דברים 21 : 1 (ALEP)
א כי ימצא חלל באדמה אשר יהוה אלהיך נתן לך לרשתה נפל בשדה לא נודע מי הכהו
דברים 21 : 2 (ALEP)
ב ויצאו זקניך ושפטיך ומדדו אל הערים אשר סביבת החלל
דברים 21 : 3 (ALEP)
ג והיה העיר הקרבה אל החלל--ולקחו זקני העיר ההוא עגלת בקר אשר לא עבד בה אשר לא משכה בעל
דברים 21 : 4 (ALEP)
ד והורדו זקני העיר ההוא את העגלה אל נחל איתן אשר לא יעבד בו ולא יזרע וערפו שם את העגלה בנחל
דברים 21 : 5 (ALEP)
ה ונגשו הכהנים בני לוי--כי בם בחר יהוה אלהיך לשרתו ולברך בשם יהוה ועל פיהם יהיה כל ריב וכל נגע
דברים 21 : 6 (ALEP)
ו וכל זקני העיר ההוא הקרבים אל החלל--ירחצו את ידיהם על העגלה הערופה בנחל
דברים 21 : 7 (ALEP)
ז וענו ואמרו ידינו לא שפכה (שפכו) את הדם הזה ועינינו לא ראו
דברים 21 : 8 (ALEP)
ח כפר לעמך ישראל אשר פדית יהוה ואל תתן דם נקי בקרב עמך ישראל ונכפר להם הדם
דברים 21 : 9 (ALEP)
ט ואתה תבער הדם הנקי--מקרבך כי תעשה הישר בעיני יהוה {ס}
דברים 21 : 10 (ALEP)
י כי תצא למלחמה על איביך ונתנו יהוה אלהיך בידך--ושבית שביו
דברים 21 : 11 (ALEP)
יא וראית בשביה אשת יפת תאר וחשקת בה ולקחת לך לאשה
דברים 21 : 12 (ALEP)
יב והבאתה אל תוך ביתך וגלחה את ראשה ועשתה את צפרניה
דברים 21 : 13 (ALEP)
יג והסירה את שמלת שביה מעליה וישבה בביתך ובכתה את אביה ואת אמה ירח ימים ואחר כן תבוא אליה ובעלתה והיתה לך לאשה
דברים 21 : 14 (ALEP)
יד והיה אם לא חפצת בה ושלחתה לנפשה ומכר לא תמכרנה בכסף לא תתעמר בה תחת אשר עניתה {ס}
דברים 21 : 15 (ALEP)
טו כי תהיין לאיש שתי נשים האחת אהובה והאחת שנואה וילדו לו בנים האהובה והשנואה והיה הבן הבכר לשניאה
דברים 21 : 16 (ALEP)
טז והיה ביום הנחילו את בניו את אשר יהיה לו--לא יוכל לבכר את בן האהובה על פני בן השנואה הבכר
דברים 21 : 17 (ALEP)
יז כי את הבכר בן השנואה יכיר לתת לו פי שנים בכל אשר ימצא לו כי הוא ראשית אנו לו משפט הבכרה {ס}
דברים 21 : 18 (ALEP)
יח כי יהיה לאיש בן סורר ומורה--איננו שמע בקול אביו ובקול אמו ויסרו אתו ולא ישמע אליהם
דברים 21 : 19 (ALEP)
יט ותפשו בו אביו ואמו והוציאו אתו אל זקני עירו ואל שער מקמו
דברים 21 : 20 (ALEP)
כ ואמרו אל זקני עירו בננו זה סורר ומרה--איננו שמע בקלנו זולל וסבא
דברים 21 : 21 (ALEP)
כא ורגמהו כל אנשי עירו באבנים ומת ובערת הרע מקרבך וכל ישראל ישמעו ויראו {ס}
דברים 21 : 22 (ALEP)
כב וכי יהיה באיש חטא משפט מות--והומת ותלית אתו על עץ
דברים 21 : 23 (ALEP)
כג לא תלין נבלתו על העץ כי קבור תקברנו ביום ההוא--כי קללת אלהים תלוי ולא תטמא את אדמתך אשר יהוה אלהיך נתן לך נחלה {ס}
❮
❯