דברים 18 : 1 (ALEP)
א לא יהיה לכהנים הלוים כל שבט לוי חלק ונחלה--עם ישראל אשי יהוה ונחלתו יאכלון
דברים 18 : 2 (ALEP)
ב ונחלה לא יהיה לו בקרב אחיו יהוה הוא נחלתו כאשר דבר לו {ס}
דברים 18 : 3 (ALEP)
ג וזה יהיה משפט הכהנים מאת העם מאת זבחי הזבח--אם שור אם שה ונתן לכהן הזרע והלחיים והקבה
דברים 18 : 4 (ALEP)
ד ראשית דגנך תירשך ויצהרך וראשית גז צאנך--תתן לו
דברים 18 : 5 (ALEP)
ה כי בו בחר יהוה אלהיך--מכל שבטיך לעמד לשרת בשם יהוה הוא ובניו כל הימים {ס}
דברים 18 : 6 (ALEP)
ו וכי יבא הלוי מאחד שעריך מכל ישראל אשר הוא גר שם ובא בכל אות נפשו אל המקום אשר יבחר יהוה
דברים 18 : 7 (ALEP)
ז ושרת בשם יהוה אלהיו--ככל אחיו הלוים העמדים שם לפני יהוה
דברים 18 : 8 (ALEP)
ח חלק כחלק יאכלו לבד ממכריו על האבות {ס}
דברים 18 : 9 (ALEP)
ט כי אתה בא אל הארץ אשר יהוה אלהיך נתן לך--לא תלמד לעשות כתועבת הגוים ההם
דברים 18 : 10 (ALEP)
י לא ימצא בך מעביר בנו ובתו באש קסם קסמים מעונן ומנחש ומכשף
דברים 18 : 11 (ALEP)
יא וחבר חבר ושאל אוב וידעני ודרש אל המתים
דברים 18 : 12 (ALEP)
יב כי תועבת יהוה כל עשה אלה ובגלל התועבת האלה יהוה אלהיך מוריש אותם מפניך
דברים 18 : 13 (ALEP)
יג תמים תהיה עם יהוה אלהיך
דברים 18 : 14 (ALEP)
יד כי הגוים האלה אשר אתה יורש אותם--אל מעננים ואל קסמים ישמעו ואתה--לא כן נתן לך יהוה אלהיך
דברים 18 : 15 (ALEP)
טו נביא מקרבך מאחיך כמני יקים לך יהוה אלהיך אליו תשמעון
דברים 18 : 16 (ALEP)
טז ככל אשר שאלת מעם יהוה אלהיך בחרב ביום הקהל לאמר לא אסף לשמע את קול יהוה אלהי ואת האש הגדלה הזאת לא אראה עוד ולא אמות
דברים 18 : 17 (ALEP)
יז ויאמר יהוה אלי היטיבו אשר דברו
דברים 18 : 18 (ALEP)
יח נביא אקים להם מקרב אחיהם כמוך ונתתי דברי בפיו ודבר אליהם את כל אשר אצונו
דברים 18 : 19 (ALEP)
יט והיה האיש אשר לא ישמע אל דברי אשר ידבר בשמי--אנכי אדרש מעמו
דברים 18 : 20 (ALEP)
כ אך הנביא אשר יזיד לדבר דבר בשמי את אשר לא צויתיו לדבר ואשר ידבר בשם אלהים אחרים--ומת הנביא ההוא
דברים 18 : 21 (ALEP)
כא וכי תאמר בלבבך איכה נדע את הדבר אשר לא דברו יהוה
דברים 18 : 22 (ALEP)
כב אשר ידבר הנביא בשם יהוה ולא יהיה הדבר ולא יבא--הוא הדבר אשר לא דברו יהוה בזדון דברו הנביא לא תגור ממנו {ס}
❮
❯