דברים 2 : 1 (ALEP)
א ונפן ונסע המדברה דרך ים סוף כאשר דבר יהוה אלי ונסב את הר שעיר ימים רבים ס
דברים 2 : 2 (ALEP)
ב ויאמר יהוה אלי לאמר
דברים 2 : 3 (ALEP)
ג רב לכם סב את ההר הזה פנו לכם צפנה
דברים 2 : 4 (ALEP)
ד ואת העם צו לאמר אתם עברים בגבול אחיכם בני עשו הישבים בשעיר וייראו מכם ונשמרתם מאד
דברים 2 : 5 (ALEP)
ה אל תתגרו בם--כי לא אתן לכם מארצם עד מדרך כף רגל כי ירשה לעשו נתתי את הר שעיר
דברים 2 : 6 (ALEP)
ו אכל תשברו מאתם בכסף ואכלתם וגם מים תכרו מאתם בכסף--ושתיתם
דברים 2 : 7 (ALEP)
ז כי יהוה אלהיך ברכך בכל מעשה ידך--ידע לכתך את המדבר הגדל הזה זה ארבעים שנה יהוה אלהיך עמך--לא חסרת דבר
דברים 2 : 8 (ALEP)
ח ונעבר מאת אחינו בני עשו הישבים בשעיר מדרך הערבה מאילת ומעצין גבר ס ונפן ונעבר דרך מדבר מואב
דברים 2 : 9 (ALEP)
ט ויאמר יהוה אלי אל תצר את מואב ואל תתגר בם מלחמה כי לא אתן לך מארצו ירשה--כי לבני לוט נתתי את ער ירשה
דברים 2 : 10 (ALEP)
י האמים לפנים ישבו בה--עם גדול ורב ורם כענקים
דברים 2 : 11 (ALEP)
יא רפאים יחשבו אף הם כענקים והמאבים יקראו להם אמים
דברים 2 : 12 (ALEP)
יב ובשעיר ישבו החרים לפנים ובני עשו יירשום וישמידום מפניהם וישבו תחתם כאשר עשה ישראל לארץ ירשתו אשר נתן יהוה להם
דברים 2 : 13 (ALEP)
יג עתה קמו ועברו לכם--את נחל זרד ונעבר את נחל זרד
דברים 2 : 14 (ALEP)
יד והימים אשר הלכנו מקדש ברנע עד אשר עברנו את נחל זרד שלשים ושמנה שנה--עד תם כל הדור אנשי המלחמה מקרב המחנה כאשר נשבע יהוה להם
דברים 2 : 15 (ALEP)
טו וגם יד יהוה היתה בם להמם מקרב המחנה עד תמם
דברים 2 : 16 (ALEP)
טז ויהי כאשר תמו כל אנשי המלחמה למות--מקרב העם ס
דברים 2 : 17 (ALEP)
יז וידבר יהוה אלי לאמר
דברים 2 : 18 (ALEP)
יח אתה עבר היום את גבול מואב את ער
דברים 2 : 19 (ALEP)
יט וקרבת מול בני עמון--אל תצרם ואל תתגר בם כי לא אתן מארץ בני עמון לך ירשה--כי לבני לוט נתתיה ירשה
דברים 2 : 20 (ALEP)
כ ארץ רפאים תחשב אף הוא רפאים ישבו בה לפנים והעמנים יקראו להם זמזמים
דברים 2 : 21 (ALEP)
כא עם גדול ורב ורם כענקים וישמידם יהוה מפניהם ויירשם וישבו תחתם
דברים 2 : 22 (ALEP)
כב כאשר עשה לבני עשו הישבים בשעיר--אשר השמיד את החרי מפניהם ויירשם וישבו תחתם עד היום הזה
דברים 2 : 23 (ALEP)
כג והעוים הישבים בחצרים עד עזה--כפתרים היצאים מכפתר השמידם וישבו תחתם
דברים 2 : 24 (ALEP)
כד קומו סעו ועברו את נחל ארנן--ראה נתתי בידך את סיחן מלך חשבון האמרי ואת ארצו החל רש והתגר בו מלחמה
דברים 2 : 25 (ALEP)
כה היום הזה אחל תת פחדך ויראתך על פני העמים תחת כל השמים--אשר ישמעון שמעך ורגזו וחלו מפניך
דברים 2 : 26 (ALEP)
כו ואשלח מלאכים ממדבר קדמות אל סיחון מלך חשבון דברי שלום לאמר
דברים 2 : 27 (ALEP)
כז אעברה בארצך בדרך בדרך אלך לא אסור ימין ושמאול
דברים 2 : 28 (ALEP)
כח אכל בכסף תשברני ואכלתי ומים בכסף תתן לי ושתיתי רק אעברה ברגלי
דברים 2 : 29 (ALEP)
כט כאשר עשו לי בני עשו הישבים בשעיר והמואבים הישבים בער--עד אשר אעבר את הירדן אל הארץ אשר יהוה אלהינו נתן לנו
דברים 2 : 30 (ALEP)
ל ולא אבה סיחן מלך חשבון העברנו בו כי הקשה יהוה אלהיך את רוחו ואמץ את לבבו למען תתו בידך כיום הזה ס
דברים 2 : 31 (ALEP)
לא ויאמר יהוה אלי ראה החלתי תת לפניך את סיחן ואת ארצו החל רש לרשת את ארצו
דברים 2 : 32 (ALEP)
לב ויצא סיחן לקראתנו הוא וכל עמו למלחמה--יהצה
דברים 2 : 33 (ALEP)
לג ויתנהו יהוה אלהינו לפנינו ונך אתו ואת בנו ואת כל עמו
דברים 2 : 34 (ALEP)
לד ונלכד את כל עריו בעת ההוא ונחרם את כל עיר מתם והנשים והטף לא השארנו שריד
דברים 2 : 35 (ALEP)
לה רק הבהמה בזזנו לנו ושלל הערים אשר לכדנו
דברים 2 : 36 (ALEP)
לו מערער אשר על שפת נחל ארנן והעיר אשר בנחל ועד הגלעד לא היתה קריה אשר שגבה ממנו את הכל נתן יהוה אלהינו לפנינו
דברים 2 : 37 (ALEP)
לז רק אל ארץ בני עמון לא קרבת כל יד נחל יבק וערי ההר וכל אשר צוה יהוה אלהינו
❮
❯