דניאל 10 : 1 (ALEP)
א בשנת שלוש לכורש מלך פרס דבר נגלה לדניאל אשר נקרא שמו בלטאשצר ואמת הדבר וצבא גדול ובין את הדבר ובינה לו במראה
דניאל 10 : 2 (ALEP)
ב בימים ההם--אני דניאל הייתי מתאבל שלשה שבעים ימים
דניאל 10 : 3 (ALEP)
ג לחם חמדות לא אכלתי ובשר ויין לא בא אל פי--וסוך לא סכתי  עד מלאת שלשת שבעים ימים  פ
דניאל 10 : 4 (ALEP)
ד וביום עשרים וארבעה לחדש הראשון  ואני הייתי על יד הנהר הגדול--הוא חדקל
דניאל 10 : 5 (ALEP)
ה ואשא את עיני וארא והנה איש אחד לבוש בדים ומתניו חגרים בכתם אופז
דניאל 10 : 6 (ALEP)
ו וגויתו כתרשיש ופניו כמראה ברק ועיניו כלפידי אש וזרעתיו ומרגלתיו כעין נחשת קלל וקול דבריו כקול המון
דניאל 10 : 7 (ALEP)
ז וראיתי אני דניאל לבדי את המראה והאנשים אשר היו עמי לא ראו את המראה אבל חרדה גדלה נפלה עליהם ויברחו בהחבא
דניאל 10 : 8 (ALEP)
ח ואני נשארתי לבדי ואראה את המראה הגדלה הזאת ולא נשאר בי כח והודי נהפך עלי למשחית ולא עצרתי כח
דניאל 10 : 9 (ALEP)
ט ואשמע את קול דבריו וכשמעי את קול דבריו ואני הייתי נרדם על פני ופני ארצה
דניאל 10 : 10 (ALEP)
י והנה יד נגעה בי ותניעני על ברכי וכפות ידי
דניאל 10 : 11 (ALEP)
יא ויאמר אלי דניאל איש חמדות הבן בדברים אשר אנכי דבר אליך ועמד על עמדך--כי עתה שלחתי אליך ובדברו עמי את הדבר הזה עמדתי מרעיד
דניאל 10 : 12 (ALEP)
יב ויאמר אלי אל תירא דניאל--כי מן היום הראשון אשר נתת את לבך להבין ולהתענות לפני אלהיך נשמעו דבריך ואני באתי בדבריך
דניאל 10 : 13 (ALEP)
יג ושר מלכות פרס עמד לנגדי עשרים ואחד יום והנה מיכאל אחד השרים הראשנים בא לעזרני ואני נותרתי שם אצל מלכי פרס
דניאל 10 : 14 (ALEP)
יד ובאתי להבינך את אשר יקרה לעמך באחרית הימים  כי עוד חזון לימים
דניאל 10 : 15 (ALEP)
טו ובדברו עמי כדברים האלה--נתתי פני ארצה ונאלמתי
דניאל 10 : 16 (ALEP)
טז והנה כדמות בני אדם נגע על שפתי ואפתח פי ואדברה ואמרה אל העמד לנגדי אדני במראה נהפכו צירי עלי ולא עצרתי כח
דניאל 10 : 17 (ALEP)
יז והיך יוכל עבד אדני זה לדבר עם אדני זה ואני מעתה לא יעמד בי כח ונשמה לא נשארה בי
דניאל 10 : 18 (ALEP)
יח ויסף ויגע בי כמראה אדם ויחזקני
דניאל 10 : 19 (ALEP)
יט ויאמר אל תירא איש חמדות שלום לך--חזק וחזק וכדברו עמי התחזקתי ואמרה ידבר אדני כי חזקתני
דניאל 10 : 20 (ALEP)
כ ויאמר הידעת למה באתי אליך ועתה אשוב להלחם עם שר פרס ואני יוצא והנה שר יון בא
דניאל 10 : 21 (ALEP)
כא אבל אגיד לך את הרשום בכתב אמת ואין אחד מתחזק עמי על אלה כי אם מיכאל שרכם  פ

1 2 3 4 5 6 7 8 9 10 11 12 13 14 15 16 17 18 19 20 21