מלכים ב 15 : 1 (ALEP)
א בשנת עשרים ושבע שנה לירבעם מלך ישראל מלך עזריה בן אמציה מלך יהודה
מלכים ב 15 : 2 (ALEP)
ב בן שש עשרה שנה היה במלכו וחמשים ושתים שנה מלך בירושלם ושם אמו יכליהו מירושלם
מלכים ב 15 : 3 (ALEP)
ג ויעש הישר בעיני יהוה ככל אשר עשה אמציהו אביו
מלכים ב 15 : 4 (ALEP)
ד רק הבמות לא סרו עוד העם מזבחים ומקטרים בבמות
מלכים ב 15 : 5 (ALEP)
ה וינגע יהוה את המלך ויהי מצרע עד יום מתו וישב בבית החפשית ויותם בן המלך על הבית שפט את עם הארץ
מלכים ב 15 : 6 (ALEP)
ו ויתר דברי עזריהו וכל אשר עשה הלא הם כתובים על ספר דברי הימים--למלכי יהודה
מלכים ב 15 : 7 (ALEP)
ז וישכב עזריה עם אבתיו ויקברו אתו עם אבתיו בעיר דוד וימלך יותם בנו תחתיו פ
מלכים ב 15 : 8 (ALEP)
ח בשנת שלשים ושמנה שנה לעזריהו מלך יהודה מלך זכריהו בן ירבעם על ישראל בשמרון--ששה חדשים
מלכים ב 15 : 9 (ALEP)
ט ויעש הרע בעיני יהוה כאשר עשו אבתיו לא סר מחטאות ירבעם בן נבט אשר החטיא את ישראל
מלכים ב 15 : 10 (ALEP)
י ויקשר עליו שלם בן יבש ויכהו קבל עם וימיתהו וימלך תחתיו
מלכים ב 15 : 11 (ALEP)
יא ויתר דברי זכריה הנם כתובים על ספר דברי הימים--למלכי ישראל
מלכים ב 15 : 12 (ALEP)
יב הוא דבר יהוה אשר דבר אל יהוא לאמר בני רביעים ישבו לך על כסא ישראל ויהי כן פ
מלכים ב 15 : 13 (ALEP)
יג שלום בן יביש מלך בשנת שלשים ותשע שנה לעזיה מלך יהודה וימלך ירח ימים בשמרון
מלכים ב 15 : 14 (ALEP)
יד ויעל מנחם בן גדי מתרצה ויבא שמרון ויך את שלום בן יביש בשמרון וימיתהו וימלך תחתיו
מלכים ב 15 : 15 (ALEP)
טו ויתר דברי שלום וקשרו אשר קשר הנם כתובים על ספר דברי הימים--למלכי ישראל ס
מלכים ב 15 : 16 (ALEP)
טז אז יכה מנחם את תפסח ואת כל אשר בה ואת גבוליה מתרצה--כי לא פתח ויך את כל ההרותיה בקע פ
מלכים ב 15 : 17 (ALEP)
יז בשנת שלשים ותשע שנה לעזריה מלך יהודה מלך מנחם בן גדי על ישראל עשר שנים--בשמרון
מלכים ב 15 : 18 (ALEP)
יח ויעש הרע בעיני יהוה לא סר מעל חטאות ירבעם בן נבט אשר החטיא את ישראל--כל ימיו
מלכים ב 15 : 19 (ALEP)
יט בא פול מלך אשור על הארץ ויתן מנחם לפול אלף ככר כסף--להיות ידיו אתו להחזיק הממלכה בידו
מלכים ב 15 : 20 (ALEP)
כ ויצא מנחם את הכסף על ישראל על כל גבורי החיל לתת למלך אשור חמשים שקלים כסף לאיש אחד וישב מלך אשור ולא עמד שם בארץ
מלכים ב 15 : 21 (ALEP)
כא ויתר דברי מנחם וכל אשר עשה הלוא הם כתובים על ספר דברי הימים--למלכי ישראל
מלכים ב 15 : 22 (ALEP)
כב וישכב מנחם עם אבתיו וימלך פקחיה בנו תחתיו פ
מלכים ב 15 : 23 (ALEP)
כג בשנת חמשים שנה לעזריה מלך יהודה מלך פקחיה בן מנחם על ישראל בשמרון--שנתים
מלכים ב 15 : 24 (ALEP)
כד ויעש הרע בעיני יהוה לא סר מחטאות ירבעם בן נבט אשר החטיא את ישראל
מלכים ב 15 : 25 (ALEP)
כה ויקשר עליו פקח בן רמליהו שלישו ויכהו בשמרון בארמון בית מלך (המלך) את ארגב ואת האריה ועמו חמשים איש מבני גלעדים וימתהו וימלך תחתיו
מלכים ב 15 : 26 (ALEP)
כו ויתר דברי פקחיה וכל אשר עשה הנם כתובים על ספר דברי הימים--למלכי ישראל פ
מלכים ב 15 : 27 (ALEP)
כז בשנת חמשים ושתים שנה לעזריה מלך יהודה מלך פקח בן רמליהו על ישראל בשמרון--עשרים שנה
מלכים ב 15 : 28 (ALEP)
כח ויעש הרע בעיני יהוה לא סר מן חטאות ירבעם בן נבט אשר החטיא את ישראל
מלכים ב 15 : 29 (ALEP)
כט בימי פקח מלך ישראל בא תגלת פלאסר מלך אשור ויקח את עיון ואת אבל בית מעכה ואת ינוח ואת קדש ואת חצור ואת הגלעד ואת הגלילה כל ארץ נפתלי ויגלם אשורה
מלכים ב 15 : 30 (ALEP)
ל ויקשר קשר הושע בן אלה על פקח בן רמליהו ויכהו וימיתהו וימלך תחתיו--בשנת עשרים ליותם בן עזיה
מלכים ב 15 : 31 (ALEP)
לא ויתר דברי פקח וכל אשר עשה הנם כתובים על ספר דברי הימים--למלכי ישראל פ
מלכים ב 15 : 32 (ALEP)
לב בשנת שתים לפקח בן רמליהו מלך ישראל מלך יותם בן עזיהו מלך יהודה
מלכים ב 15 : 33 (ALEP)
לג בן עשרים וחמש שנה היה במלכו ושש עשרה שנה מלך בירושלם ושם אמו ירושא בת צדוק
מלכים ב 15 : 34 (ALEP)
לד ויעש הישר בעיני יהוה ככל אשר עשה עזיהו אביו עשה
מלכים ב 15 : 35 (ALEP)
לה רק הבמות לא סרו--עוד העם מזבחים ומקטרים בבמות הוא בנה את שער בית יהוה--העליון
מלכים ב 15 : 36 (ALEP)
לו ויתר דברי יותם אשר עשה הלא הם כתובים על ספר דברי הימים--למלכי יהודה
מלכים ב 15 : 37 (ALEP)
לז בימים ההם--החל יהוה להשליח ביהודה רצין מלך ארם ואת פקח בן רמליהו
מלכים ב 15 : 38 (ALEP)
לח וישכב יותם עם אבתיו ויקבר עם אבתיו בעיר דוד אביו וימלך אחז בנו תחתיו פ
❮
❯