מלכים ב 4 : 1 (ALEP)
א ואשה אחת מנשי בני הנביאים צעקה אל אלישע לאמר עבדך אישי מת ואתה ידעת כי עבדך היה ירא את יהוה והנשה--בא לקחת את שני ילדי לו לעבדים
מלכים ב 4 : 2 (ALEP)
ב ויאמר אליה אלישע מה אעשה לך הגידי לי מה יש לכי (לך) בבית ותאמר אין לשפחתך כל בבית כי אם אסוך שמן
מלכים ב 4 : 3 (ALEP)
ג ויאמר לכי שאלי לך כלים מן החוץ מאת כל שכנכי (שכניך)--כלים רקים אל תמעיטי
מלכים ב 4 : 4 (ALEP)
ד ובאת וסגרת הדלת בעדך ובעד בניך ויצקת על כל הכלים האלה והמלא תסיעי
מלכים ב 4 : 5 (ALEP)
ה ותלך מאתו ותסגר הדלת בעדה ובעד בניה הם מגישים אליה והיא מיצקת (מוצקת)
מלכים ב 4 : 6 (ALEP)
ו ויהי כמלאת הכלים ותאמר אל בנה הגישה אלי עוד כלי ויאמר אליה אין עוד כלי ויעמד השמן
מלכים ב 4 : 7 (ALEP)
ז ותבא ותגד לאיש האלהים ויאמר לכי מכרי את השמן ושלמי את נשיכי (נשיך) ואת בניכי (ובניך) תחיי בנותר פ
מלכים ב 4 : 8 (ALEP)
ח ויהי היום ויעבר אלישע אל שונם ושם אשה גדולה ותחזק בו לאכל לחם ויהי מדי עברו יסר שמה לאכל לחם
מלכים ב 4 : 9 (ALEP)
ט ותאמר אל אישה הנה נא ידעתי כי איש אלהים קדוש הוא--עבר עלינו תמיד
מלכים ב 4 : 10 (ALEP)
י נעשה נא עלית קיר קטנה ונשים לו שם מטה ושלחן וכסא ומנורה והיה בבאו אלינו יסור שמה
מלכים ב 4 : 11 (ALEP)
יא ויהי היום ויבא שמה ויסר אל העליה וישכב שמה
מלכים ב 4 : 12 (ALEP)
יב ויאמר אל גיחזי נערו קרא לשונמית הזאת ויקרא לה--ותעמד לפניו
מלכים ב 4 : 13 (ALEP)
יג ויאמר לו אמר נא אליה הנה חרדת אלינו את כל החרדה הזאת מה לעשות לך היש לדבר לך אל המלך או אל שר הצבא ותאמר בתוך עמי אנכי ישבת
מלכים ב 4 : 14 (ALEP)
יד ויאמר ומה לעשות לה ויאמר גיחזי אבל בן אין לה--ואישה זקן
מלכים ב 4 : 15 (ALEP)
טו ויאמר קרא לה ויקרא לה--ותעמד בפתח
מלכים ב 4 : 16 (ALEP)
טז ויאמר למועד הזה כעת חיה אתי (את) חבקת בן ותאמר אל אדני איש האלהים--אל תכזב בשפחתך
מלכים ב 4 : 17 (ALEP)
יז ותהר האשה ותלד בן למועד הזה כעת חיה אשר דבר אליה אלישע
מלכים ב 4 : 18 (ALEP)
יח ויגדל הילד ויהי היום ויצא אל אביו אל הקצרים
מלכים ב 4 : 19 (ALEP)
יט ויאמר אל אביו ראשי ראשי ויאמר אל הנער שאהו אל אמו
מלכים ב 4 : 20 (ALEP)
כ וישאהו--ויביאהו אל אמו וישב על ברכיה עד הצהרים וימת
מלכים ב 4 : 21 (ALEP)
כא ותעל ותשכבהו על מטת איש האלהים ותסגר בעדו ותצא
מלכים ב 4 : 22 (ALEP)
כב ותקרא אל אישה ותאמר שלחה נא לי אחד מן הנערים ואחת האתנות וארוצה עד איש האלהים ואשובה
מלכים ב 4 : 23 (ALEP)
כג ויאמר מדוע אתי (את) הלכתי (הלכת) אליו היום--לא חדש ולא שבת ותאמר שלום
