שמואל ב 1 : 1 (ALEP)
א ויהי אחרי מות שאול ודוד שב מהכות את העמלק וישב דוד בצקלג ימים שנים
שמואל ב 1 : 2 (ALEP)
ב ויהי ביום השלישי והנה איש בא מן המחנה מעם שאול ובגדיו קרעים ואדמה על ראשו ויהי בבאו אל דוד ויפל ארצה וישתחו
שמואל ב 1 : 3 (ALEP)
ג ויאמר לו דוד אי מזה תבוא ויאמר אליו ממחנה ישראל נמלטתי
שמואל ב 1 : 4 (ALEP)
ד ויאמר אליו דוד מה היה הדבר הגד נא לי ויאמר אשר נס העם מן המלחמה וגם הרבה נפל מן העם וימתו וגם שאול ויהונתן בנו מתו
שמואל ב 1 : 5 (ALEP)
ה ויאמר דוד אל הנער המגיד לו איך ידעת כי מת שאול ויהונתן בנו
שמואל ב 1 : 6 (ALEP)
ו ויאמר הנער המגיד לו נקרא נקריתי בהר הגלבע והנה שאול נשען על חניתו והנה הרכב ובעלי הפרשים הדבקהו
שמואל ב 1 : 7 (ALEP)
ז ויפן אחריו ויראני ויקרא אלי ואמר הנני
שמואל ב 1 : 8 (ALEP)
ח ויאמר לי מי אתה ויאמר (ואמר) אליו עמלקי אנכי
שמואל ב 1 : 9 (ALEP)
ט ויאמר אלי עמד נא עלי ומתתני--כי אחזני השבץ כי כל עוד נפשי בי
שמואל ב 1 : 10 (ALEP)
י ואעמד עליו ואמתתהו--כי ידעתי כי לא יחיה אחרי נפלו ואקח הנזר אשר על ראשו ואצעדה אשר על זרעו ואביאם אל אדני הנה
שמואל ב 1 : 11 (ALEP)
יא ויחזק דוד בבגדו ויקרעם וגם כל האנשים אשר אתו
שמואל ב 1 : 12 (ALEP)
יב ויספדו ויבכו ויצמו עד הערב על שאול ועל יהונתן בנו ועל עם יהוה ועל בית ישראל--כי נפלו בחרב פ
שמואל ב 1 : 13 (ALEP)
יג ויאמר דוד אל הנער המגיד לו אי מזה אתה ויאמר בן איש גר עמלקי אנכי
שמואל ב 1 : 14 (ALEP)
יד ויאמר אליו דוד איך לא יראת לשלח ידך לשחת את משיח יהוה
שמואל ב 1 : 15 (ALEP)
טו ויקרא דוד לאחד מהנערים ויאמר גש פגע בו ויכהו וימת
שמואל ב 1 : 16 (ALEP)
טז ויאמר אליו דוד דמיך (דמך) על ראשך כי פיך ענה בך לאמר אנכי מתתי את משיח יהוה פ
שמואל ב 1 : 17 (ALEP)
יז ויקנן דוד את הקינה הזאת על שאול ועל יהונתן בנו
שמואל ב 1 : 18 (ALEP)
יח ויאמר ללמד בני יהודה קשת הנה כתובה על ספר הישר
שמואל ב 1 : 19 (ALEP)
יט הצבי ישראל על במותיך חלל איך נפלו גבורים
שמואל ב 1 : 20 (ALEP)
כ אל תגידו בגת אל תבשרו בחוצת אשקלון פן תשמחנה בנות פלשתים פן תעלזנה בנות הערלים
שמואל ב 1 : 21 (ALEP)
כא הרי בגלבע אל טל ואל מטר עליכם--ושדי תרומת כי שם נגעל מגן גבורים--מגן שאול בלי משיח בשמן
שמואל ב 1 : 22 (ALEP)
כב מדם חללים מחלב גבורים--קשת יהונתן לא נשוג אחור וחרב שאול לא תשוב ריקם
שמואל ב 1 : 23 (ALEP)
כג שאול ויהונתן הנאהבים והנעימם בחייהם ובמותם לא נפרדו מנשרים קלו מאריות גברו
שמואל ב 1 : 24 (ALEP)
כד בנות ישראל--אל שאול בכינה המלבשכם שני עם עדנים המעלה עדי זהב על לבושכן
שמואל ב 1 : 25 (ALEP)
כה איך נפלו גברים בתוך המלחמה--יהונתן על במותיך חלל
שמואל ב 1 : 26 (ALEP)
כו צר לי עליך אחי יהונתן--נעמת לי מאד נפלאתה אהבתך לי מאהבת נשים
שמואל ב 1 : 27 (ALEP)
כז איך נפלו גבורים ויאבדו כלי מלחמה פ
❮
❯