שמואל ב 20 : 1 (ALEP)
א ושם נקרא איש בליעל ושמו שבע בן בכרי--איש ימיני ויתקע בשפר ויאמר אין לנו חלק בדוד ולא נחלה לנו בבן ישי--איש לאהליו ישראל
שמואל ב 20 : 2 (ALEP)
ב ויעל כל איש ישראל מאחרי דוד אחרי שבע בן בכרי ואיש יהודה דבקו במלכם מן הירדן ועד ירושלם
שמואל ב 20 : 3 (ALEP)
ג ויבא דוד אל ביתו ירושלם ויקח המלך את עשר נשים פלגשים אשר הניח לשמר הבית ויתנם בית משמרת ויכלכלם ואליהם לא בא ותהיינה צררות עד יום מתן אלמנות חיות ס
שמואל ב 20 : 4 (ALEP)
ד ויאמר המלך אל עמשא הזעק לי את איש יהודה שלשת ימים ואתה פה עמד
שמואל ב 20 : 5 (ALEP)
ה וילך עמשא להזעיק את יהודה וייחר (ויוחר) מן המועד אשר יעדו ס
שמואל ב 20 : 6 (ALEP)
ו ויאמר דוד אל אבישי עתה ירע לנו שבע בן בכרי מן אבשלום אתה קח את עבדי אדניך ורדף אחריו--פן מצא לו ערים בצרות והציל עיננו
שמואל ב 20 : 7 (ALEP)
ז ויצאו אחריו אנשי יואב והכרתי והפלתי וכל הגברים ויצאו מירושלם לרדף אחרי שבע בן בכרי
שמואל ב 20 : 8 (ALEP)
ח הם עם האבן הגדולה אשר בגבעון ועמשא בא לפניהם ויואב חגור מדו לבשו ועלו חגור חרב מצמדת על מתניו בתערה והוא יצא ותפל ס
שמואל ב 20 : 9 (ALEP)
ט ויאמר יואב לעמשא השלום אתה אחי ותחז יד ימין יואב בזקן עמשא--לנשק לו
שמואל ב 20 : 10 (ALEP)
י ועמשא לא נשמר בחרב אשר ביד יואב ויכהו בה אל החמש וישפך מעיו ארצה ולא שנה לו--וימת ויואב ואבישי אחיו רדף אחרי שבע בן בכרי
שמואל ב 20 : 11 (ALEP)
יא ואיש עמד עליו מנערי יואב ויאמר מי אשר חפץ ביואב ומי אשר לדוד--אחרי יואב
שמואל ב 20 : 12 (ALEP)
יב ועמשא מתגלל בדם בתוך המסלה וירא האיש כי עמד כל העם ויסב את עמשא מן המסלה השדה וישלך עליו בגד כאשר ראה כל הבא עליו ועמד
שמואל ב 20 : 13 (ALEP)
יג כאשר הגה מן המסלה--עבר כל איש אחרי יואב לרדף אחרי שבע בן בכרי
שמואל ב 20 : 14 (ALEP)
יד ויעבר בכל שבטי ישראל אבלה ובית מעכה--וכל הברים ס ויקלהו (ויקהלו) ויבאו אף אחריו
שמואל ב 20 : 15 (ALEP)
טו ויבאו ויצרו עליו באבלה בית המעכה וישפכו סללה אל העיר ותעמד בחל וכל העם אשר את יואב משחיתם להפיל החומה
שמואל ב 20 : 16 (ALEP)
טז ותקרא אשה חכמה מן העיר שמעו שמעו אמרו נא אל יואב קרב עד הנה ואדברה אליך
שמואל ב 20 : 17 (ALEP)
יז ויקרב אליה ותאמר האשה האתה יואב ויאמר אני ותאמר לו שמע דברי אמתך ויאמר שמע אנכי
שמואל ב 20 : 18 (ALEP)
יח ותאמר לאמר דבר ידברו בראשנה לאמר שאול ישאלו באבל וכן התמו
שמואל ב 20 : 19 (ALEP)
יט אנכי שלמי אמוני ישראל אתה מבקש להמית עיר ואם בישראל--למה תבלע נחלת יהוה פ
שמואל ב 20 : 20 (ALEP)
כ ויען יואב ויאמר חלילה חלילה לי אם אבלע ואם אשחית
שמואל ב 20 : 21 (ALEP)
כא לא כן הדבר כי איש מהר אפרים שבע בן בכרי שמו נשא ידו במלך בדוד--תנו אתו לבדו ואלכה מעל העיר ותאמר האשה אל יואב הנה ראשו משלך אליך בעד החומה
שמואל ב 20 : 22 (ALEP)
כב ותבוא האשה אל כל העם בחכמתה ויכרתו את ראש שבע בן בכרי וישלכו אל יואב ויתקע בשפר ויפצו מעל העיר איש לאהליו ויואב שב ירושלם אל המלך ס
שמואל ב 20 : 23 (ALEP)
כג ויואב אל כל הצבא ישראל ובניה בן יהוידע על הכרי (הכרתי) ועל הפלתי
שמואל ב 20 : 24 (ALEP)
כד ואדרם על המס ויהושפט בן אחילוד המזכיר
שמואל ב 20 : 25 (ALEP)
כה ושיא (ושוא) ספר וצדוק ואביתר כהנים
שמואל ב 20 : 26 (ALEP)
כו וגם עירא היארי היה כהן לדוד ס
❮
❯
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26