שמואל ב 12 : 1 (ALEP)
א וישלח יהוה את נתן אל דוד ויבא אליו ויאמר לו שני אנשים היו בעיר אחת אחד עשיר ואחד ראש
שמואל ב 12 : 2 (ALEP)
ב לעשיר היה צאן ובקר--הרבה מאד
שמואל ב 12 : 3 (ALEP)
ג ולרש אין כל כי אם כבשה אחת קטנה אשר קנה ויחיה ותגדל עמו ועם בניו יחדו מפתו תאכל ומכסו תשתה ובחיקו תשכב ותהי לו כבת
שמואל ב 12 : 4 (ALEP)
ד ויבא הלך לאיש העשיר ויחמל לקחת מצאנו ומבקרו לעשות לארח הבא לו ויקח את כבשת האיש הראש ויעשה לאיש הבא אליו
שמואל ב 12 : 5 (ALEP)
ה ויחר אף דוד באיש מאד ויאמר אל נתן חי יהוה כי בן מות האיש העשה זאת
שמואל ב 12 : 6 (ALEP)
ו ואת הכבשה ישלם ארבעתים עקב אשר עשה את הדבר הזה ועל אשר לא חמל ס
שמואל ב 12 : 7 (ALEP)
ז ויאמר נתן אל דוד אתה האיש ס כה אמר יהוה אלהי ישראל אנכי משחתיך למלך על ישראל ואנכי הצלתיך מיד שאול
שמואל ב 12 : 8 (ALEP)
ח ואתנה לך את בית אדניך ואת נשי אדניך בחיקך ואתנה לך את בית ישראל ויהודה ואם מעט--ואספה לך כהנה וכהנה
שמואל ב 12 : 9 (ALEP)
ט מדוע בזית את דבר יהוה לעשות הרע בעינו (בעיני) את אוריה החתי הכית בחרב ואת אשתו לקחת לך לאשה ואתו הרגת בחרב בני עמון
שמואל ב 12 : 10 (ALEP)
י ועתה לא תסור חרב מביתך--עד עולם עקב כי בזתני ותקח את אשת אוריה החתי להיות לך לאשה ס
שמואל ב 12 : 11 (ALEP)
יא כה אמר יהוה הנני מקים עליך רעה מביתך ולקחתי את נשיך לעיניך ונתתי לרעיך ושכב עם נשיך לעיני השמש הזאת
שמואל ב 12 : 12 (ALEP)
יב כי אתה עשית בסתר ואני אעשה את הדבר הזה נגד כל ישראל ונגד השמש ס
שמואל ב 12 : 13 (ALEP)
יג ויאמר דוד אל נתן חטאתי ליהוה ס ויאמר נתן אל דוד גם יהוה העביר חטאתך--לא תמות
שמואל ב 12 : 14 (ALEP)
יד אפס כי נאץ נאצת את איבי יהוה בדבר הזה גם הבן הילוד לך--מות ימות
שמואל ב 12 : 15 (ALEP)
טו וילך נתן אל ביתו ויגף יהוה את הילד אשר ילדה אשת אוריה לדוד--ויאנש
שמואל ב 12 : 16 (ALEP)
טז ויבקש דוד את האלהים בעד הנער ויצם דוד צום ובא ולן ושכב ארצה
שמואל ב 12 : 17 (ALEP)
יז ויקמו זקני ביתו עליו להקימו מן הארץ ולא אבה ולא ברא אתם לחם
שמואל ב 12 : 18 (ALEP)
יח ויהי ביום השביעי וימת הילד ויראו עבדי דוד להגיד לו כי מת הילד כי אמרו הנה בהיות הילד חי דברנו אליו ולא שמע בקולנו ואיך נאמר אליו מת הילד ועשה רעה
שמואל ב 12 : 19 (ALEP)
יט וירא דוד כי עבדיו מתלחשים ויבן דוד כי מת הילד ויאמר דוד אל עבדיו המת הילד ויאמרו מת
שמואל ב 12 : 20 (ALEP)
כ ויקם דוד מהארץ וירחץ ויסך ויחלף שמלתו ויבא בית יהוה וישתחו ויבא אל ביתו וישאל וישימו לו לחם ויאכל
שמואל ב 12 : 21 (ALEP)
כא ויאמרו עבדיו אליו מה הדבר הזה אשר עשיתה בעבור הילד חי צמת ותבך וכאשר מת הילד קמת ותאכל לחם
שמואל ב 12 : 22 (ALEP)
כב ויאמר--בעוד הילד חי צמתי ואבכה כי אמרתי מי יודע יחנני (וחנני) יהוה וחי הילד
שמואל ב 12 : 23 (ALEP)
כג ועתה מת למה זה אני צם--האוכל להשיבו עוד אני הלך אליו והוא לא ישוב אלי
שמואל ב 12 : 24 (ALEP)
כד וינחם דוד את בת שבע אשתו ויבא אליה וישכב עמה ותלד בן ויקרא (ותקרא) את שמו שלמה ויהוה אהבו
שמואל ב 12 : 25 (ALEP)
כה וישלח ביד נתן הנביא ויקרא את שמו ידידיה--בעבור יהוה פ
שמואל ב 12 : 26 (ALEP)
כו וילחם יואב ברבת בני עמון וילכד את עיר המלוכה
שמואל ב 12 : 27 (ALEP)
כז וישלח יואב מלאכים אל דוד ויאמר נלחמתי ברבה גם לכדתי את עיר המים
שמואל ב 12 : 28 (ALEP)
כח ועתה אסף את יתר העם וחנה על העיר ולכדה פן אלכד אני את העיר ונקרא שמי עליה
שמואל ב 12 : 29 (ALEP)
כט ויאסף דוד את כל העם וילך רבתה וילחם בה וילכדה
שמואל ב 12 : 30 (ALEP)
ל ויקח את עטרת מלכם מעל ראשו ומשקלה ככר זהב ואבן יקרה ותהי על ראש דוד ושלל העיר הוציא הרבה מאד
שמואל ב 12 : 31 (ALEP)
לא ואת העם אשר בה הוציא וישם במגרה ובחרצי הברזל ובמגזרת הברזל והעביר אותם במלכן (במלבן) וכן יעשה לכל ערי בני עמון וישב דוד וכל העם ירושלם פ
❮
❯