מלכים ב 25 : 1 (ALEP)
א ויהי בשנת התשיעית למלכו בחדש העשירי בעשור לחדש בא נבכדנאצר מלך בבל הוא וכל חילו על ירושלם ויחן עליה ויבנו עליה דיק סביב
מלכים ב 25 : 2 (ALEP)
ב ותבא העיר במצור עד עשתי עשרה שנה למלך צדקיהו
מלכים ב 25 : 3 (ALEP)
ג בתשעה לחדש ויחזק הרעב בעיר ולא היה לחם לעם הארץ
מלכים ב 25 : 4 (ALEP)
ד ותבקע העיר וכל אנשי המלחמה הלילה דרך שער בין החמתים אשר על גן המלך וכשדים על העיר סביב וילך דרך הערבה
מלכים ב 25 : 5 (ALEP)
ה וירדפו חיל כשדים אחר המלך וישגו אתו בערבות ירחו וכל חילו--נפצו מעליו
מלכים ב 25 : 6 (ALEP)
ו ויתפשו את המלך ויעלו אתו אל מלך בבל רבלתה וידברו אתו משפט
מלכים ב 25 : 7 (ALEP)
ז ואת בני צדקיהו שחטו לעיניו ואת עיני צדקיהו עור ויאסרהו בנחשתים ויבאהו בבל ס
מלכים ב 25 : 8 (ALEP)
ח ובחדש החמישי בשבעה לחדש--היא שנת תשע עשרה שנה למלך נבכדנאצר מלך בבל בא נבוזראדן רב טבחים עבד מלך בבל--ירושלם
מלכים ב 25 : 9 (ALEP)
ט וישרף את בית יהוה ואת בית המלך ואת כל בתי ירושלם ואת כל בית גדול שרף באש
מלכים ב 25 : 10 (ALEP)
י ואת חומת ירושלם סביב--נתצו כל חיל כשדים אשר רב טבחים
מלכים ב 25 : 11 (ALEP)
יא ואת יתר העם הנשארים בעיר ואת הנפלים אשר נפלו על המלך בבל ואת יתר ההמון--הגלה נבוזראדן רב טבחים
מלכים ב 25 : 12 (ALEP)
יב ומדלת הארץ השאיר רב טבחים לכרמים וליגבים
מלכים ב 25 : 13 (ALEP)
יג ואת עמודי הנחשת אשר בית יהוה ואת המכנות ואת ים הנחשת אשר בבית יהוה--שברו כשדים וישאו את נחשתם בבלה
מלכים ב 25 : 14 (ALEP)
יד ואת הסירת ואת היעים ואת המזמרות ואת הכפות ואת כל כלי הנחשת אשר ישרתו בם--לקחו
מלכים ב 25 : 15 (ALEP)
טו ואת המחתות ואת המזרקות אשר זהב זהב ואשר כסף כסף--לקח רב טבחים
מלכים ב 25 : 16 (ALEP)
טז העמודים שנים הים האחד והמכנות אשר עשה שלמה לבית יהוה--לא היה משקל לנחשת כל הכלים האלה
מלכים ב 25 : 17 (ALEP)
יז שמנה עשרה אמה קומת העמוד האחד וכתרת עליו נחשת וקומת הכתרת שלש אמה (אמות) ושבכה ורמנים על הכתרת סביב הכל נחשת וכאלה לעמוד השני על השבכה
מלכים ב 25 : 18 (ALEP)
יח ויקח רב טבחים את שריה כהן הראש ואת צפניהו כהן משנה ואת שלשת שמרי הסף
מלכים ב 25 : 19 (ALEP)
יט ומן העיר לקח סריס אחד אשר הוא פקיד על אנשי המלחמה וחמשה אנשים מראי פני המלך אשר נמצאו בעיר ואת הספר שר הצבא המצבא את עם הארץ וששים איש מעם הארץ הנמצאים בעיר
מלכים ב 25 : 20 (ALEP)
כ ויקח אתם נבוזראדן רב טבחים וילך אתם על מלך בבל רבלתה
מלכים ב 25 : 21 (ALEP)
כא ויך אתם מלך בבל וימיתם ברבלה בארץ חמת ויגל יהודה מעל אדמתו
מלכים ב 25 : 22 (ALEP)
כב והעם הנשאר בארץ יהודה אשר השאיר נבוכדנאצר מלך בבל--ויפקד עליהם את גדליהו בן אחיקם בן שפן
מלכים ב 25 : 23 (ALEP)
כג וישמעו כל שרי החילים המה והאנשים כי הפקיד מלך בבל את גדליהו ויבאו אל גדליהו המצפה וישמעאל בן נתניה ויוחנן בן קרח ושריה בן תנחמת הנטפתי ויאזניהו בן המעכתי--המה ואנשיהם
מלכים ב 25 : 24 (ALEP)
כד וישבע להם גדליהו ולאנשיהם ויאמר להם אל תיראו מעבדי הכשדים שבו בארץ ועבדו את מלך בבל--ויטב לכם פ
מלכים ב 25 : 25 (ALEP)
כה ויהי בחדש השביעי בא ישמעאל בן נתניה בן אלישמע מזרע המלוכה ועשרה אנשים אתו ויכו את גדליהו וימת ואת היהודים ואת הכשדים אשר היו אתו במצפה
מלכים ב 25 : 26 (ALEP)
כו ויקמו כל העם מקטן ועד גדול ושרי החילים ויבאו מצרים כי יראו מפני כשדים ס
מלכים ב 25 : 27 (ALEP)
כז ויהי בשלשים ושבע שנה לגלות יהויכין מלך יהודה בשנים עשר חדש בעשרים ושבעה לחדש נשא אויל מרדך מלך בבל בשנת מלכו את ראש יהויכין מלך יהודה--מבית כלא
מלכים ב 25 : 28 (ALEP)
כח וידבר אתו טבות ויתן את כסאו מעל כסא המלכים אשר אתו בבבל
מלכים ב 25 : 29 (ALEP)
כט ושנא את בגדי כלאו ואכל לחם תמיד לפניו כל ימי חייו
מלכים ב 25 : 30 (ALEP)
ל וארחתו ארחת תמיד נתנה לו מאת המלך--דבר יום ביומו כל ימי חיו ש
❮
❯