מלכים ב 4 : 24 (ALEP)
כד ותחבש האתון ותאמר אל נערה נהג ולך אל תעצר לי לרכב כי אם אמרתי לך
מלכים ב 4 : 25 (ALEP)
כה ותלך ותבא אל איש האלהים--אל הר הכרמל ויהי כראות איש האלהים אתה מנגד ויאמר אל גיחזי נערו הנה השונמית הלז
מלכים ב 4 : 26 (ALEP)
כו עתה רוץ נא לקראתה ואמר לה השלום לך השלום לאישך השלום לילד ותאמר שלום
מלכים ב 4 : 27 (ALEP)
כז ותבא אל איש האלהים אל ההר ותחזק ברגליו ויגש גיחזי להדפה ויאמר איש האלהים הרפה לה כי נפשה מרה לה ויהוה העלים ממני ולא הגיד לי
מלכים ב 4 : 28 (ALEP)
כח ותאמר השאלתי בן מאת אדני הלא אמרתי לא תשלה אתי
מלכים ב 4 : 29 (ALEP)
כט ויאמר לגיחזי חגר מתניך וקח משענתי בידך ולך כי תמצא איש לא תברכנו וכי יברכך איש לא תעננו ושמת משענתי על פני הנער
מלכים ב 4 : 30 (ALEP)
ל ותאמר אם הנער חי יהוה וחי נפשך אם אעזבך ויקם וילך אחריה
מלכים ב 4 : 31 (ALEP)
לא וגחזי עבר לפניהם וישם את המשענת על פני הנער ואין קול ואין קשב וישב לקראתו ויגד לו לאמר לא הקיץ הנער
מלכים ב 4 : 32 (ALEP)
לב ויבא אלישע הביתה והנה הנער מת משכב על מטתו
מלכים ב 4 : 33 (ALEP)
לג ויבא ויסגר הדלת בעד שניהם ויתפלל אל יהוה
מלכים ב 4 : 34 (ALEP)
לד ויעל וישכב על הילד וישם פיו על פיו ועיניו על עיניו וכפיו על כפו ויגהר עליו ויחם בשר הילד
מלכים ב 4 : 35 (ALEP)
לה וישב וילך בבית אחת הנה ואחת הנה ויעל ויגהר עליו ויזורר הנער עד שבע פעמים ויפקח הנער את עיניו
מלכים ב 4 : 36 (ALEP)
לו ויקרא אל גיחזי ויאמר קרא אל השנמית הזאת ויקראה ותבא אליו ויאמר שאי בנך
מלכים ב 4 : 37 (ALEP)
לז ותבא ותפל על רגליו ותשתחו ארצה ותשא את בנה ותצא פ
מלכים ב 4 : 38 (ALEP)
לח ואלישע שב הגלגלה והרעב בארץ ובני הנביאים ישבים לפניו ויאמר לנערו שפת הסיר הגדולה ובשל נזיד לבני הנביאים
מלכים ב 4 : 39 (ALEP)
לט ויצא אחד אל השדה ללקט ארת וימצא גפן שדה וילקט ממנו פקעת שדה מלא בגדו ויבא ויפלח אל סיר הנזיד--כי לא ידעו
מלכים ב 4 : 40 (ALEP)
מ ויצקו לאנשים לאכול ויהי כאכלם מהנזיד והמה צעקו ויאמרו מות בסיר איש האלהים ולא יכלו לאכל
מלכים ב 4 : 41 (ALEP)
מא ויאמר וקחו קמח וישלך אל הסיר ויאמר צק לעם ויאכלו ולא היה דבר רע בסיר ס
מלכים ב 4 : 42 (ALEP)
מב ואיש בא מבעל שלשה ויבא לאיש האלהים לחם בכורים עשרים לחם שערים וכרמל בצקלנו ויאמר תן לעם ויאכלו
מלכים ב 4 : 43 (ALEP)
מג ויאמר משרתו מה אתן זה לפני מאה איש ויאמר תן לעם ויאכלו--כי כה אמר יהוה אכל והותר
מלכים ב 4 : 44 (ALEP)
מד ויתן לפניהם ויאכלו ויותרו כדבר יהוה פ
❮
❯