דניאל 9 : 1 (ALEP)
א בשנת אחת לדריוש בן אחשורוש--מזרע מדי אשר המלך על מלכות כשדים
דניאל 9 : 2 (ALEP)
ב בשנת אחת למלכו אני דניאל בינתי בספרים מספר השנים אשר היה דבר יהוה אל ירמיה הנביא למלאות לחרבות ירושלם שבעים שנה
דניאל 9 : 3 (ALEP)
ג ואתנה את פני אל אדני האלהים לבקש תפלה ותחנונים--בצום ושק ואפר
דניאל 9 : 4 (ALEP)
ד ואתפללה ליהוה אלהי ואתודה ואמרה אנא אדני האל הגדול והנורא שמר הברית והחסד לאהביו ולשמרי מצותיו
דניאל 9 : 5 (ALEP)
ה חטאנו ועוינו והרשענו (הרשענו) ומרדנו וסור ממצותך וממשפטיך
דניאל 9 : 6 (ALEP)
ו ולא שמענו אל עבדיך הנביאים אשר דברו בשמך אל מלכינו שרינו ואבתינו--ואל כל עם הארץ
דניאל 9 : 7 (ALEP)
ז לך אדני הצדקה ולנו בשת הפנים כיום הזה לאיש יהודה ולישבי ירושלם ולכל ישראל הקרבים והרחקים בכל הארצות אשר הדחתם שם במעלם אשר מעלו בך
דניאל 9 : 8 (ALEP)
ח יהוה לנו בשת הפנים למלכינו לשרינו ולאבתינו אשר חטאנו לך
דניאל 9 : 9 (ALEP)
ט לאדני אלהינו הרחמים והסלחות כי מרדנו בו
דניאל 9 : 10 (ALEP)
י ולא שמענו בקול יהוה אלהינו--ללכת בתורתיו אשר נתן לפנינו ביד עבדיו הנביאים
דניאל 9 : 11 (ALEP)
יא וכל ישראל עברו את תורתך וסור לבלתי שמוע בקלך ותתך עלינו האלה והשבעה אשר כתובה בתורת משה עבד האלהים--כי חטאנו לו
דניאל 9 : 12 (ALEP)
יב ויקם את דבריו (דברו) אשר דבר עלינו ועל שפטינו אשר שפטונו--להביא עלינו רעה גדלה אשר לא נעשתה תחת כל השמים כאשר נעשתה בירושלם
דניאל 9 : 13 (ALEP)
יג כאשר כתוב בתורת משה את כל הרעה הזאת באה עלינו ולא חלינו את פני יהוה אלהינו לשוב מעוננו ולהשכיל באמתך
דניאל 9 : 14 (ALEP)
יד וישקד יהוה על הרעה ויביאה עלינו כי צדיק יהוה אלהינו על כל מעשיו אשר עשה ולא שמענו בקלו
דניאל 9 : 15 (ALEP)
טו ועתה אדני אלהינו אשר הוצאת את עמך מארץ מצרים ביד חזקה ותעש לך שם כיום הזה חטאנו רשענו
דניאל 9 : 16 (ALEP)
טז אדני ככל צדקתך ישב נא אפך וחמתך מעירך ירושלם הר קדשך כי בחטאינו ובעונות אבתינו ירושלם ועמך לחרפה לכל סביבתינו
דניאל 9 : 17 (ALEP)
יז ועתה שמע אלהינו אל תפלת עבדך ואל תחנוניו והאר פניך על מקדשך השמם--למען אדני
דניאל 9 : 18 (ALEP)
יח הטה אלהי אזנך ושמע--פקחה (פקח) עיניך וראה שממתינו והעיר אשר נקרא שמך עליה כי לא על צדקתינו אנחנו מפילים תחנונינו לפניך--כי על רחמיך הרבים
דניאל 9 : 19 (ALEP)
יט אדני שמעה אדני סלחה אדני הקשיבה ועשה אל תאחר למענך אלהי--כי שמך נקרא על עירך ועל עמך
דניאל 9 : 20 (ALEP)
כ ועוד אני מדבר ומתפלל ומתודה חטאתי וחטאת עמי ישראל ומפיל תחנתי לפני יהוה אלהי--על הר קדש אלהי
דניאל 9 : 21 (ALEP)
כא ועוד אני מדבר בתפלה והאיש גבריאל אשר ראיתי בחזון בתחלה מעף ביעף נגע אלי כעת מנחת ערב
דניאל 9 : 22 (ALEP)
כב ויבן וידבר עמי ויאמר--דניאל עתה יצאתי להשכילך בינה
דניאל 9 : 23 (ALEP)
כג בתחלת תחנוניך יצא דבר ואני באתי להגיד--כי חמודות אתה ובין בדבר והבן במראה
דניאל 9 : 24 (ALEP)
כד שבעים שבעים נחתך על עמך ועל עיר קדשך לכלא הפשע ולחתם (ולהתם) חטאות (חטאת) ולכפר עון ולהביא צדק עלמים ולחתם חזון ונביא ולמשח קדש קדשים
דניאל 9 : 25 (ALEP)
כה ותדע ותשכל מן מצא דבר להשיב ולבנות ירושלם עד משיח נגיד--שבעים שבעה ושבעים ששים ושנים תשוב ונבנתה רחוב וחרוץ ובצוק העתים
דניאל 9 : 26 (ALEP)
כו ואחרי השבעים ששים ושנים יכרת משיח ואין לו והעיר והקדש ישחית עם נגיד הבא וקצו בשטף ועד קץ מלחמה נחרצת שממות
דניאל 9 : 27 (ALEP)
כז והגביר ברית לרבים שבוע אחד וחצי השבוע ישבית זבח ומנחה ועל כנף שקוצים משמם ועד כלה ונחרצה תתך על שמם פ
❮
❯