מלכים ב 20 : 1 (ALEP)
א בימים ההם חלה חזקיהו למות ויבא אליו ישעיהו בן אמוץ הנביא ויאמר אליו כה אמר יהוה צו לביתך--כי מת אתה ולא תחיה
מלכים ב 20 : 2 (ALEP)
ב ויסב את פניו אל הקיר ויתפלל--אל יהוה לאמר
מלכים ב 20 : 3 (ALEP)
ג אנה יהוה זכר נא את אשר התהלכתי לפניך באמת ובלבב שלם והטוב בעיניך עשיתי ויבך חזקיהו בכי גדול  ס
מלכים ב 20 : 4 (ALEP)
ד ויהי ישעיהו--לא יצא העיר (חצר) התיכנה ודבר יהוה--היה אליו לאמר
מלכים ב 20 : 5 (ALEP)
ה שוב ואמרת אל חזקיהו נגיד עמי כה אמר יהוה אלהי דוד אביך שמעתי את תפלתך ראיתי את דמעתך הנני רפא לך--ביום השלישי תעלה בית יהוה
מלכים ב 20 : 6 (ALEP)
ו והספתי על ימיך חמש עשרה שנה ומכף מלך אשור אצילך ואת העיר הזאת וגנותי על העיר הזאת--למעני ולמען דוד עבדי
מלכים ב 20 : 7 (ALEP)
ז ויאמר ישעיהו קחו דבלת תאנים ויקחו וישימו על השחין ויחי
מלכים ב 20 : 8 (ALEP)
ח ויאמר חזקיהו אל ישעיהו מה אות כי ירפא יהוה לי ועליתי ביום השלישי בית יהוה
מלכים ב 20 : 9 (ALEP)
ט ויאמר ישעיהו זה לך האות מאת יהוה כי יעשה יהוה את הדבר אשר דבר  הלך הצל עשר מעלות אם ישוב עשר מעלות
מלכים ב 20 : 10 (ALEP)
י ויאמר יחזקיהו נקל לצל לנטות עשר מעלות לא כי ישוב הצל אחרנית עשר מעלות
מלכים ב 20 : 11 (ALEP)
יא ויקרא ישעיהו הנביא אל יהוה וישב את הצל במעלות אשר ירדה במעלות אחז אחרנית--עשר מעלות  פ
מלכים ב 20 : 12 (ALEP)
יב בעת ההיא שלח בראדך בלאדן בן בלאדן מלך בבל ספרים ומנחה--אל חזקיהו  כי שמע כי חלה חזקיהו
מלכים ב 20 : 13 (ALEP)
יג וישמע עליהם חזקיהו ויראם את כל בית נכתה את הכסף ואת הזהב ואת הבשמים ואת שמן הטוב ואת בית כליו ואת כל אשר נמצא באוצרתיו  לא היה דבר אשר לא הראם חזקיהו בביתו--ובכל ממשלתו
מלכים ב 20 : 14 (ALEP)
יד ויבא ישעיהו הנביא אל המלך חזקיהו ויאמר אליו מה אמרו האנשים האלה ומאין יבאו אליך ויאמר חזקיהו מארץ רחוקה באו מבבל
מלכים ב 20 : 15 (ALEP)
טו ויאמר מה ראו בביתך ויאמר חזקיהו את כל אשר בביתי ראו--לא היה דבר אשר לא הראיתם באצרתי
מלכים ב 20 : 16 (ALEP)
טז ויאמר ישעיהו אל חזקיהו  שמע דבר יהוה
מלכים ב 20 : 17 (ALEP)
יז הנה ימים באים ונשא כל אשר בביתך ואשר אצרו אבתיך עד היום הזה בבלה  לא יותר דבר אמר יהוה
מלכים ב 20 : 18 (ALEP)
יח ומבניך אשר יצאו ממך אשר תוליד--יקח (יקחו) והיו סריסים בהיכל מלך בבל
מלכים ב 20 : 19 (ALEP)
יט ויאמר חזקיהו אל ישעיהו טוב דבר יהוה אשר דברת ויאמר הלוא אם שלום ואמת יהיה בימי
מלכים ב 20 : 20 (ALEP)
כ ויתר דברי חזקיהו וכל גבורתו ואשר עשה את הברכה ואת התעלה ויבא את המים העירה  הלא הם כתובים על ספר דברי הימים--למלכי יהודה
מלכים ב 20 : 21 (ALEP)
כא וישכב חזקיהו עם אבתיו וימלך מנשה בנו תחתיו  פ

1 2 3 4 5 6 7 8 9 10 11 12 13 14 15 16 17 18 19 20 21