2 Kings 9 : 1 (ALEP)
א ואלישע הנביא קרא לאחד מבני הנביאים ויאמר לו חגר מתניך וקח פך השמן הזה בידך ולך רמת גלעד
2 Kings 9 : 2 (ALEP)
ב ובאת שמה וראה שם יהוא בן יהושפט בן נמשי ובאת והקמתו מתוך אחיו והביאת אתו חדר בחדר
2 Kings 9 : 3 (ALEP)
ג ולקחת פך השמן ויצקת על ראשו ואמרת כה אמר יהוה משחתיך למלך אל ישראל ופתחת הדלת ונסתה ולא תחכה
2 Kings 9 : 4 (ALEP)
ד וילך הנער הנער הנביא רמת גלעד
2 Kings 9 : 5 (ALEP)
ה ויבא והנה שרי החיל ישבים ויאמר דבר לי אליך השר ויאמר יהוא אל מי מכלנו ויאמר אליך השר
2 Kings 9 : 6 (ALEP)
ו ויקם ויבא הביתה ויצק השמן אל ראשו ויאמר לו כה אמר יהוה אלהי ישראל משחתיך למלך אל עם יהוה אל ישראל
2 Kings 9 : 7 (ALEP)
ז והכיתה--את בית אחאב אדניך ונקמתי דמי עבדי הנביאים ודמי כל עבדי יהוה--מיד איזבל
2 Kings 9 : 8 (ALEP)
ח ואבד כל בית אחאב והכרתי לאחאב משתין בקיר ועצור ועזוב בישראל
2 Kings 9 : 9 (ALEP)
ט ונתתי את בית אחאב כבית ירבעם בן נבט וכבית בעשא בן אחיה
2 Kings 9 : 10 (ALEP)
י ואת איזבל יאכלו הכלבים בחלק יזרעאל--ואין קבר ויפתח הדלת וינס
2 Kings 9 : 11 (ALEP)
יא ויהוא יצא אל עבדי אדניו ויאמר לו השלום מדוע בא המשגע הזה אליך ויאמר אליהם אתם ידעתם את האיש ואת שיחו
2 Kings 9 : 12 (ALEP)
יב ויאמרו שקר הגד נא לנו ויאמר כזאת וכזאת אמר אלי לאמר כה אמר יהוה משחתיך למלך אל ישראל
2 Kings 9 : 13 (ALEP)
יג וימהרו ויקחו איש בגדו וישימו תחתיו אל גרם המעלות ויתקעו בשופר ויאמרו מלך יהוא
2 Kings 9 : 14 (ALEP)
יד ויתקשר יהוא בן יהושפט בן נמשי--אל יורם ויורם היה שמר ברמת גלעד הוא וכל ישראל מפני חזאל מלך ארם
2 Kings 9 : 15 (ALEP)
טו וישב יהורם המלך להתרפא ביזרעאל מן המכים אשר יכהו ארמים בהלחמו את חזאל מלך ארם ויאמר יהוא אם יש נפשכם--אל יצא פליט מן העיר ללכת לגיד (להגיד) ביזרעאל
2 Kings 9 : 16 (ALEP)
טז וירכב יהוא וילך יזרעאלה כי יורם שכב שמה ואחזיה מלך יהודה ירד לראות את יורם
2 Kings 9 : 17 (ALEP)
יז והצפה עמד על המגדל ביזרעאל וירא את שפעת יהוא בבאו ויאמר שפעת אני ראה ויאמר יהורם קח רכב ושלח לקראתם--ויאמר השלום
2 Kings 9 : 18 (ALEP)
יח וילך רכב הסוס לקראתו ויאמר כה אמר המלך השלום ויאמר יהוא מה לך ולשלום סב אל אחרי ויגד הצפה לאמר בא המלאך עד הם ולא שב
2 Kings 9 : 19 (ALEP)
יט וישלח רכב סוס שני ויבא אלהם ויאמר כה אמר המלך שלום ויאמר יהוא מה לך ולשלום סב אל אחרי
2 Kings 9 : 20 (ALEP)
כ ויגד הצפה לאמר בא עד אליהם ולא שב והמנהג כמנהג יהוא בן נמשי--כי בשגעון ינהג
2 Kings 9 : 21 (ALEP)
כא ויאמר יהורם אסר ויאסר רכבו ויצא יהורם מלך ישראל ואחזיהו מלך יהודה איש ברכבו ויצאו לקראת יהוא וימצאהו בחלקת נבות היזרעאלי
2 Kings 9 : 22 (ALEP)
כב ויהי כראות יהורם את יהוא ויאמר השלום יהוא ויאמר מה השלום--עד זנוני איזבל אמך וכשפיה הרבים
2 Kings 9 : 23 (ALEP)
כג ויהפך יהורם ידיו וינס ויאמר אל אחזיהו מרמה אחזיה
2 Kings 9 : 24 (ALEP)
כד ויהוא מלא ידו בקשת ויך את יהורם בין זרעיו ויצא החצי מלבו ויכרע ברכבו
2 Kings 9 : 25 (ALEP)
כה ויאמר אל בדקר שלשה שא השלכהו בחלקת שדה נבות היזרעאלי כי זכר אני ואתה את רכבים צמדים אחרי אחאב אביו ויהוה נשא עליו את המשא הזה
2 Kings 9 : 26 (ALEP)
כו אם לא את דמי נבות ואת דמי בניו ראיתי אמש נאם יהוה ושלמתי לך בחלקה הזאת נאם יהוה ועתה שא השלכהו בחלקה--כדבר יהוה
2 Kings 9 : 27 (ALEP)
כז ואחזיה מלך יהודה ראה וינס דרך בית הגן וירדף אחריו יהוא ויאמר גם אתו הכהו אל המרכבה במעלה גור אשר את יבלעם וינס מגדו וימת שם
2 Kings 9 : 28 (ALEP)
כח וירכבו אתו עבדיו ירושלמה ויקברו אתו בקברתו עם אבתיו בעיר דוד {פ}
2 Kings 9 : 29 (ALEP)
כט ובשנת אחת עשרה שנה ליורם בן אחאב מלך אחזיה על יהודה
2 Kings 9 : 30 (ALEP)
ל ויבוא יהוא יזרעאלה ואיזבל שמעה ותשם בפוך עיניה ותיטב את ראשה ותשקף בעד החלון
2 Kings 9 : 31 (ALEP)
לא ויהוא בא בשער ותאמר השלום זמרי הרג אדניו
2 Kings 9 : 32 (ALEP)
לב וישא פניו אל החלון ויאמר מי אתי מי וישקיפו אליו שנים שלשה סריסים
2 Kings 9 : 33 (ALEP)
לג ויאמר שמטהו (שמטוה) וישמטוה ויז מדמה אל הקיר ואל הסוסים וירמסנה
2 Kings 9 : 34 (ALEP)
לד ויבא ויאכל וישת ויאמר פקדו נא את הארורה הזאת וקברוה--כי בת מלך היא
2 Kings 9 : 35 (ALEP)
לה וילכו לקברה ולא מצאו בה כי אם הגלגלת והרגלים--וכפות הידים
2 Kings 9 : 36 (ALEP)
לו וישבו ויגידו לו ויאמר דבר יהוה הוא אשר דבר ביד עבדו אליהו התשבי לאמר בחלק יזרעאל יאכלו הכלבים את בשר איזבל
2 Kings 9 : 37 (ALEP)
לז והית (והיתה) נבלת איזבל כדמן על פני השדה--בחלק יזרעאל אשר לא יאמרו זאת איזבל {ס}
❮
❯