מלכים ב 13 : 1 (ALEP)
א בשנת עשרים ושלש שנה ליואש בן אחזיהו מלך יהודה--מלך יהואחז בן יהוא על ישראל בשמרון שבע עשרה שנה
מלכים ב 13 : 2 (ALEP)
ב ויעש הרע בעיני יהוה וילך אחר חטאת ירבעם בן נבט אשר החטיא את ישראל--לא סר ממנה
מלכים ב 13 : 3 (ALEP)
ג ויחר אף יהוה בישראל ויתנם ביד חזאל מלך ארם וביד בן הדד בן חזאל--כל הימים
מלכים ב 13 : 4 (ALEP)
ד ויחל יהואחז את פני יהוה וישמע אליו יהוה כי ראה את לחץ ישראל כי לחץ אתם מלך ארם
מלכים ב 13 : 5 (ALEP)
ה ויתן יהוה לישראל מושיע ויצאו מתחת יד ארם וישבו בני ישראל באהליהם כתמול שלשום
מלכים ב 13 : 6 (ALEP)
ו אך לא סרו מחטאת בית ירבעם אשר החטי את ישראל--בה הלך וגם האשרה עמדה בשמרון
מלכים ב 13 : 7 (ALEP)
ז כי לא השאיר ליהואחז עם כי אם חמשים פרשים ועשרה רכב ועשרת אלפים רגלי כי אבדם מלך ארם וישמם כעפר לדש
מלכים ב 13 : 8 (ALEP)
ח ויתר דברי יהואחז וכל אשר עשה וגבורתו הלוא הם כתובים על ספר דברי הימים--למלכי ישראל
מלכים ב 13 : 9 (ALEP)
ט וישכב יהואחז עם אבתיו ויקברהו בשמרון וימלך יואש בנו תחתיו פ
מלכים ב 13 : 10 (ALEP)
י בשנת שלשים ושבע שנה ליואש מלך יהודה--מלך יהואש בן יהואחז על ישראל בשמרון שש עשרה שנה
מלכים ב 13 : 11 (ALEP)
יא ויעשה הרע בעיני יהוה לא סר מכל חטאות ירבעם בן נבט אשר החטיא את ישראל--בה הלך
מלכים ב 13 : 12 (ALEP)
יב ויתר דברי יואש וכל אשר עשה וגבורתו אשר נלחם עם אמציה מלך יהודה הלא הם כתובים על ספר דברי הימים--למלכי ישראל
מלכים ב 13 : 13 (ALEP)
יג וישכב יואש עם אבתיו וירבעם ישב על כסאו ויקבר יואש בשמרון עם מלכי ישראל פ
מלכים ב 13 : 14 (ALEP)
יד ואלישע חלה את חליו אשר ימות בו וירד אליו יואש מלך ישראל ויבך על פניו ויאמר אבי אבי רכב ישראל ופרשיו
מלכים ב 13 : 15 (ALEP)
טו ויאמר לו אלישע קח קשת וחצים ויקח אליו קשת וחצים
מלכים ב 13 : 16 (ALEP)
טז ויאמר למלך ישראל הרכב ידך על הקשת וירכב ידו וישם אלישע ידיו על ידי המלך
מלכים ב 13 : 17 (ALEP)
יז ויאמר פתח החלון קדמה--ויפתח ויאמר אלישע ירה ויור ויאמר חץ תשועה ליהוה וחץ תשועה בארם והכית את ארם באפק עד כלה
מלכים ב 13 : 18 (ALEP)
יח ויאמר קח החצים ויקח ויאמר למלך ישראל הך ארצה ויך שלש פעמים ויעמד
מלכים ב 13 : 19 (ALEP)
יט ויקצף עליו איש האלהים ויאמר להכות חמש או שש פעמים אז הכית את ארם עד כלה ועתה שלש פעמים תכה את ארם פ
מלכים ב 13 : 20 (ALEP)
כ וימת אלישע ויקברהו וגדודי מואב יבאו בארץ בא שנה
מלכים ב 13 : 21 (ALEP)
כא ויהי הם קברים איש והנה ראו את הגדוד וישליכו את האיש בקבר אלישע וילך ויגע האיש בעצמות אלישע ויחי ויקם על רגליו פ
מלכים ב 13 : 22 (ALEP)
כב וחזאל מלך ארם לחץ את ישראל כל ימי יהואחז
מלכים ב 13 : 23 (ALEP)
כג ויחן יהוה אתם וירחמם ויפן אליהם למען בריתו את אברהם יצחק ויעקב ולא אבה השחיתם ולא השליכם מעל פניו עד עתה
מלכים ב 13 : 24 (ALEP)
כד וימת חזאל מלך ארם וימלך בן הדד בנו תחתיו
מלכים ב 13 : 25 (ALEP)
כה וישב יהואש בן יהואחז ויקח את הערים מיד בן הדד בן חזאל אשר לקח מיד יהואחז אביו במלחמה שלש פעמים הכהו יואש וישב את ערי ישראל פ
❮
❯