דברים 11 : 1 (ALEP)
א ואהבת את יהוה אלהיך ושמרת משמרתו וחקתיו ומשפטיו ומצותיו--כל הימים
דברים 11 : 2 (ALEP)
ב וידעתם היום כי לא את בניכם אשר לא ידעו ואשר לא ראו את מוסר יהוה אלהיכם את גדלו--את ידו החזקה וזרעו הנטויה
דברים 11 : 3 (ALEP)
ג ואת אתתיו ואת מעשיו אשר עשה בתוך מצרים--לפרעה מלך מצרים ולכל ארצו
דברים 11 : 4 (ALEP)
ד ואשר עשה לחיל מצרים לסוסיו ולרכבו אשר הציף את מי ים סוף על פניהם ברדפם אחריכם ויאבדם יהוה עד היום הזה
דברים 11 : 5 (ALEP)
ה ואשר עשה לכם במדבר עד באכם עד המקום הזה
דברים 11 : 6 (ALEP)
ו ואשר עשה לדתן ולאבירם בני אליאב בן ראובן אשר פצתה הארץ את פיה ותבלעם ואת בתיהם ואת אהליהם--ואת כל היקום אשר ברגליהם בקרב כל ישראל
דברים 11 : 7 (ALEP)
ז כי עיניכם הראת את כל מעשה יהוה הגדל אשר עשה
דברים 11 : 8 (ALEP)
ח ושמרתם את כל המצוה אשר אנכי מצוך היום--למען תחזקו ובאתם וירשתם את הארץ אשר אתם עברים שמה לרשתה
דברים 11 : 9 (ALEP)
ט ולמען תאריכו ימים על האדמה אשר נשבע יהוה לאבתיכם לתת להם ולזרעם--ארץ זבת חלב ודבש ס
דברים 11 : 10 (ALEP)
י כי הארץ אשר אתה בא שמה לרשתה--לא כארץ מצרים הוא אשר יצאתם משם אשר תזרע את זרעך והשקית ברגלך כגן הירק
דברים 11 : 11 (ALEP)
יא והארץ אשר אתם עברים שמה לרשתה--ארץ הרים ובקעת למטר השמים תשתה מים
דברים 11 : 12 (ALEP)
יב ארץ אשר יהוה אלהיך דרש אתה תמיד עיני יהוה אלהיך בה--מרשית השנה ועד אחרית שנה ס
דברים 11 : 13 (ALEP)
יג והיה אם שמע תשמעו אל מצותי אשר אנכי מצוה אתכם היום--לאהבה את יהוה אלהיכם ולעבדו בכל לבבכם ובכל נפשכם
דברים 11 : 14 (ALEP)
יד ונתתי מטר ארצכם בעתו יורה ומלקוש ואספת דגנך ותירשך ויצהרך
דברים 11 : 15 (ALEP)
טו ונתתי עשב בשדך לבהמתך ואכלת ושבעת
דברים 11 : 16 (ALEP)
טז השמרו לכם פן יפתה לבבכם וסרתם ועבדתם אלהים אחרים והשתחויתם להם
דברים 11 : 17 (ALEP)
יז וחרה אף יהוה בכם ועצר את השמים ולא יהיה מטר והאדמה לא תתן את יבולה ואבדתם מהרה מעל הארץ הטבה אשר יהוה נתן לכם
דברים 11 : 18 (ALEP)
יח ושמתם את דברי אלה על לבבכם ועל נפשכם וקשרתם אתם לאות על ידכם והיו לטוטפת בין עיניכם
דברים 11 : 19 (ALEP)
יט ולמדתם אתם את בניכם לדבר בם בשבתך בביתך ובלכתך בדרך ובשכבך ובקומך
דברים 11 : 20 (ALEP)
כ וכתבתם על מזוזות ביתך ובשעריך
דברים 11 : 21 (ALEP)
כא למען ירבו ימיכם וימי בניכם על האדמה אשר נשבע יהוה לאבתיכם לתת להם--כימי השמים על הארץ ס
דברים 11 : 22 (ALEP)
כב כי אם שמר תשמרון את כל המצוה הזאת אשר אנכי מצוה אתכם--לעשתה לאהבה את יהוה אלהיכם ללכת בכל דרכיו--ולדבקה בו
דברים 11 : 23 (ALEP)
כג והוריש יהוה את כל הגוים האלה מלפניכם וירשתם גוים גדלים ועצמים מכם
דברים 11 : 24 (ALEP)
כד כל המקום אשר תדרך כף רגלכם בו--לכם יהיה מן המדבר והלבנון מן הנהר נהר פרת ועד הים האחרון--יהיה גבלכם
דברים 11 : 25 (ALEP)
כה לא יתיצב איש בפניכם פחדכם ומוראכם יתן יהוה אלהיכם על פני כל הארץ אשר תדרכו בה כאשר דבר לכם ס
דברים 11 : 26 (ALEP)
כו ראה אנכי נתן לפניכם--היום ברכה וקללה
דברים 11 : 27 (ALEP)
כז את הברכה--אשר תשמעו אל מצות יהוה אלהיכם אשר אנכי מצוה אתכם היום
דברים 11 : 28 (ALEP)
כח והקללה אם לא תשמעו אל מצות יהוה אלהיכם וסרתם מן הדרך אשר אנכי מצוה אתכם היום ללכת אחרי אלהים אחרים--אשר לא ידעתם ס
דברים 11 : 29 (ALEP)
כט והיה כי יביאך יהוה אלהיך אל הארץ אשר אתה בא שמה לרשתה--ונתתה את הברכה על הר גרזים ואת הקללה על הר עיבל
דברים 11 : 30 (ALEP)
ל הלא המה בעבר הירדן אחרי דרך מבוא השמש בארץ הכנעני הישב בערבה--מול הגלגל אצל אלוני מרה
דברים 11 : 31 (ALEP)
לא כי אתם עברים את הירדן לבא לרשת את הארץ אשר יהוה אלהיכם נתן לכם וירשתם אתה וישבתם בה
דברים 11 : 32 (ALEP)
לב ושמרתם לעשות את כל החקים ואת המשפטים אשר אנכי נתן לפניכם היום
❮
❯