דברים 10 : 1 (ALEP)
א בעת ההוא אמר יהוה אלי פסל לך שני לוחת אבנים כראשנים ועלה אלי ההרה ועשית לך ארון עץ
דברים 10 : 2 (ALEP)
ב ואכתב על הלחת את הדברים אשר היו על הלחת הראשנים אשר שברת ושמתם בארון
דברים 10 : 3 (ALEP)
ג ואעש ארון עצי שטים ואפסל שני לחת אבנים כראשנים ואעל ההרה ושני הלחת בידי
דברים 10 : 4 (ALEP)
ד ויכתב על הלחת כמכתב הראשון את עשרת הדברים אשר דבר יהוה אליכם בהר מתוך האש ביום הקהל ויתנם יהוה אלי
דברים 10 : 5 (ALEP)
ה ואפן וארד מן ההר ואשם את הלחת בארון אשר עשיתי ויהיו שם כאשר צוני יהוה
דברים 10 : 6 (ALEP)
ו ובני ישראל נסעו מבארת בני יעקן--מוסרה שם מת אהרן ויקבר שם ויכהן אלעזר בנו תחתיו
דברים 10 : 7 (ALEP)
ז משם נסעו הגדגדה ומן הגדגדה יטבתה ארץ נחלי מים
דברים 10 : 8 (ALEP)
ח בעת ההוא הבדיל יהוה את שבט הלוי לשאת את ארון ברית יהוה--לעמד לפני יהוה לשרתו ולברך בשמו עד היום הזה
דברים 10 : 9 (ALEP)
ט על כן לא היה ללוי חלק ונחלה--עם אחיו יהוה הוא נחלתו כאשר דבר יהוה אלהיך לו
דברים 10 : 10 (ALEP)
י ואנכי עמדתי בהר כימים הראשנים--ארבעים יום וארבעים לילה וישמע יהוה אלי גם בפעם ההוא--לא אבה יהוה השחיתך
דברים 10 : 11 (ALEP)
יא ויאמר יהוה אלי קום לך למסע לפני העם ויבאו ויירשו את הארץ אשר נשבעתי לאבתם לתת להם {פ}
דברים 10 : 12 (ALEP)
יב ועתה ישראל--מה יהוה אלהיך שאל מעמך כי אם ליראה את יהוה אלהיך ללכת בכל דרכיו ולאהבה אתו ולעבד את יהוה אלהיך בכל לבבך ובכל נפשך
דברים 10 : 13 (ALEP)
יג לשמר את מצות יהוה ואת חקתיו אשר אנכי מצוך היום--לטוב לך
דברים 10 : 14 (ALEP)
יד הן ליהוה אלהיך השמים ושמי השמים הארץ וכל אשר בה
דברים 10 : 15 (ALEP)
טו רק באבתיך חשק יהוה לאהבה אותם ויבחר בזרעם אחריהם בכם מכל העמים--כיום הזה
דברים 10 : 16 (ALEP)
טז ומלתם את ערלת לבבכם וערפכם--לא תקשו עוד
דברים 10 : 17 (ALEP)
יז כי יהוה אלהיכם--הוא אלהי האלהים ואדני האדנים האל הגדל הגבר והנורא אשר לא ישא פנים ולא יקח שחד
דברים 10 : 18 (ALEP)
יח עשה משפט יתום ואלמנה ואהב גר לתת לו לחם ושמלה
דברים 10 : 19 (ALEP)
יט ואהבתם את הגר כי גרים הייתם בארץ מצרים
דברים 10 : 20 (ALEP)
כ את יהוה אלהיך תירא אתו תעבד ובו תדבק ובשמו תשבע
דברים 10 : 21 (ALEP)
כא הוא תהלתך והוא אלהיך--אשר עשה אתך את הגדלת ואת הנוראת האלה אשר ראו עיניך
דברים 10 : 22 (ALEP)
כב בשבעים נפש ירדו אבתיך מצרימה ועתה שמך יהוה אלהיך ככוכבי השמים לרב
❮
❯