דברים 13 : 1 (ALEP)
א את כל הדבר אשר אנכי מצוה אתכם--אתו תשמרו לעשות  לא תסף עליו ולא תגרע ממנו  פ
דברים 13 : 2 (ALEP)
ב כי יקום בקרבך נביא או חלם חלום ונתן אליך אות או מופת
דברים 13 : 3 (ALEP)
ג ובא האות והמופת אשר דבר אליך לאמר  נלכה אחרי אלהים אחרים אשר לא ידעתם--ונעבדם
דברים 13 : 4 (ALEP)
ד לא תשמע אל דברי הנביא ההוא או אל חולם החלום ההוא  כי מנסה יהוה אלהיכם אתכם לדעת הישכם אהבים את יהוה אלהיכם בכל לבבכם ובכל נפשכם
דברים 13 : 5 (ALEP)
ה אחרי יהוה אלהיכם תלכו ואתו תיראו ואת מצותיו תשמרו ובקלו תשמעו ואתו תעבדו ובו תדבקון
דברים 13 : 6 (ALEP)
ו והנביא ההוא או חלם החלום ההוא יומת כי דבר סרה על יהוה אלהיכם המוציא אתכם מארץ מצרים והפדך מבית עבדים--להדיחך מן הדרך אשר צוך יהוה אלהיך ללכת בה ובערת הרע מקרבך  ס
דברים 13 : 7 (ALEP)
ז כי יסיתך אחיך בן אמך או בנך או בתך או אשת חיקך או רעך אשר כנפשך--בסתר לאמר  נלכה ונעבדה אלהים אחרים אשר לא ידעת אתה ואבתיך
דברים 13 : 8 (ALEP)
ח מאלהי העמים אשר סביבתיכם הקרבים אליך או הרחקים ממך--מקצה הארץ ועד קצה הארץ
דברים 13 : 9 (ALEP)
ט לא תאבה לו ולא תשמע אליו ולא תחוס עינך עליו ולא תחמל ולא תכסה עליו
דברים 13 : 10 (ALEP)
י כי הרג תהרגנו ידך תהיה בו בראשונה להמיתו ויד כל העם באחרנה
דברים 13 : 11 (ALEP)
יא וסקלתו באבנים ומת  כי בקש להדיחך מעל יהוה אלהיך המוציאך מארץ מצרים מבית עבדים
דברים 13 : 12 (ALEP)
יב וכל ישראל--ישמעו ויראון ולא יוספו לעשות כדבר הרע הזה--בקרבך  ס
דברים 13 : 13 (ALEP)
יג כי תשמע באחת עריך אשר יהוה אלהיך נתן לך לשבת שם--לאמר
דברים 13 : 14 (ALEP)
יד יצאו אנשים בני בליעל מקרבך וידיחו את ישבי עירם לאמר  נלכה ונעבדה אלהים אחרים--אשר לא ידעתם
דברים 13 : 15 (ALEP)
טו ודרשת וחקרת ושאלת היטב והנה אמת נכון הדבר נעשתה התועבה הזאת בקרבך
דברים 13 : 16 (ALEP)
טז הכה תכה את ישבי העיר ההוא--לפי חרב  החרם אתה ואת כל אשר בה ואת בהמתה לפי חרב
דברים 13 : 17 (ALEP)
יז ואת כל שללה תקבץ אל תוך רחבה ושרפת באש את העיר ואת כל שללה כליל ליהוה אלהיך והיתה תל עולם לא תבנה עוד
דברים 13 : 18 (ALEP)
יח ולא ידבק בידך מאומה מן החרם--למען ישוב יהוה מחרון אפו ונתן לך רחמים ורחמך והרבך כאשר נשבע לאבתיך [ ( ) יט כי תשמע בקול יהוה אלהיך לשמר את כל מצותיו אשר אנכי מצוך היום--לעשות הישר בעיני יהוה אלהיך  ס ]

1 2 3 4 5 6 7 8 9 10 11 12 13 14 15 16 17 18