מלכים ב 11 : 1 (ALEP)
א ועתליה אם אחזיהו וראתה (ראתה) כי מת בנה ותקם ותאבד את כל זרע הממלכה
מלכים ב 11 : 2 (ALEP)
ב ותקח יהושבע בת המלך יורם אחות אחזיהו את יואש בן אחזיה ותגנב אתו מתוך בני המלך הממותתים (המומתים)--אתו ואת מינקתו בחדר המטות ויסתרו אתו מפני עתליהו ולא הומת
מלכים ב 11 : 3 (ALEP)
ג ויהי אתה בית יהוה מתחבא שש שנים ועתליה מלכת על הארץ פ
מלכים ב 11 : 4 (ALEP)
ד ובשנה השביעית שלח יהוידע ויקח את שרי המאיות (המאות) לכרי ולרצים ויבא אתם אליו בית יהוה ויכרת להם ברית וישבע אתם בבית יהוה וירא אתם את בן המלך
מלכים ב 11 : 5 (ALEP)
ה ויצום לאמר זה הדבר אשר תעשון השלשית מכם באי השבת ושמרי משמרת בית המלך
מלכים ב 11 : 6 (ALEP)
ו והשלשית בשער סור והשלשית בשער אחר הרצים ושמרתם את משמרת הבית מסח
מלכים ב 11 : 7 (ALEP)
ז ושתי הידות בכם כל יצאי השבת ושמרו את משמרת בית יהוה אל המלך
מלכים ב 11 : 8 (ALEP)
ח והקפתם על המלך סביב איש וכליו בידו והבא אל השדרות יומת והיו את המלך בצאתו ובבאו
מלכים ב 11 : 9 (ALEP)
ט ויעשו שרי המאיות (המאות) ככל אשר צוה יהוידע הכהן ויקחו איש את אנשיו באי השבת עם יצאי השבת ויבאו אל יהוידע הכהן
מלכים ב 11 : 10 (ALEP)
י ויתן הכהן לשרי המאיות (המאות) את החנית ואת השלטים אשר למלך דוד--אשר בבית יהוה
מלכים ב 11 : 11 (ALEP)
יא ויעמדו הרצים איש וכליו בידו מכתף הבית הימנית עד כתף הבית השמאלית למזבח ולבית--על המלך סביב
מלכים ב 11 : 12 (ALEP)
יב ויוצא את בן המלך ויתן עליו את הנזר ואת העדות וימלכו אתו וימשחהו ויכו כף--ויאמרו יחי המלך ס
מלכים ב 11 : 13 (ALEP)
יג ותשמע עתליה את קול הרצין העם ותבא אל העם בית יהוה
מלכים ב 11 : 14 (ALEP)
יד ותרא והנה המלך עמד על העמוד כמשפט והשרים והחצצרות אל המלך וכל עם הארץ שמח ותקע בחצצרות ותקרע עתליה את בגדיה ותקרא קשר קשר
מלכים ב 11 : 15 (ALEP)
טו ויצו יהוידע הכהן את שרי המאיות (המאות) פקדי החיל ויאמר אליהם הוציאו אתה אל מבית לשדרת והבא אחריה המת בחרב כי אמר הכהן אל תומת בית יהוה
מלכים ב 11 : 16 (ALEP)
טז וישמו לה ידים ותבוא דרך מבוא הסוסים בית המלך ותומת שם ס
מלכים ב 11 : 17 (ALEP)
יז ויכרת יהוידע את הברית בין יהוה ובין המלך ובין העם להיות לעם ליהוה ובין המלך ובין העם
מלכים ב 11 : 18 (ALEP)
יח ויבאו כל עם הארץ בית הבעל ויתצהו את מזבחתו ואת צלמיו שברו היטב ואת מתן כהן הבעל הרגו לפני המזבחות וישם הכהן פקדת על בית יהוה
מלכים ב 11 : 19 (ALEP)
יט ויקח את שרי המאות ואת הכרי ואת הרצים ואת כל עם הארץ וירידו את המלך מבית יהוה ויבואו דרך שער הרצים בית המלך וישב על כסא המלכים
מלכים ב 11 : 20 (ALEP)
כ וישמח כל עם הארץ והעיר שקטה ואת עתליהו המיתו בחרב בית מלך (המלך) ס
❮
❯
1
2
3
4
5
6
7
8
9
10
11
12
13
14
15
16
17
18
19
20