שמואל ב 11 : 1 (ALEP)
א ויהי לתשובת השנה לעת צאת המלאכים וישלח דוד את יואב ואת עבדיו עמו ואת כל ישראל וישחתו את בני עמון ויצרו על רבה ודוד יושב בירושלם ס
שמואל ב 11 : 2 (ALEP)
ב ויהי לעת הערב ויקם דוד מעל משכבו ויתהלך על גג בית המלך וירא אשה רחצת מעל הגג והאשה טובת מראה מאד
שמואל ב 11 : 3 (ALEP)
ג וישלח דוד וידרש לאשה ויאמר הלוא זאת בת שבע בת אליעם--אשת אוריה החתי
שמואל ב 11 : 4 (ALEP)
ד וישלח דוד מלאכים ויקחה ותבוא אליו וישכב עמה והיא מתקדשת מטמאתה ותשב אל ביתה
שמואל ב 11 : 5 (ALEP)
ה ותהר האשה ותשלח ותגד לדוד ותאמר הרה אנכי
שמואל ב 11 : 6 (ALEP)
ו וישלח דוד אל יואב שלח אלי את אוריה החתי וישלח יואב את אוריה אל דוד
שמואל ב 11 : 7 (ALEP)
ז ויבא אוריה אליו וישאל דוד לשלום יואב ולשלום העם ולשלום המלחמה
שמואל ב 11 : 8 (ALEP)
ח ויאמר דוד לאוריה רד לביתך ורחץ רגליך ויצא אוריה מבית המלך ותצא אחריו משאת המלך
שמואל ב 11 : 9 (ALEP)
ט וישכב אוריה פתח בית המלך את כל עבדי אדניו ולא ירד אל ביתו
שמואל ב 11 : 10 (ALEP)
י ויגדו לדוד לאמר לא ירד אוריה אל ביתו ויאמר דוד אל אוריה הלוא מדרך אתה בא--מדוע לא ירדת אל ביתך
שמואל ב 11 : 11 (ALEP)
יא ויאמר אוריה אל דוד הארון וישראל ויהודה ישבים בסכות ואדני יואב ועבדי אדני על פני השדה חנים ואני אבוא אל ביתי לאכל ולשתות ולשכב עם אשתי חיך וחי נפשך אם אעשה את הדבר הזה
שמואל ב 11 : 12 (ALEP)
יב ויאמר דוד אל אוריה שב בזה גם היום--ומחר אשלחך וישב אוריה בירושלם ביום ההוא וממחרת
שמואל ב 11 : 13 (ALEP)
יג ויקרא לו דוד ויאכל לפניו וישת--וישכרהו ויצא בערב לשכב במשכבו עם עבדי אדניו ואל ביתו לא ירד
שמואל ב 11 : 14 (ALEP)
יד ויהי בבקר ויכתב דוד ספר אל יואב וישלח ביד אוריה
שמואל ב 11 : 15 (ALEP)
טו ויכתב בספר לאמר הבו את אוריה אל מול פני המלחמה החזקה ושבתם מאחריו ונכה ומת ס
שמואל ב 11 : 16 (ALEP)
טז ויהי בשמור יואב אל העיר ויתן את אוריה אל המקום אשר ידע כי אנשי חיל שם
שמואל ב 11 : 17 (ALEP)
יז ויצאו אנשי העיר וילחמו את יואב ויפל מן העם מעבדי דוד וימת גם אוריה החתי
שמואל ב 11 : 18 (ALEP)
יח וישלח יואב ויגד לדוד את כל דברי המלחמה
שמואל ב 11 : 19 (ALEP)
יט ויצו את המלאך לאמר ככלותך את כל דברי המלחמה--לדבר אל המלך
שמואל ב 11 : 20 (ALEP)
כ והיה אם תעלה חמת המלך ואמר לך מדוע נגשתם אל העיר להלחם הלוא ידעתם את אשר ירו מעל החומה
שמואל ב 11 : 21 (ALEP)
כא מי הכה את אבימלך בן ירבשת הלוא אשה השליכה עליו פלח רכב מעל החומה וימת בתבץ למה נגשתם אל החומה ואמרת--גם עבדך אוריה החתי מת
שמואל ב 11 : 22 (ALEP)
כב וילך המלאך ויבא ויגד לדוד את כל אשר שלחו יואב
שמואל ב 11 : 23 (ALEP)
כג ויאמר המלאך אל דוד כי גברו עלינו האנשים ויצאו אלינו השדה ונהיה עליהם עד פתח השער
שמואל ב 11 : 24 (ALEP)
כד ויראו המוראים אל עבדיך מעל החומה וימותו מעבדי המלך וגם עבדך אוריה החתי--מת ס
שמואל ב 11 : 25 (ALEP)
כה ויאמר דוד אל המלאך כה תאמר אל יואב אל ירע בעיניך את הדבר הזה--כי כזה וכזה תאכל החרב החזק מלחמתך אל העיר והרסה וחזקהו
שמואל ב 11 : 26 (ALEP)
כו ותשמע אשת אוריה כי מת אוריה אישה ותספד על בעלה
שמואל ב 11 : 27 (ALEP)
כז ויעבר האבל וישלח דוד ויאספה אל ביתו ותהי לו לאשה ותלד לו בן וירע הדבר אשר עשה דוד בעיני יהוה פ
❮
❯