מלכים ב 19 : 1 (ALEP)
א ויהי כשמע המלך חזקיהו ויקרע את בגדיו ויתכס בשק ויבא בית יהוה
מלכים ב 19 : 2 (ALEP)
ב וישלח את אליקים אשר על הבית ושבנא הספר ואת זקני הכהנים מתכסים בשקים--אל ישעיהו הנביא בן אמוץ
מלכים ב 19 : 3 (ALEP)
ג ויאמרו אליו כה אמר חזקיהו יום צרה ותוכחה ונאצה היום הזה כי באו בנים עד משבר וכח אין ללדה
מלכים ב 19 : 4 (ALEP)
ד אולי ישמע יהוה אלהיך את כל דברי רבשקה אשר שלחו מלך אשור אדניו לחרף אלהים חי והוכיח בדברים אשר שמע יהוה אלהיך ונשאת תפלה בעד השארית הנמצאה
מלכים ב 19 : 5 (ALEP)
ה ויבאו עבדי המלך חזקיהו--אל ישעיהו
מלכים ב 19 : 6 (ALEP)
ו ויאמר להם ישעיהו כה תאמרון אל אדניכם כה אמר יהוה אל תירא מפני הדברים אשר שמעת אשר גדפו נערי מלך אשור אתי
מלכים ב 19 : 7 (ALEP)
ז הנני נתן בו רוח ושמע שמועה ושב לארצו והפלתיו בחרב בארצו
מלכים ב 19 : 8 (ALEP)
ח וישב רבשקה וימצא את מלך אשור נלחם על לבנה כי שמע כי נסע מלכיש
מלכים ב 19 : 9 (ALEP)
ט וישמע אל תרהקה מלך כוש לאמר הנה יצא להלחם אתך וישב וישלח מלאכים אל חזקיהו לאמר
מלכים ב 19 : 10 (ALEP)
י כה תאמרון אל חזקיהו מלך יהודה לאמר אל ישאך אלהיך אשר אתה בטח בו לאמר לא תנתן ירושלם ביד מלך אשור
מלכים ב 19 : 11 (ALEP)
יא הנה אתה שמעת את אשר עשו מלכי אשור לכל הארצות--להחרימם ואתה תנצל
מלכים ב 19 : 12 (ALEP)
יב ההצילו אתם אלהי הגוים אשר שחתו אבותי את גוזן ואת חרן ורצף ובני עדן אשר בתלאשר
מלכים ב 19 : 13 (ALEP)
יג איו מלך חמת ומלך ארפד ומלך לעיר ספרוים הנע ועוה
מלכים ב 19 : 14 (ALEP)
יד ויקח חזקיהו את הספרים מיד המלאכים ויקראם ויעל בית יהוה ויפרשהו חזקיהו לפני יהוה פ
מלכים ב 19 : 15 (ALEP)
טו ויתפלל חזקיהו לפני יהוה ויאמר יהוה אלהי ישראל ישב הכרבים אתה הוא האלהים לבדך לכל ממלכות הארץ אתה עשית את השמים ואת הארץ
מלכים ב 19 : 16 (ALEP)
טז הטה יהוה אזנך ושמע פקח יהוה עיניך וראה ושמע את דברי סנחריב אשר שלחו לחרף אלהים חי
מלכים ב 19 : 17 (ALEP)
יז אמנם יהוה החריבו מלכי אשור את הגוים--ואת ארצם
מלכים ב 19 : 18 (ALEP)
יח ונתנו את אלהיהם באש כי לא אלהים המה כי אם מעשה ידי אדם עץ ואבן--ויאבדום
מלכים ב 19 : 19 (ALEP)
יט ועתה יהוה אלהינו הושיענו נא מידו וידעו כל ממלכות הארץ כי אתה יהוה אלהים לבדך ס
מלכים ב 19 : 20 (ALEP)
כ וישלח ישעיהו בן אמוץ אל חזקיהו לאמר כה אמר יהוה אלהי ישראל אשר התפללת אלי אל סנחרב מלך אשור שמעתי
מלכים ב 19 : 21 (ALEP)
כא זה הדבר אשר דבר יהוה עליו בזה לך לעגה לך בתולת בת ציון--אחריך ראש הניעה בת ירושלם
מלכים ב 19 : 22 (ALEP)
כב את מי חרפת וגדפת ועל מי הרימות קול ותשא מרום עיניך על קדוש ישראל
מלכים ב 19 : 23 (ALEP)
כג ביד מלאכיך חרפת אדני ותאמר ברכב (ברב) רכבי אני עליתי מרום הרים ירכתי לבנון ואכרת קומת ארזיו מבחור ברשיו ואבואה מלון קצה יער כרמלו
מלכים ב 19 : 24 (ALEP)
כד אני קרתי ושתיתי מים זרים ואחרב בכף פעמי כל יארי מצור
מלכים ב 19 : 25 (ALEP)
כה הלא שמעת למרחוק אתה עשיתי למימי קדם ויצרתיה עתה הביאתיה--ותהי להשות גלים נצים ערים בצרות
מלכים ב 19 : 26 (ALEP)
כו וישביהן קצרי יד--חתו ויבשו היו עשב שדה וירק דשא חציר גגות ושדפה לפני קמה
מלכים ב 19 : 27 (ALEP)
כז ושבתך וצאתך ובאך ידעתי ואת התרגזך אלי
מלכים ב 19 : 28 (ALEP)
כח יען התרגזך אלי ושאננך עלה באזני--ושמתי חחי באפך ומתגי בשפתיך והשבתיך בדרך אשר באת בה
מלכים ב 19 : 29 (ALEP)
כט וזה לך האות--אכול השנה ספיח ובשנה השנית סחיש ובשנה השלישית זרעו וקצרו ונטעו כרמים--ואכלו פרים
מלכים ב 19 : 30 (ALEP)
ל ויספה פליטת בית יהודה הנשארה--שרש למטה ועשה פרי למעלה
מלכים ב 19 : 31 (ALEP)
לא כי מירושלם תצא שארית ופליטה מהר ציון קנאת יהוה (צבאות) תעשה זאת ס
מלכים ב 19 : 32 (ALEP)
לב לכן כה אמר יהוה אל מלך אשור לא יבא אל העיר הזאת ולא יורה שם חץ ולא יקדמנה מגן ולא ישפך עליה סללה
מלכים ב 19 : 33 (ALEP)
לג בדרך אשר יבא בה ישוב ואל העיר הזאת לא יבא נאם יהוה
מלכים ב 19 : 34 (ALEP)
לד וגנותי אל העיר הזאת להושיעה--למעני ולמען דוד עבדי
מלכים ב 19 : 35 (ALEP)
לה ויהי בלילה ההוא ויצא מלאך יהוה ויך במחנה אשור מאה שמונים וחמשה אלף וישכימו בבקר והנה כלם פגרים מתים
מלכים ב 19 : 36 (ALEP)
לו ויסע וילך וישב סנחריב מלך אשור וישב בנינוה
מלכים ב 19 : 37 (ALEP)
לז ויהי הוא משתחוה בית נסרך אלהיו ואדרמלך ושראצר (בניו) הכהו בחרב והמה נמלטו ארץ אררט וימלך אסר חדן בנו תחתיו פ
❮
❯