מלכים ב 2 : 1 (ALEP)
א ויהי בהעלות יהוה את אליהו בסערה השמים וילך אליהו ואלישע מן הגלגל
מלכים ב 2 : 2 (ALEP)
ב ויאמר אליהו אל אלישע שב נא פה כי יהוה שלחני עד בית אל ויאמר אלישע חי יהוה וחי נפשך אם אעזבך וירדו בית אל
מלכים ב 2 : 3 (ALEP)
ג ויצאו בני הנביאים אשר בית אל אל אלישע ויאמרו אליו הידעת כי היום יהוה לקח את אדניך מעל ראשך ויאמר גם אני ידעתי החשו
מלכים ב 2 : 4 (ALEP)
ד ויאמר לו אליהו אלישע שב נא פה כי יהוה שלחני יריחו ויאמר חי יהוה וחי נפשך אם אעזבך ויבאו יריחו
מלכים ב 2 : 5 (ALEP)
ה ויגשו בני הנביאים אשר ביריחו אל אלישע ויאמרו אליו הידעת כי היום יהוה לקח את אדניך מעל ראשך ויאמר גם אני ידעתי החשו
מלכים ב 2 : 6 (ALEP)
ו ויאמר לו אליהו שב נא פה כי יהוה שלחני הירדנה ויאמר חי יהוה וחי נפשך אם אעזבך וילכו שניהם
מלכים ב 2 : 7 (ALEP)
ז וחמשים איש מבני הנביאים הלכו ויעמדו מנגד מרחוק ושניהם עמדו על הירדן
מלכים ב 2 : 8 (ALEP)
ח ויקח אליהו את אדרתו ויגלם ויכה את המים ויחצו הנה והנה ויעברו שניהם בחרבה
מלכים ב 2 : 9 (ALEP)
ט ויהי כעברם ואליהו אמר אל אלישע שאל מה אעשה לך בטרם אלקח מעמך ויאמר אלישע ויהי נא פי שנים ברוחך אלי
מלכים ב 2 : 10 (ALEP)
י ויאמר הקשית לשאול אם תראה אתי לקח מאתך יהי לך כן ואם אין לא יהיה
מלכים ב 2 : 11 (ALEP)
יא ויהי המה הלכים הלוך ודבר והנה רכב אש וסוסי אש ויפרדו בין שניהם ויעל אליהו בסערה השמים
מלכים ב 2 : 12 (ALEP)
יב ואלישע ראה והוא מצעק אבי אבי רכב ישראל ופרשיו ולא ראהו עוד ויחזק בבגדיו ויקרעם לשנים קרעים
מלכים ב 2 : 13 (ALEP)
יג וירם את אדרת אליהו אשר נפלה מעליו וישב ויעמד על שפת הירדן
מלכים ב 2 : 14 (ALEP)
יד ויקח את אדרת אליהו אשר נפלה מעליו ויכה את המים ויאמר איה יהוה אלהי אליהו אף הוא ויכה את המים ויחצו הנה והנה ויעבר אלישע
מלכים ב 2 : 15 (ALEP)
טו ויראהו בני הנביאים אשר ביריחו מנגד ויאמרו נחה רוח אליהו על אלישע ויבאו לקראתו וישתחוו לו ארצה
מלכים ב 2 : 16 (ALEP)
טז ויאמרו אליו הנה נא יש את עבדיך חמשים אנשים בני חיל ילכו נא ויבקשו את אדניך--פן נשאו רוח יהוה וישלכהו באחד ההרים או באחת הגיאות (הגיאיות) ויאמר לא תשלחו
מלכים ב 2 : 17 (ALEP)
יז ויפצרו בו עד בש ויאמר שלחו וישלחו חמשים איש ויבקשו שלשה ימים ולא מצאהו
מלכים ב 2 : 18 (ALEP)
יח וישבו אליו והוא ישב ביריחו ויאמר אלהם הלא אמרתי אליכם אל תלכו {ס}
מלכים ב 2 : 19 (ALEP)
יט ויאמרו אנשי העיר אל אלישע הנה נא מושב העיר טוב כאשר אדני ראה והמים רעים והארץ משכלת
מלכים ב 2 : 20 (ALEP)
כ ויאמר קחו לי צלחית חדשה ושימו שם מלח ויקחו אליו
מלכים ב 2 : 21 (ALEP)
כא ויצא אל מוצא המים וישלך שם מלח ויאמר כה אמר יהוה רפאתי למים האלה--לא יהיה משם עוד מות ומשכלת
מלכים ב 2 : 22 (ALEP)
כב וירפו המים עד היום הזה כדבר אלישע אשר דבר {פ}
מלכים ב 2 : 23 (ALEP)
כג ויעל משם בית אל והוא עלה בדרך ונערים קטנים יצאו מן העיר ויתקלסו בו ויאמרו לו עלה קרח עלה קרח
מלכים ב 2 : 24 (ALEP)
כד ויפן אחריו ויראם ויקללם בשם יהוה ותצאנה שתים דבים מן היער ותבקענה מהם ארבעים ושני ילדים
מלכים ב 2 : 25 (ALEP)
כה וילך משם אל הר הכרמל ומשם שב שמרון {פ}
❮
❯