ושביה {ס} מראש פרעות אויב {ר}
דברים 32 : 43 (ALEP)
מג הרנינו גוים עמו {ס} כי דם עבדיו יקום {ר} ונקם ישיב לצריו {ס} וכפר אדמתו עמו {ר} {ש}
דברים 32 : 44 (ALEP)
מד ויבא משה וידבר את כל דברי השירה הזאת--באזני העם הוא והושע בן נון
דברים 32 : 45 (ALEP)
מה ויכל משה לדבר את כל הדברים האלה--אל כל ישראל
דברים 32 : 46 (ALEP)
מו ויאמר אלהם שימו לבבכם לכל הדברים אשר אנכי מעיד בכם היום אשר תצום את בניכם לשמר לעשות את כל דברי התורה הזאת
דברים 32 : 47 (ALEP)
מז כי לא דבר רק הוא מכם--כי הוא חייכם ובדבר הזה תאריכו ימים על האדמה אשר אתם עברים את הירדן שמה לרשתה {פ}
דברים 32 : 48 (ALEP)
מח וידבר יהוה אל משה בעצם היום הזה לאמר
דברים 32 : 49 (ALEP)
מט עלה אל הר העברים הזה הר נבו אשר בארץ מואב אשר על פני ירחו וראה את ארץ כנען אשר אני נתן לבני ישראל לאחזה
דברים 32 : 50 (ALEP)
נ ומת בהר אשר אתה עלה שמה והאסף אל עמיך כאשר מת אהרן אחיך בהר ההר ויאסף אל עמיו
דברים 32 : 51 (ALEP)
נא על אשר מעלתם בי בתוך בני ישראל במי מריבת קדש מדבר צן--על אשר לא קדשתם אותי בתוך בני ישראל
דברים 32 : 52 (ALEP)
נב כי מנגד תראה את הארץ ושמה לא תבוא--אל הארץ אשר אני נתן לבני ישראל {פ}
❮
❯