שמואל ב 6 : 1 (ALEP)
א ויסף עוד דוד את כל בחור בישראל שלשים אלף
שמואל ב 6 : 2 (ALEP)
ב ויקם וילך דוד וכל העם אשר אתו מבעלי יהודה--להעלות משם את ארון האלהים אשר נקרא שם שם יהוה צבאות ישב הכרבים עליו
שמואל ב 6 : 3 (ALEP)
ג וירכבו את ארון האלהים אל עגלה חדשה וישאהו מבית אבינדב אשר בגבעה ועזא ואחיו בני אבינדב נהגים את העגלה חדשה
שמואל ב 6 : 4 (ALEP)
ד וישאהו מבית אבינדב אשר בגבעה עם ארון האלהים ואחיו הלך לפני הארון
שמואל ב 6 : 5 (ALEP)
ה ודוד וכל בית ישראל משחקים לפני יהוה בכל עצי ברושים ובכנרות ובנבלים ובתפים ובמנענעים ובצלצלים
שמואל ב 6 : 6 (ALEP)
ו ויבאו עד גרן נכון וישלח עזה אל ארון האלהים ויאחז בו--כי שמטו הבקר
שמואל ב 6 : 7 (ALEP)
ז ויחר אף יהוה בעזה ויכהו שם האלהים על השל וימת שם עם ארון האלהים
שמואל ב 6 : 8 (ALEP)
ח ויחר לדוד על אשר פרץ יהוה פרץ בעזה ויקרא למקום ההוא פרץ עזה עד היום הזה
שמואל ב 6 : 9 (ALEP)
ט וירא דוד את יהוה ביום ההוא ויאמר איך יבוא אלי ארון יהוה
שמואל ב 6 : 10 (ALEP)
י ולא אבה דוד להסיר אליו את ארון יהוה--על עיר דוד ויטהו דוד בית עבד אדם הגתי
שמואל ב 6 : 11 (ALEP)
יא וישב ארון יהוה בית עבד אדם הגתי--שלשה חדשים ויברך יהוה את עבד אדם ואת כל ביתו
שמואל ב 6 : 12 (ALEP)
יב ויגד למלך דוד לאמר ברך יהוה את בית עבד אדם ואת כל אשר לו בעבור ארון האלהים וילך דוד ויעל את ארון האלהים מבית עבד אדם עיר דוד--בשמחה
שמואל ב 6 : 13 (ALEP)
יג ויהי כי צעדו נשאי ארון יהוה--ששה צעדים ויזבח שור ומריא
שמואל ב 6 : 14 (ALEP)
יד ודוד מכרכר בכל עז לפני יהוה ודוד חגור אפוד בד
שמואל ב 6 : 15 (ALEP)
טו ודוד וכל בית ישראל מעלים את ארון יהוה בתרועה ובקול שופר
שמואל ב 6 : 16 (ALEP)
טז והיה ארון יהוה בא עיר דוד ומיכל בת שאול נשקפה בעד החלון ותרא את המלך דוד מפזז ומכרכר לפני יהוה ותבז לו בלבה
שמואל ב 6 : 17 (ALEP)
יז ויבאו את ארון יהוה ויצגו אתו במקומו בתוך האהל אשר נטה לו דוד ויעל דוד עלות לפני יהוה ושלמים
שמואל ב 6 : 18 (ALEP)
יח ויכל דוד מהעלות העולה והשלמים ויברך את העם בשם יהוה צבאות
שמואל ב 6 : 19 (ALEP)
יט ויחלק לכל העם לכל המון ישראל למאיש ועד אשה לאיש חלת לחם אחת ואשפר אחד ואשישה אחת וילך כל העם איש לביתו
שמואל ב 6 : 20 (ALEP)
כ וישב דוד לברך את ביתו ס ותצא מיכל בת שאול לקראת דוד ותאמר מה נכבד היום מלך ישראל אשר נגלה היום לעיני אמהות עבדיו כהגלות נגלות אחד הרקים
שמואל ב 6 : 21 (ALEP)
כא ויאמר דוד אל מיכל לפני יהוה אשר בחר בי מאביך ומכל ביתו לצות אתי נגיד על עם יהוה על ישראל ושחקתי לפני יהוה
שמואל ב 6 : 22 (ALEP)
כב ונקלתי עוד מזאת והייתי שפל בעיני ועם האמהות אשר אמרת עמם אכבדה
שמואל ב 6 : 23 (ALEP)
כג ולמיכל בת שאול לא היה לה ילד--עד יום מותה פ
❮
❯