עמוס 1 : 1 (ALEP)
א דברי עמוס אשר היה בנקדים מתקוע  אשר חזה על ישראל בימי עזיה מלך יהודה ובימי ירבעם בן יואש מלך ישראל--שנתים לפני הרעש
עמוס 1 : 2 (ALEP)
ב ויאמר--יהוה מציון ישאג ומירושלם יתן קולו ואבלו נאות הרעים ויבש ראש הכרמל  פ
עמוס 1 : 3 (ALEP)
ג כה אמר יהוה על שלשה פשעי דמשק ועל ארבעה לא אשיבנו  על דושם בחרצות הברזל את הגלעד
עמוס 1 : 4 (ALEP)
ד ושלחתי אש בבית חזאל ואכלה ארמנות בן הדד
עמוס 1 : 5 (ALEP)
ה ושברתי בריח דמשק והכרתי יושב מבקעת און ותומך שבט מבית עדן וגלו עם ארם קירה אמר יהוה  פ
עמוס 1 : 6 (ALEP)
ו כה אמר יהוה על שלשה פשעי עזה ועל ארבעה לא אשיבנו  על הגלותם גלות שלמה להסגיר לאדום
עמוס 1 : 7 (ALEP)
ז ושלחתי אש בחומת עזה ואכלה ארמנתיה
עמוס 1 : 8 (ALEP)
ח והכרתי יושב מאשדוד ותומך שבט מאשקלון והשיבותי ידי על עקרון ואבדו שארית פלשתים--אמר אדני יהוה  פ
עמוס 1 : 9 (ALEP)
ט כה אמר יהוה על שלשה פשעי צר ועל ארבעה לא אשיבנו  על הסגירם גלות שלמה לאדום ולא זכרו ברית אחים
עמוס 1 : 10 (ALEP)
י ושלחתי אש בחומת צר ואכלה ארמנותיה  פ
עמוס 1 : 11 (ALEP)
יא כה אמר יהוה על שלשה פשעי אדום ועל ארבעה לא אשיבנו  על רדפו בחרב אחיו ושחת רחמיו ויטרף לעד אפו ועברתו שמרה נצח
עמוס 1 : 12 (ALEP)
יב ושלחתי אש בתימן ואכלה ארמנות בצרה  פ
עמוס 1 : 13 (ALEP)
יג כה אמר יהוה על שלשה פשעי בני עמון ועל ארבעה לא אשיבנו  על בקעם הרות הגלעד למען הרחיב את גבולם
עמוס 1 : 14 (ALEP)
יד והצתי אש בחומת רבה ואכלה ארמנותיה בתרועה ביום מלחמה בסער ביום סופה
עמוס 1 : 15 (ALEP)
טו והלך מלכם בגולה הוא ושריו יחדו אמר יהוה  פ

1 2 3 4 5 6 7 8 9 10 11 12 13 14 15