עמוס 5 : 1 (ALEP)
א שמעו את הדבר הזה אשר אנכי נשא עליכם קינה--בית ישראל
עמוס 5 : 2 (ALEP)
ב נפלה לא תוסיף קום בתולת ישראל נטשה על אדמתה אין מקימה
עמוס 5 : 3 (ALEP)
ג כי כה אמר אדני יהוה העיר היצאת אלף תשאיר מאה והיוצאת מאה תשאיר עשרה לבית ישראל
עמוס 5 : 4 (ALEP)
ד כי כה אמר יהוה לבית ישראל דרשוני וחיו
עמוס 5 : 5 (ALEP)
ה ואל תדרשו בית אל והגלגל לא תבאו ובאר שבע לא תעברו כי הגלגל גלה יגלה ובית אל יהיה לאון
עמוס 5 : 6 (ALEP)
ו דרשו את יהוה וחיו פן יצלח כאש בית יוסף ואכלה ואין מכבה לבית אל
עמוס 5 : 7 (ALEP)
ז ההפכים ללענה משפט וצדקה לארץ הניחו
עמוס 5 : 8 (ALEP)
ח עשה כימה וכסיל והפך לבקר צלמות ויום לילה החשיך הקורא למי הים וישפכם על פני הארץ--יהוה שמו
עמוס 5 : 9 (ALEP)
ט המבליג שד על עז ושד על מבצר יבוא
עמוס 5 : 10 (ALEP)
י שנאו בשער מוכיח ודבר תמים יתעבו
עמוס 5 : 11 (ALEP)
יא לכן יען בושסכם על דל ומשאת בר תקחו ממנו--בתי גזית בניתם ולא תשבו בם כרמי חמד נטעתם ולא תשתו את יינם
עמוס 5 : 12 (ALEP)
יב כי ידעתי רבים פשעיכם ועצמים חטאתיכם צררי צדיק לקחי כפר ואביונים בשער הטו
עמוס 5 : 13 (ALEP)
יג לכן המשכיל בעת ההיא--ידם כי עת רעה היא
עמוס 5 : 14 (ALEP)
יד דרשו טוב ואל רע למען תחיו ויהי כן יהוה אלהי צבאות אתכם--כאשר אמרתם
עמוס 5 : 15 (ALEP)
טו שנאו רע ואהבו טוב והציגו בשער משפט אולי יחנן יהוה אלהי צבאות--שארית יוסף ס
עמוס 5 : 16 (ALEP)
טז לכן כה אמר יהוה אלהי צבאות אדני בכל רחבות מספד ובכל חוצות יאמרו הו הו וקראו אכר אל אבל ומספד אל יודעי נהי
עמוס 5 : 17 (ALEP)
יז ובכל כרמים מספד כי אעבר בקרבך אמר יהוה פ
עמוס 5 : 18 (ALEP)
יח הוי המתאוים את יום יהוה למה זה לכם יום יהוה הוא חשך ולא אור
עמוס 5 : 19 (ALEP)
יט כאשר ינוס איש מפני הארי ופגעו הדב ובא הבית--וסמך ידו על הקיר ונשכו הנחש
עמוס 5 : 20 (ALEP)
כ הלא חשך יום יהוה ולא אור ואפל ולא נגה לו
עמוס 5 : 21 (ALEP)
כא שנאתי מאסתי חגיכם ולא אריח בעצרתיכם
עמוס 5 : 22 (ALEP)
כב כי אם תעלו לי עלות ומנחתיכם לא ארצה ושלם מריאיכם לא אביט
עמוס 5 : 23 (ALEP)
כג הסר מעלי המון שריך וזמרת נבליך לא אשמע
עמוס 5 : 24 (ALEP)
כד ויגל כמים משפט וצדקה כנחל איתן
עמוס 5 : 25 (ALEP)
כה הזבחים ומנחה הגשתם לי במדבר ארבעים שנה--בית ישראל
עמוס 5 : 26 (ALEP)
כו ונשאתם את סכות מלככם ואת כיון צלמיכם--כוכב אלהיכם אשר עשיתם לכם
עמוס 5 : 27 (ALEP)
כז והגליתי אתכם מהלאה לדמשק אמר יהוה אלהי צבאות שמו פ
❮
❯